Luca 17
17
Amãrtia, Pistea sh-Huzmitipsirea
1Atumtsea Isusul lã dzãsi a ucenitsilor a lui: “Nu poati s-nu s-yinã cheditsi, ma cavai di atsel tsi s-fatsi sibepi s-yin! 2Trã nãsu va eara ma ghini si spindzura di gushi unã cheatrã di moarã shi si s-arca tu amari, dicãt si s-fac sibepi tra s-cad tu amãrtii un di atselji njitslji. 3S-avets cãshtiga! Macã fratili icã sora a ta amãrtiseashti contra tini, vãrghea-lji, sh-macã s-mitãnjiuseascã, ljeartã-lji. 4Macã amãrtiseashti contra tini shapti ori tu dzuã, shi shapti ori yini sh-tsã dzãtsi: ‘Mi-mitãnjiusescu,’ ljeartã-lu.” 5Atumtsea apostulji lj-dzãsirã a Domnului: “Mãrea-nã pistea!” 6Sh-Domnul dzãsi: “Ma s-aveat pisti cãt un gãrnuts di sinapi, va s-lji dzãtseat aishtui ciriciu: ‘Scoatã-ti cu arãdãtsinã sh-seaminã-ti tu amari,’ sh-ciriciu va s-vã asculta. 7Cai di voi, ma s-aibã un huzmichear tsi lji lucreadzã agrul icã lj-pashti oili, va lji dzãc cãndu elu s-turna dit cãmpu: ‘Ursea trãoarã la measã’? 8Nu va lj-dzãcã: ‘Ndreadzi-nji tsina, scoalã mãnitsli sh-huzmitipsea-nji s-mãc shi s-beau, sh-deapoea s-mãts shi s-beai sh-tini’? 9Va lji dzãcã haristo a huzmichearlui cã featsi atseali tsi lji li dimãndã? 10Ashãtsi sh-voi, cãndu s-li fãtsets tuti atseali tsi vã suntu dimãndati, dzãtsets: ‘Him huzmicheari fãrã hãiri. Noi avem faptã atsea tsi prindi s-fãtsem.’”
Isusul Vindicã Dzatsi Leproshi
11Cãndu ma njidzea cãtrã Ierusalem, Isusul tricu namisa di Samaria sh-di Galilea. 12Cãndu ma intra tu unã hoarã, lj-ishirã nãinti dzatsi leproshi. Elji stãturã diparti. 13Anãltsãndã boatsea dzãsirã: “Isuse, Nvitsãtore, s-ai njilã trã noi!” 14Elu lji vidzu sh-lã dzãsi: “Dutsets-vã sh-aspunets-vã la preftsãlji.” Sh-undzi tsi cãndu ma njidzea, s-curarã. 15Deapoea un di atselji, anda vidzu cã s-vindicã, s-turnã sh-alãvda Dumnidzãlu cu boatsi analtã. 16Elu cãdzu pri dintsi la cicioarili al Isus sh-lu hãristisea. Elu eara Samaritan. 17Isusul atumtsea lu ntribã: “Nu s-vindicarã di dzatsilji? Iu suntu atselji noaulji? 18Nu s-aflã nitsiunu di nãshi tsi si s-turna shi s-lji dãdea alãvdari a Dumnidzãlui, dicãt mash aestu xenlu?” 19Deapoea lj-dzãsi a lui: “Scoalã-ti sh-imnã! Pistea a ta ti vindicã.”
Vinita a Amirãriljei al Dumnidzãu
20Cãndu Fariseilji lu ntribarã Isusul cã cãndu va yinã amirãriljea a Dumnidzãlui, elu lã apãndisi a lor: “Amirãriljea a Dumnidzãlui nu va yinã tra s-hibã vidzut, 21Nu va s-poat s-dzãcã: ‘Ia, easti aoa,’ icã: ‘Ia, easti aclo!’ Cã Amirãriljea a Dumnidzãlui easti nãuntru tu voi.” 22Deapoea lã dzãsi a ucenitsilor: “Va yinã dzãlili cãndu voi va vrets s-videts unã di dzãlili a Hiljilui a Omlui, sh-nu va u-videts. 23Atumtsea va vã dzãcã: ‘Ia, aoa!’ Icã: ‘Ia, aclo!’ Ma nu vã dutsets sh-nu u-urmats. 24Cã, ashã ca sfulgul tsi ascapirã sh-lunjineadzã tserlu dit un mardzini a lui tu alantã mardzini, ashã va hibã sh-Hiljilu a Omlui tu dzua a lui. 25Ma, ma nãinti elu prindi si s-mundueascã multu shi si s-aleapid di aestã farã. 26Sh-ashã cum undzi tu dzua al Noe, ashã va hibã sh-tu dzua a Hiljilui a Omlui. 27Tu atsel chiro oaminjlji mãca, bea, si nsura, s-mãrta pãnã tu dzua cãndu Noe intrã tu varcã. Deapoea vini nãcarea sh-lji chiru di tuts. 28Ashãtsi undzi sh-tu dzãlili al Lot. Oaminjlji mãca, bea, acumpãra, vindea, simina sh-adra cãsi. 29Iarã tu dzua tsi Lotul ishi dit Sodom, cãdzu foc sh-schifurã dit tser sh-lji chiru tuts. 30Ashãtsi va hibã sh-tu atsea dzuã cãndu va si aspunã Hiljilu a Omlui. 31Tu atsea dzuã, vãrã tsi va hibã pri citia a casiljei sh-lucrili a lui va hibã n-casã, s-nu dipunã s-li ljea atseali. Tutashã, atsel tsi easti tu cãmpuri s-nu s-toarnã nãpoi. 32Adutsets-vã a minti di muljearea al Lot!#Ahr 19:26. 33Caitsido tsi va u ascapã bana a lui, va u-chearã, sh-caitsido tsi va u-chearã, va u-ascapã. 34Mini ma vã dzãc: tu atsea noapti doi oaminji va hibã tu un pat, un va si s-ljea sh-alantu va si s-alasã. 35Doauã muljeri va hibã trã mãtsinari deadun, unã va si s-ljea sh-alanta va si s-alasã. 36[Doi bãrbats va hibã tu cãmpu; un va si s-ljea sh-alantu va si s-alasã.”]#17:36 Aestu versu nu s-aflã tu manuscrisili atseali veaclji 37Atumtsea ucenitsilji l-ntribarã: “Iu, Doamne?” Sh-elu lã dzãsi: “Iu easti cufuma, aclo s-adunã shi vulturilji.”
Currently Selected:
Luca 17: BLRR
Highlight
Copy
Compare
Share
Want to have your highlights saved across all your devices? Sign up or sign in
