Luca 12
12
Prispuneari sh-Urnipsiri
1Tu atsel chiro s-adunarã njilji di oaminji, ahãtu cãt ma ncãlca un-alantu. Isusul nãinti di tuti apãrnji s-lã dzãcã a ucenitsilor a lui: “Afirits-vã di maeaua a Fariseilor, tsi easti ipucrizia. 2Nu easti tsiva anvãlitã tsi nu va s-dizvãleascã sh-ascumtu tsi nu va s-cunoascã. 3Trã atsea itsido tsi avets dzãsã tu scutidi, va si s-avdã tu lunjinã, sh-atseali tsi avets pushpurat tu ureclji pri udãdzi cu ushi ncljisi, va s-dimãndã prit citiili a cãsilor. 4Ma vã dzãc a voauã, oaspits a melji, tsi s-nu avets fricã di atselji tsi vatãmã truplu sh-dupã atsea nu pot s-facã tsiva altã. 5Mini va vã aspun di la cai s-avets fricã. Afirits-vã di atsel tsi, dupã tsi hits vãtãmat, ari autoritati s-vã arucã tu Colasi. Ie, ma vã dzãc, di aestu s-avets fricã. 6Nu si s-vindu tsintsi harabelji di doauã pãradz? Cu tut atsea, vãrã di elji nu easti agãrshitã nãintea a Dumnidzãlui. 7Ninga sh-perlji a caplui a vostru suntu tuti numirats. Trã atsea s-nu avets fricã. Voi axiusits ma multu di harabelji. 8Mini ma vã dzãc: Caitsido tsi mi mãrtirseashti mini nãintea a oaminjlor, sh-Hiljiu a Omlui va s-mãrtirseascã nãintea a anghilor a Dumnidzãlui. 9Ma atsel tsi va mi aleapidã nãintea a oaminjlor, va hibã alipidat nãintea a anghilor a Dumnidzãlui. 10Caitsido tsi va greascã contra a Hiljilui a Omlui va lji si ljeartã, ma atsel tsi va blastimã contra a Duhlui Sãmtu, nu va lji si ljeartã. 11Cãndu va vã ducã nãintea a sinagodzilor, la domnjitorlji sh-la administratorlji, s-nu avets mirachi cã cum va vã apãrats icã tsi prindi s-dzãtsets. 12Duhlu Sãmtu va vã nveatsã cã tsi s-dzãtsets tu oara atsea.”
Parabola a Avutlui Glar
13Atumtsea un dit multsãmea lj-dzãsi: “Nvitsãtore, dzã-lji a fratilui a meu si mpartã mushtinirea cu mini.” 14Isusul lj-apãndisi: “Oaspe, cai mi bãgã mini giudicãtor icã mpãrtsãtor trã voi?” 15Deapoea lã dzãsi a lor: “S-avets cãshtigã sh-afirits-vã di orixea trã aveari, cã bana a omlui nu easti ligat di avearea atsea marea a lui.” 16Atumtsea elu lã aspusi unã parabolã: “Agrul a unui avut deadi multu birichet. 17Ashãtsi elu s-minduea cu mintea a lui: ‘Tsi s-fac, cã nu am loc iu s-adun birichetea?’ 18Deapoea dzãsi: ‘Aestã va fac: Va s-aspargu hãmbãrili a meali sh-va fac niscãnti ma mãri. Aclo va adun tut birichetea sh-tuti bunãtãtsili a meali. 19Deapoea va lj-dzãc a suflitlui a meu: “Suflite, tini ai multi bunãtãts adunati trã multsã anji. Tora discurmã-ti, mãcã, bea sh-hãrsea-ti!”’ 20Ma Dumnidzãlu lj-dzãsi: ‘Glare! Aestã noapti suflitlu a tãu va s-caftã, ma atseali tsi ndripseshi a cui va hibã?’ 21Ashã lj-undzeashti atsilui tsi adunã ayishteari trã nãsu sh-nu easti avut cãtrã Dumnidzãlu.”
S-Nu Avets Gaile!
22Deapoea lã-dzãsi a ucenitsilor a lui: “Trã atsea ma vã dzãc: Nu vã minduits trã bana a voastrã cã tsi va mãcats, nitsi di truplu a vostru cã tsi va nvishtetsã. 23Bana easti ma multu dicãt hrana sh-truplu ma multu dicãt nvishtearea. 24Mutrits-lji corghilji: Atselji nitsi seaminã, nitsi seatsirã, nu au nitsi grãnar sh-nitsi hãmbar, sh-Dumnidzãlu lji hrãneashti. Ma voi custusits multu ma multu dicãt puljilji. 25Cai di voi, cu tut cãshtiga a lui poati s-adavgã bana a lui unã oarã ma multã? 26Atumtsea, macã nu putets s-adrats njitsi lucri, cãtse vã mealã trã alti? 27Mutrits cum crescu zãmbãtslji. Nu lucreadzã sh-nitsi nu torcu, cu tut atsea, mini ma vã dzãc cã nitsi Solomonul tu tutã mãrirea a lui, nu eara nviscutã ca un di zãmbãtslji. 28Atumtsea, macã Dumnidzãlu nveashti iarba a cãmpului tsi azã easti sh-mãni s-arucã tu cireap, cãt ma multu Dumnidzãlu vã nveashti voi, putsãn-pistimenji! 29Nu mutrits tsi va mãcats sh-tsi va bets. S-nu avets gaile! 30Natsiunili a lumiljei li caftã tuti aesti, ma Tatãl a vostru lu shtii cã voi avets ananghi di eali. 31Cãftats ma nãinti amirãriljea al Dumnidzãu sh-tuti aesti va vã si adavgã. 32Nu ti-aspari, cupii njicã, cã a Tatãlui a vostru lj-arsi s-vã da amirãriljea. 33Vindets ayishtearili a voastri sh-dats a niavutslor! Fãtsets trã voi pundzi tsi nu s-nvicljeadzã, unã ayishteari tu tseruri tsi nu va ascapã, iu furlu nu s-aproachi sh-molitsa nu u-aroadi. 34Cã aclo iu easti ayishtearea a voastrã, aclo va hibã sh-inima a voastrã.”
