Luca 14
14
Isusul la Casa a Fariseului
1Unã Sãmbãtã, cãndu Isusul s-dusi la casa a unui di mãrlji a Fariseilor tra s-mãcã, elji ma lu vigljea. 2Aclo nãintea al Isus eara un om lãndzit cu idropizii. 3Isusul lji ntribã nvitsãtorlji a legiljei sh-Fariseilji: “Easti volje trã vindicari dzua di Sãmbãtã?” 4Ma elji tãcurã. Atumtsea Isusul lo di mãnã nipututlu, lu vindicã sh-lu alãsã s-fugã. 5Deapoea, lã dzãsi a lor: “Cai easti atsel, tsi ma s-lji cadã hiljilu icã boulu tu un puts, dzua di Sãmbãtã nu va l-scoatã trãoarã nafoarã?” 6Ma elji nu puturã s-lji apãndisea. 7Isusul vidzu cã elji alãdzea locurili di nãinti la measã, sh-lã spusi unã parabolã a lor: 8“Cãndu ti acljeamã vãrã pi numtã, nu shedz tu protlu loc, cã vahi easti acljimat vãrã altu tsi easti ma tinjisit di tini, 9sh-atsel tsi vã ari acljimat di doilji voi, s-dzãcã: ‘Alas loclu a tãu aishtui.’ Sh-atumtsea tini arushinat, va ti duts s-shedz la loclu di ma nãpoi. 10Trã atsea cãndu ti acljeamã, duti shi shedz tu loclu dit soni, tsi cãndu s-yin atsel tsi ti ari acljimat, s-tsã dzãcã: ‘Oaspe, aproach-ti ma nsus.’ Atumtsea va s-hii tinjisit nãintea atsilor tsi suntu la measã cu tini. 11Cã caitsido tsi va s-analtsã, va s-apleacã, sh-caitsido tsi va s-apleacã, va s-analtsã.” 12Isusul lj-dzãsi atsilui tsi lu avea acljimatã: “Cãndu fats un prãndzu icã unã tsinã, nu acljeamã oaspilji a tãlji, nitsi fratslji a tãlji, nitsi soia a ta, nitsi vitsinjlji atselji avutsi, cã sh-atselji va ti acljeamã tini, sh-ashã va s-tsã toarnã arãsplata. 13Trã atsea, cãndu fats unã uspetsi acljeamã oarfãnjlji, sãcatsilji, shcljiochlji sh-orghilji. 14Atumtsea, va s-hii ghinicuvintat cã elji nu au cum s-ts-u toarnã arãsplata, ma arãsplãtirea va tsã si da tu nyearea a ndreptsãlor.”
Parabola a Uspetsiljei atsiljei Mari
15Un di atselji tsi eara acljimat la measã, dupã tsi li avdzã aesti, lj-dzãsi al Isus: “Ca hara di atsel tsi va s-mãcã tu amirãriljea a Dumnidzãlui.” 16Atumtsea Isusul lj-dzãsi: “Un om featsi unã uspetsi mari sh-acljimã multsã oaminji. 17Cãndu vini oara a uspetslui, pitricu huzmichearlu a lui s-lã dzãtsea a acljimatslor: ‘Yinits, cã tuti suntu etinji tora.’ 18Atumtsea tuts apãrnjirã s-caftã ljirtari. Protlu dzãsi: ‘Acumpãrai un agru sh-prindi s-mi duc s-lu ved. Tsã fac rigeai, s-mi ljertsi.’ 19Un altu dzãsi: ‘Acumpãrai tsintsi pãreclji di boi sh-ma mi duc s-li bagã tu provã. Tsã fac rigeai, s-mi ljertsi.’ 20Un altu dzãsi: ‘Macãt mi nsurai sh-trã atsea nu pot s-yin.’ 21Ashã huzmichearlu s-turnã sh-lji li aspusi tuti aesti a domnului a lui. Atumtsea nicuchirlu a casiljei, s-nãrãi sh-lji dzãsi a huzmichearlui a lui: ‘Trãoarã, duti prit cãljuri sh-tu sucãchili a cãsãbãlui sh-adu aoa oarfãnjlji, sãcatslji, orghilji shi shcljiochlji.’ 22Deapoea huzmichearlu lj-dzãsi: ‘Doamne, s-featsi ashã cum ursish tini sh-nãpoi ari loc.’ 23Atumtsea nicuchirlu lj-dzãsi a huzmichearlui: ‘Eshi prit sucãchii sh-prit garduri, sh-pindzi-lji oaminjlji s-intrã nãuntru si nji umplã casa. 24Mini ma vã dzãc cã vãrã di atselji oaminji tsi eara acljimats, nu va-u gusteadzã uspetslu a meu.’”
S-Hii Uceniclu al Isus
25Multsãnji mãri urma Isusul, iarã elu s-turnã cãtrã elji sh-dzãsi: 26“Macã vãrã yini dupã mini sh-va ma multu di mini#14:26 Zborlu gãrtseashti esti “aurashti”. tatãl sh-muma a lui, muljearea sh-cilimenjlji, fratslji sh-surãrili a lui, ninga sh-bana a lui, nu poati s-hibã uceniclu a meu. 27Sh-cai nu u-tsãni crutsea a lui tra s-yinã dupã mini, nu poati s-hibã uceniclu a meu. 28Cai di voi, macã va s-adarã unã culã, nu sheadi ma nãinti s-lugurseascã hãrgiuirili shi s-veadã macã ari pãradz trã ascãpari cula? 29Altã soi, macã ari arcatã timeljilu sh-nu poati s-u ascapã, va l-pizueascã tuts atselji tsi va lu veadã, 30sh-va dzãcã: ‘Aestu om ahurhi s-adarã casã ma nu putu s-u ascapã.’ 31Icã cai amirã, cãndu s-nchiseashti trã alumtari contra a unui altu amirã, nu s-apuni shi s-mindueashti ma nãinti, cã poati s-alumtã elu cu dzatsi njilji di suldats cu atsel tsi yini cu yinghits di njilji di suldats? 32Atumtsea, macã nu poati, cãndu atselji altsãlji suntu diparti lji pitreatsi delegatsii tra si zburãscu trã pace. 33Ashãtsi, caitsido di voi tsi nu poati s-mutã mãna di atseali tsi ari, nu poati s-hibã uceniclu a meu. 34Sarea easti bunã, ma macã cheari njiurizma, cum poati s-u amintã nãpoi? 35Ea nu axizeashti nitsi tu loc nitsi tu cuprii, ma easti trã arcari. Cai ari ureclji trã avdzãri, s-avdã!”
Currently Selected:
Luca 14: BLRR
Highlight
Copy
Compare
Share
Want to have your highlights saved across all your devices? Sign up or sign in
