Uvreilji 11
11
Prit Pisti
1Tora pistea easti sigurantsa a lucrilor tsi s-nãdãescu, sh-cãndãrsirea trã lucrili cai nu s-ved. 2Cã prit pisti loarã mãrtirii bunã vecljilji. 3Prit pisti aduchim cã dunjeaua easti adrat prit zborlu al Dumnidzãu, ashãtsi cã, atsea tsi s-veadi nu easti adrat di lucri tsi s-ved. 4Prit pisti Abel lji adusi al Dumnidzãu un curbani ma bun dicãt Cain. Elu prit pisti lo mãrtirii cã easti ndreptu, cãndu Dumnidzãlu mãrtirsi trã doarili a lui. Prit pisti, Abel, cu tutã cã ari murit, zburashti ninga. 5Prit pisti Enocu si strãmutã di aestã banã tra s-nu videa moartea sh-nu si aflã ma, cã Dumnidzãlu u strãmutã. Cã, ma nãinti tsi si strãmuta, avea loat mãrtirii cã lji avea arsit al Dumnidzãu.#Ahr 5:24. 6Fãrã di pisti easti niputut s-lji ariseshti a Dumnidzãlui, cã atsel tsi lji s-aproachi al Dumnidzãu, prindi s-pistipseascã cã Dumnidzãlu easti sh-arãsplãteashti atselji cai lu caftã. 7Prit pisti, cãndu Noe lo hãbari trã atseali lucri tsi ninga nu s-videa. Elu avãnda frica a Dumnidzãlui, adrã un pampor ti ascãpari casa a lui. Prit pisti elu condamnã lumea shi s-featsi mushtinitor a ndriptatiljei tsi yini prit pistea.
8Prit pisti cãndu s-acljimã Abrahamu, s-cãndãrsi tra si s-ducã cãtrã un loc trã loari mushtinirea sh-fudzi fãrã si shtibã cã iu njidzea. 9Prit pisti bãnã ca xen la loclu tãxit cum s-eara loc xen, bãnãnda tu tendi deadun cu Isacu sh-cu Iacovu, tsi eara deadun cu nãsu mushtinitori la idyia tãxiri, 10cã ashtipta cãsãbãlu cu thimelji, architectu sh-adãrãtor a cui easti Dumnidzãlu. 11Prit pisti sh-Sara cai eara stearpã sh-lji avea tricut chirolu a amintariljei, lo fuchii tra s-armãnea greauã, cã u lugursi pistimen atselu tsi lji tãxi. 12Trã atsea, dit un singur om, sh-aestã dit un om tsi eara ningã moarti, s-amintarã multsã dupãyinitori ca stealili a tserlui sh-ca arina ninumirat tsi easti ningã mealu di amari. 13Tuts aeshti murirã cu pisti, ni loat tãxirili, ma vidzãnda di diparti sh-salutãnda. Elji mãrtirsirã cã suntu xenji sh-tricãtor pri loc. 14Atselji cai grãiescu ahtãri zboari, aspunã cã caftã unã vãtani. 15Canda, dealihea s-avea tu minti atsea di la cai ishirã, va avea chiro si s-toarnã, 16ma tora, elji vor unã vãtani ma bunã, va s-dzãcã tsereascã. Trã atsea, a Dumnidzãlui nu lji yini rushãni di elji tsi s-acljeami Dumnidzãlu a lor, cã lã ari etimãsit a lor un cãsãbã. 17Prit pisti Abrahamul, cãndu s-bãgã tu provã, lji deadi ca curbani Isacul, sh-elu cai lo tãxirili, eara etimu s-lji dea hiljiu a lui atsel singurlu, 18cu tutã cã Dumnidzãlu lj-avea dzãsã: “Dit Isac va s-acljeamã dupãyinitura a ta.” 19Abrahamul minduea cã Dumnidzãlu eara putut tra s-nyea sh-dit mortsã, ashãtsi s-dzãtsem cã Abrahamul lo hiljlu a lui dit mortsã. 20Prit pisti Isacu ghinicuvãntã Iacovul sh-Esaul trã lucrili tsi va yinã. 21Prit pisti Iacovul, cãndu ma murea, ghinicuvãntã cathiunu di hiljilji al Iosif shi si ncljinã andupirat pri mãyeaua a bãstunlui a lui. 22Prit pisti Iosiful, tu bitisita a banãljei, adusi aminti ishirea a hiljilor di Israel sh-deadi ordin ti oasili a lui.
