Luca 18
18
Parabola a Giudicãtorlui Nindreptu
1Deapoea Isusul lã dzãsi a lor unã parabolã, tra s-lã aspunã cã cum prindi s-nã rugãm dipriunã fãrã s-chearã nãdia. 2Elu dzãsi: “Tu un cãsãbã eara un giudicãtor tsi nu avea fricã di Dumnidzãlu sh-nu avea rispect di vãrã om. 3Tu atsel cãsãbã eara sh-unã veduvã tsi njidzea la nãsu sh-lji fãtsea rigeai: ‘Dã-nji ndriptati nãintea a contrarlui a meu!’ 4Ti putsãn chiro elu nu vru s-u fãtsea, ma deapoea dzãsi: ‘Cu tutã cã nu am fricã di Dumnidzãlu sh-nu am rispect di vãrã om, 5metsi aestã veduvã ma mi cãrteashti, va lji dau ndriptati, tra s-nu yinã dipriunã s-mi creapã.’” 6Sh-Domnul dzãsi: “Avdzãts tsi dzãtsi giudicãtorlu atsel nindreptu. 7Vahi Dumnidzãlu nu va lj-da ndriptati a aleptsilor a lui tsi lj-grescu dzuã sh-noapti? Va amãnã vahi s-apofãseascã ti agiutarea a lor? 8Mini ma vã dzãc cã elu va s-apofãseascã trãoarã ti ndriptati. Ma cãndu va yinã Hiljilu a Omlui, va aflã pisti pri loc?”
Parabola trã Fariseul sh-trã Taxidarlu
9Isusul lã dzãsi unã altã parabolã trã niscãntsã tsi minduia cã eara ndreptsã sh-dispretsuea altsãlji: 10“Doi oaminji s-alinarã tu templu s-ruga, un eara Fariseu sh-alantu taxidar. 11Fariseul stãtea pi cicioari shi s-ruga ashãtsi cu mintea a lui: ‘Dumnidzale, ti hãristisescu tsi nu escu ca altsã oaminji arãchitori, nindreptsã, curun-cãlcatã, sh-nitsi ca aestu taxidar. 12Mini tsãnu pãreasinji doauã ori tu stãmãnã sh-plãtescu a dzatsea parti trã itsido tsi amintã.’ 13Iarã taxidarlu tsi stãtea diparti sh-nu cutidza si scula nitsi ocljilji cãtrã tser, bãtea cheptul a lui dzãcãnda: ‘Dumnidzale, s-ai njilã trã mini amãrtioslu.’ 14Mini ma vã dzãc cã aestu om, sh-nu Fariseu s-turnã la casã ndriptat nãintea a Dumnidzãlui. Cã caitsido tsi s-analtsã, va s-apunã, sh-cai va s-apunã va s-analtsã.”
Cilimenjlji Atselji Njitsi sh-Isusul
15Niscãntsã oaminji adutsea cilimenji la Isusul tsi s-bãga mãna pri nãshi, ma ucenitsilji cãndu vidzurã aestã lji vãrghirã. 16Ma Isusul lji acljimã cilimenjlji ningã nãsu sh-lã dzãsi: “Alãsats cilimenjlji atselji njitsi s-yinã la mini sh-nu lji nchidicats, cã a lor easti amirãriljea a Dumnidzãlui. 17Dealihea ma vã dzãc cã atsel tsi nu u-aproachi amirãriljea a Dumnidzãlui ca un cilimean njic, nu va s-intrã tu atsea.”
