1 SANSIARNAK 26

Biakinn Kiltu Pawl

1Biakinn kiltu pawl ih hnaṭuan cu a tanglam vekin an ṭhen. Korah hrin Asaf tesinfa sungih Kore ih fapa Meshelemiah in, 2fapa pasarih a nei ih a sangsang in a tanglam hi an si: Zekhariah, Jediael, Zebadiah, Jathniel, 3Elam, Jehohanan le Eliehoenai an si.

4Obed Edom cu Pathian malsawmnak a dong ih fapa pariat a nei: a sangsang in Shemaiah, Jehozabad, Joah, Sakhar, Nethanel, 5Ammiel, Issakhar le Peullethai an si.

6Obed Edom ih fapa upabik Shemaiah cun fapa paruk a nei ih thil tithei an si ruangah an hrinah hminthang an si. 7An hmin cu Othni, Refael, Obed, Elzabad, Elihu le Semakhiah an si. Nautabik pahnih tla cu a hleice in thil tithei an si.

8Hi hnaṭuannak ah Obed Edom sungkhat in thil tithei zetzet minung sawmruk le pahnih an um.

9Meshelemiah sungkhat in thil tithei zetzet minung hleiriat an um.

10Merari sungkhat ah Hosah a um ih fapa pali a nei: Shimri (amah cu upabik a si lo naón a pa in hotu ah a tuah), 11Hilkiah, Tebaliah le Zekhariah an si. Hosah sungkhat in an zate ah biakinn kiltu hleithum an um.

12Levi mi vekin biakinn kiltu pawl cu an sungkhat ciar in an ṭhen ih biakinn hnaṭuan cu an pek hai. 13An kil dingmi kotka hrangah sungkhat fingfing in minung an tam an mal ti loin, camcawhfung an zuk ciar. 14Shelemiah in nisuahnak lam kotka kil ding a zuk ngah ih a fapa mi dang hnenih ruahnak ṭha a pe thei ringringtu Zekhariah in saklam kotka kil ding a zuk ngah. 15Obed Edom in thlanglam kotka kil ding a zuk ih a fapa pawl cu thilri retnak inn kiltu ding an si. 16Shuppim le Hosah in nitlaknak lam kotka kil ding an zuk ih saklam hung fehnak Shalleketh kotka tla a kil phahtu ding an si. An kil tikah a haha in an sawng aw. 17Nisuahnak lam kotka cu nitinte paruk in an kil; saklam cu pali in an kil ih thlanglam tla pali in an kil. Thilri retnak inn pahnih cu minung pali in, inn khat pahnih veve in an kil. 18Nitlaknak lam ih ummi ṭhuam tumpipi umnak lamzin ah pali an um ih a ṭhuam kiltu ah pahnih an um. 19Cumi cu Korah le Merari sungkhat pawl ih biakinn an kilnak hnaṭuan daan a si.

A Dang Biakinn Hnaṭuan Pawl

20A dang Levi mi pawl cu biakinn tangka le Pathian hnenih pekmi thilri retnak inn kiltu an si. 21Gershom hrin sungah Ladan cu sungte tampi ih pu a si ih Jehiel sungkhat ih pu tla a si. 22Hi sungkhat sungin Zetham le a unau Joel cu biakinn tangka le thilri retnak inn kiltu an si.

23Amram, Izhar, Hebron le Uzziel tesinfa pawl tla hnaṭuan pekmi an si.

24Moses fapa Gershom hrin sungin Shebuel cu biakinn tangka kiltu pawl hotu upa bik a si. 25Gershom unau cu Eliezer a si ih cu ruangah Shebuel le Shelomith cu sungkhat ah an cang. Eliezer cu Rehabiah ih pa a si; Rehabiah cu Jeshiah ih pa a si; Jeshiah cu Joram ih pa a si; Joram cu Zikhri ih pa a si; Zikhri cu Shelomith ih pa a si. 26Shelomith le a sungkhat pawl cu Pathian hnenah siangpahrang David, sungkhat ciarih lubik pawl, hrinkhat sungih hotu pawl le ralbawi pawl ih pekmi laksawng pawl kiltu an si. 27Raldonak ih an lakmi hransaw hrekkhat pawl cu an lak ih Biakinn sungih hmanmi thilri ah an tuah. 28Shelomith le a sungkhat pawl cu Biakinn sung hman ding thilri an pekmi hmuahhmuah, profet Samuel, siangpahrang Saul, Ner fapa Abner le Zeruiah fapa Joab pawl ih an pekmi tiangin a kiltu an si.

Levi Mi A Dang Pawlih ṭuanvo

29Izhar tesinfa sungin Khenaniah le a fapa pawl cu zung hnaṭuantu, cazin kaitu le misenpi ih thuṭhentu an si.

30Hebron tesinfa sungin Hashabiah le a sungkhat pawl hminthang zetzet, minung thawngkhat le zasarih cu Jordan Tiva in nitlaknak lamah biaknak lam thu siseh, nitin misenpi nun khawsaknak thuhla siseh, tawlreltu le ngaihtuahtu an si. 31Hebron tesinfa pawl lakah Jeriah cu an hotu bik a si. David ih siangpahrang a ṭuannak kum sawmli#Kum sawmli timi hi 960 BC hrawng a si. kumah Hebron ih tesinfa pawl thuhla an zingzoi tikah ralkap hminthang zetzet Gilead ram Jazer khua ih an um kha an thei. 32Curuangah David in Jeriah ih sungkhat pawl, an hrin sungih hminthang le lubik pawl minung thawng hnih le zasarih a hril ih Reuben ram, Gad ram le nisuahnak lam Manasseh ram sungih an biaknak lam thu le nitinte an nun khawsaknak thuhla tawlreltu le ngaihtuahtu dingah a ret.

Currently Selected:

1 SANSIARNAK 26: FCL

Highlight

Copy

Compare