23Prit pisti Moisiu, dupã tsi s-amintã, s-ascumsi ti trei meshi di pãrintsãlji a lui, metsi vidzurã cã cilimeanlu eara mushat sh-nu avurã fricã ordinlu a amirãlui. 24Prit pisti Moisiul, cãndu s-featsi mari, arnisi tsi si s-acljeamã hiljiu a hiljiljei al Faraon. 25Elu aleapsi si munduea deadun cu populu a Dumnidzãlui, dicãt s-gusta ti shcurtu chiro hãrsirea a amãrtiiljei. 26Elu u lugursi pizuirea al Hristos ma mari aveari dicãt ayishtearili al Eghyptu, cã mutrea cãtrã arãsplãtirea. 27Prit pisti elu alãsã Eghyptu fãrã fricã di inatea al amirãlu, sh-armasi niminat, cã videa atselu cai eara nividzut. 28Prit pisti elu sãrbãtori Pashtili shi-pruscutirea a sãndzilui, cu nãeti tsi afãnsitorlu s-nu cãrtea prots-amintatslji al Israel. 29Prit pisti Israelitsi tricurã Amarea atsea Roshea, ca pri un loc uscat, ma cãndu vrurã Eghyptenjlji s-treacã, s-nicarã. 30Prit pisti cãdzurã murili al Ierico, dupã tsi Israelitslji lj-vinirã anvãrliga di shapti dzãli. 31Prit pisti putana Rahaba, nu chiru deadun cu atselji cai eara nicãndãrsitsi, cã ashtiptã spiunjlji cu pace.
32Tsi s-dzãc ma? Cã nu va nji agiundzea chirolu si aspuneam trã Ghideonu, trã Barac, trã Samson, trã Yefti, trã David, trã Samuel sh-trã prufitsilji. 33Prit pisti elji azvimsirã amirãrilji, featsirã ndriptati, agiumsirã tãxirili, astuparã gurili a ljundarilor, 34asteasirã fuchia a foclui, ascãparã di lipida a spatãljei, dit slaghi s-featsirã vãrtoshi, s-nvãrtushirã tu alumtã sh-azvimsirã oastili atseali xeni. 35Niscãnti muljeri loarã prit nyearea mortsãlji a lor, ma altsã s-tirãnsirã, cã arnisirã ascãparea tra s-agiundzea nyearea ti unã banã ma bunã. 36Iarã altsã trapsirã pizuiri sh-zãpãliri, meti prãnghi sh-hapsi. 37S-vãtãmarã cu chetsri, s-tãljearã cu priunã, murirã vãtãmats di spatã, alãgarã nviscuts cu cheali di oi sh-cu cheali di cãpri, hinda tu niaveari, suschirats sh-tirãnsits. 38Lumea nu eara axiu trã elji. Elji alãgarã prit irnjii, prit muntsã, prit pishtirei sh-prit gãvrili a loclui. 39Tuts aeshti, cu tutã cã loarã mãrtirii prit pisti, ninga nu loarã tãxirea, 40cã Dumnidzãlu prividzu trã noi tsiva ma bun, tsi elji s-nu agiungã la perfectsiuni fãrã di noi.
Currently Selected:
Uvreilji 11: BLRR
Highlight
Copy
Compare
Share
Want to have your highlights saved across all your devices? Sign up or sign in
