Ioan 3

Isusul Nveatsi Nicodemul

1Namisa di Fariseilji eara un om cu numa Nicodem, un di mãrlji a Iudeilor. 2Aestu vini noaptea la Isusul shi-lji dzãsi: “Rabbi, noi lu shtim cã tini eshti nvitsãtor vinit di la Dumnidzãlu, cã vãrã nu poati s-facã seamnili tsi fats tini, macã Dumnidzãlu nu easti cu nãsu.” 3Isusul lji-apãndisi: “Dealihea ma tsã dzãc, cã macã vãrã nu va si s-amintã nãpoi, elu nu poati s-u veadã amirãriljea a Dumnidzãlui.” 4Nicodemul lu-ntribã: “Cum poati si s-amintã un om cãndu easti aush? Poati s-intrã elu di a doaua oarã tu pãnticlu a mumãljei shi si s-amintã?” 5Isusul lji-apãndisi: “Dealihea ma tsã dzãc cã, cai nu s-amintã dit apã sh-di la Duhlu, nu poati s-intrã tu amirãriljea a Dumnidzãlui. 6Tsi easti amintat di trup easti trup, sh-tsi easti amintat di la Duhlu easti duh. 7Nu ti ciudisea cã tsã-dzãsh: ‘Voi prindi s-vã amintats nãpoi.’ 8Vimtul suflã iu va, sh-tini lji avdzã boatsea, ma nu shtii di iu yini shi cãtrã iu neadzi. Ashã easti cu caitsido tsi easti amintat di la Duhlu.” 9Nicodemul lu ntribã: “Cum poati s-undzeascã aesti lucri?” 10Isusul lj-apãndisi: “Tini eshti nvitsãtor tu Israel shi nu li shtii aesti lucri? 11Dealihea ma tsã dzãc. Noi zburãm atsea tsi shtim, shi mãrtirsim atsea tsi avem vidzut, ma voi nu u apruchiats mãrtiria a noastrã. 12Macã vã am grãit di lucrili a loclui sh-voi nu pistipsits, cum va pistipsits macã vã grescu di lucrili tsereshti? 13Vãrã nu s-alinã tu tser, di cãt mash atsel tsi dipunã dit tser, Hiljilu a omlui. 14Sh-ashã cum Moisiul u alinã nãpãrtica tu irnjii, ashãtsi prindi si s-analtsã nsus Hiljilu a omlui, 15cã caitsido tsi pistipseashti la elu, s-aibã banã eternã. 16Cã Dumnidzãlu u vru ahãntu multu lumea, cãt deadi Hiljilu a lui singur-amintat, tsi caitsido tsi pistipseashti tu nãsu nu va s-chearã, ma va aibã banã eternã. 17Cã Dumnidzãlu nu lu pitricu Hiljilu a lui tu lumi tra s-giudicã lumea, ma tsi lumea s-ascapã prit nãsu. 18Atsel tsi pistipseashti tu nãsu, nu s-giudicã, ma atsel tsi nu pistipseashti, tora easti giudicat, cã nu ari pistipsitã tu numa a Hiljilui singur-amintat a Dumnidzãlui. 19Ma giudicata easti aestã: Lunjina vini tu lumi, ma oaminjilji vrurã scutidu ma multu dicãt lunjina, cã faptili a lor eara anapudi. 20Cã caitsido tsi fatsi lucri arali aurãshti lunjina sh-nu yini la lunjina, tra s-nu s-aspunã faptili a lui. 21Ma cai fatsi alihea yini la lunjinã, tsi faptili a lui s-aspunã, cã suntu adrati tu Dumnidzãlu.”

Ioan Pãtidzãtorlu Mãrtirseashti Nãpoi trã Isusul

22Dupã atsea, Isusul vini cu ucenitsilji a lui tu loclu a Iudeiljei shi stãtu atsia deadun cu nãshi sh-pãtidza. 23Ma sh-Ioanul pãtidza la Enon, aproapi di Salim, cã aclo avea multã apã, shi oaminjilji yinea shi s-pãtidza. 24Atumtsea, Ioanul nu eara hãpsinit ninga. 25Deapoea s-apãrnji unã niachicãsiri namisa di ucenitsilji al Ioan sh-a unui Iudeu trã curarea. 26Sh-vinirã la Ioani sh-lji dzãsirã: “Rabbi, atsel tsi eara cu tini napãrti di Iordan, trã cai tini ai mãrtirsitã, ia, elu pãteadzã, sh-tuts yinã la elu.” 27Ioanul lj-apãndisi: “Un om nu poati s-ljea tsiva, macã nu lji-si easti datã dit tser. 28Voi idyilji hits martiri cãndu dzãsh: ‘Mini nu escu Hristolu, ma escu pitricut nãintea a lui.’ 29Atsel tsi ari nveasta easti dzinirli, ma oaspili a dzinirlui tsi lji-sta aproapi shi avdi, s-hãrseashti multu di boatsea a dzinirlui. Trã atsea haraua a mea easti mplinitã. 30Elu prindi s-creascã, iarã mini s-mi njicuredz. 31Atsel tsi yini di nsus easti pristi tuts. Atsel tsi yini dit loc, dit loc easti sh-di loc greashti. Atsel tsi yini dit tser easti pristi tuts. 32Sh-mãrtirseashti ti atsea tsi ari vidzutã sh-avdzãtã, ma vãrã nu u aproachi mãrtiria a lui. 33Atsel tsi u-apruche mãrtiria a lui, u-vulusi cã Dumnidzãlu easti alihios. 34Cã atsel tsi Dumnidzãlu ari pitricut, greashti zboarili a Dumnidzãlui, cã Dumnidzãlu nu lu da Duhlu fãrã mizurã. 35Tatãl lu va Hiljilu sh-tuti lji-li deadi tu mãnã. 36Atsel tsi pistipseashti tu Hiljilu ari banã eternã, ma atsel tsi arniseashti s-ascultã Hiljilu nu va veadã banã, ma nãrirea a Dumnidzãlui armãni pri nãsu.”

Currently Selected:

Ioan 3: BLRR

Highlight

Copy