Avutul sh-Amirãriljea a Dumnidzãlui
18Un di mãrlji a Iudeilor lu ntribã: “Bun nvitsãtore, tsi prindi s-fac tsi s-mushtinedz bana eternã?” 19Sh-Isusul dzãsi: “Cãtse nji dzãts bun? Vãrã nu easti bun, dicãt un singur, Dumnidzãlu. 20Tini li cunoshti dimãndãrili: ‘Nu ncalcã curuna, nu vatãmã, nu fur, nu dã mãrtirii arãdioasã, tinjisea tatãl a tãu sh-muma a ta.’” 21Atumtsea atsel bãrbat dzãsi: “Tuti aesti li-am faptã di-tu tinireatsa a mea.” 22Cum avdzã aestã, Isusul lj-dzãsi: “Ts-lipseashti ninga un lucru. Vindi tuti cãti ai sh-dã-li a oarfãnjilor sh-va s-ai ayishteari tu tser. Deapoea, haidi sh-urmeadzã-mi.” 23Ma cãndu li avdzã aesti elu, s-nvirinã multu, cã eara multu avut. 24Atumtsea Isusul, cãndu lu vidzu, dzãsi: “Cãt greu easti trã atselji tsi au aveari s-intrã tu amirãriljea a Dumnidzãlui! 25Easti ma lishor s-treacã unã cãmilã prit guva a aclui, dicãt s-intrã avutlu tu amirãriljea a Dumnidzãlui.” 26Sh-atselji tsi ma avdza lu ntribarã: “Ma cai poati s-ascapã?” 27Isusul apãndisi: “Atsea tsi easti nipututã trã oaminjlji, easti putut trã Dumnidzãlu.” 28Deapoea Petrul lj-dzãsi: “Ia, noi avem alãsat itsido sh-ti urmãm.” 29Sh-Isusul lã dzãsi a-lor: “Dealihea ma vã dzãc cã nu easti vãrã tsi ari alãsatã casa, muljearea, frats, surãri, pãrintsã, sh-cilimenji trã amirãriljea a Dumnidzãlui, 30tsi s-nu ljea multu ma multu tu aestu chiro sh-tu chirolu tsi va yinã s-ljea bana eternã.”
Isusul Prispuni di a Treia Oarã Moartea a Lui
31Deapoea Isusul lo dinãparti di doisprãdzatslji sh-lã dzãsi: “Ia, noi ma nã alinãm la Ierusalem sh-tuti atseali tsi scriarã prufitsilji trã Hiljilu a Omlui va si mplineascã. 32Elu va s-prida a pãngãnjilor sh-va lu-pizueascã, va s-tirãnseascã sh-va hibã ascucheat. 33Deapoea va lu zãpãleascã, va lu vatãmã, ma tu dzua a treia va s-nyeadzã.” 34Ucenitsilji nu aduchirã tsiva di aesti cã eara ascumtu sh-elji nu aduchea atseali tsi elu avea dzãsã.
Un Orbu Dicunjar Amintã Videarea
35Iarã Isusul ma s-apruchea di Ierico, sh-un orbu shidea ningã cali cu mãna teas. 36Cãndu avdzã cã ma tritsea unã multsãmi, ntribã cã tsi eara. 37Elji lj-apãndisirã cã ma treatsi Isus Nazareanlu. 38Atumtsea orbul aurlã dzãcãnda: “Isus, Hiljilu al David, s-ai njilã ti mini!” 39Atselji tsi imna nãinti lu vãrghirã s-tãtsea, ma elu aurlã sh-ma multu: “Hiljilu al David, s-ai njilã ti mini!” 40Atumtsea Isusul dãnãsi sh-ursi s-lj-adutsea orbulu. Cãndu elu s-apruche, Isusul lu ntribã: 41“Tsi vrei s-fac ti tini?” Sh-elu apãndisi: “Doamne, s-ved nãpoi!” 42Sh-Isusul lj-dzãsi: “Vedz nãpoi! Pistea a ta ti vindicã.” 43Tu atsea oarã lji si turnã videarea nãpoi sh-urmãnda Isusul multumãrea Dumnidzãlu, sh-tut populu, cãndu vidzu aestã, alãvda Dumnidzãlu.
Currently Selected:
Luca 18: BLRR
Highlight
Copy
Compare
Share
Want to have your highlights saved across all your devices? Sign up or sign in