Bãgats Oarã
35“Etimãsits-vã trã huzmitipsiri sh-aprindets cãndila. 36S-hits ca atselji, tsi ashteaptã nicuchirlu a lor, tsi va si s-toarnã di la numtã, tsi cãndu s-yinã shi s-asunã la ushã, trãoarã s-lji-u discljidets. 37Ca hara di atselji huzmicheari, tsi cãndu si s-toarnã nicuchirlu, lji aflã dishtiptats! Dealihea ma vã dzãc cã elu va si s-nveascã trã huzmeti, va lji apunã atselji la measã, va yinã aproapi sh-va lji chirãseascã. 38Sh-macã yini tu njeadzãnoapti icã dimineatsa tu apiritã, shi s-lji aflã ashãtsi, ca hara di atselji huzmicheari. 39S-u shtits aestã, cã macã va-u shtia nicuchirlu a casãljei tu tsi oarã va yinea furlu, nu va alãsa atsel s-lji aspãrdzea casa. 40Sh-voi s-hits etinji, cã Hiljiu a Omlui yini tu atsea oarã tsi nu lu ashtiptats.” 41Petrul lj-dzãsi: “Doamne, aestã parabolã ma u-dzãtsi mash trã noi, ama trã tuts?” 42Domnul apãndisi: “Cai easti atsel administrator pistimen sh-mintimen, tsi va lu-bagã nicuchirlu pristi huzmichearlji a lui tra s-lã da a lor tãimea tu chirolu tsi prindi? 43Ca hara di atsel huzmichear tsi cãndu va yinã nicuchirlu a lui, va lu aflã adrãnda ashã. 44Dealihea ma vã dzãc cã elu va lu bagã pristi tuti ayishtearili a lui. 45Ma, macã atsel huzmichear mindueashti tu inima a lui: ‘Nicuchirlu a meu amãnã si s-toarnã,’ sh-ahurheashti s-lji batã huzmichearlji sh-huzmichearli, s-mãcã, s-bea shi si s-mbeatã, 46atumtsea nicuchirlu atsilui huzmichear va yinã tu dzua tsi nu lu ashteapti, sh-tu oara tsi nu u-shtii, sh-va lu facã bãcãtsã sh-partea a lui va u-bagã cu nipistimenjlji. 47Ma atsel huzmichear, cai shtia vrearea a nicuchirlui a lui sh-nu s-etimãsi sh-nu featsi dupã vrearea a nicuchirlui, va si s-batã multu. 48Ma atsel, tsi nu u-shtia sh-featsi lucri tsi prindi si s-batã, va si s-batã niheamã. A cui lji si ari datã multu, va lji si caftã multu. A cui lji si pistipsi multu, va lji si caftã ma multu. 49Mini vinj s-aruc foc pristi loc sh-cãtã multu voi tsi foclu s-eara apreasã tora. 50Am un pãtigiuni trã pãtidzari sh-nu escu arihati pãnã cãndu s-u fac. 51Minduits cã vinj s-aducã pace pristi loc? Nu vã dzãc, ma dispãrtsãri. 52Di tora sh-nclo, tsintsi oaminji tu unã casã va hibã dispãrtsãts, trei contra a doilor sh-doi contra a treilor. 53Tatãl va hibã dispãrtsat di hiljilu, sh-hiljilu di tatãlu, muma di hiljea sh-hiljea di muma, soacra di nveasta sh-nveasta di soacra a ljei.”
Aduchirea a Chirolui
54Deapoea Isusul lã dzãsi a multsãnjilor: “Cãndu voi videts un nior tsi si scoalã dit ascãpitat, trãoarã dzãtsets: ‘Ma yini ploaia,’ sh-ashã easti. 55Cãndu suflã dit sud, voi dzãtsets: ‘Va facã cãloari,’ sh-ashã easti. 56Ipucrits! Voi aduchits fatsa a loclui sh-a tserlui, ma chirolu di tora cum nu putets s-lu aduchits? 57Cãtse nu giudicats voi singuri tsi easti ndreptu? 58Cãndu tini nedzi cu contrarlu a tãu la giudicãtorlu, s-caftsã pri cali tsi s-ti uidiseshti cu nãsu, tsi contrarlu s-nu ti scoatã nãintea a giudicãtorlui, sh-giudicãtorlu s-ti prida la gardianlu sh-elu s-ti bagã tu hapsi. 59Mini ma ts-dzãc, cã tini nu va eshi di aclo, ni plãtitã sh-sutarlu dit soni.”
Currently Selected:
Luca 12: BLRR
Highlight
Copy
Compare
Share
Want to have your highlights saved across all your devices? Sign up or sign in
