Galatsenji 5
5
Libertatea tu Hristolu
1Hristolu nã liberã tra s-him liberi. Stats vãrtoshi shi s-nu vã sumbãgats nãpoi sum giuglu a sclãyiiljei. 2Ia! Mini Pavlu ma vã dzãc, cã macã vã anvãrliga-tãljeats, Hristolu nu va s-vã axizeascã dip. 3Mini voi s-lji dimãnda a cuitsido tsi s-anvãrliga-talji si shtibã cã elu easti strimtu si mplineascã tutã legea. 4Voi tsi cãftats s-vã ndriptats prit legea hits dispãrtsãt di Hristolu sh-avets cãdzut dit harul. 5Cã tu Duh prit pistea noi ashtiptãm cu nãdii s-nã ndriptãm. 6Cã tu Hristolu Isus nu axizeashti nitsi anvãrliga-tãljearea sh-nitsi nianvãrliga-tãljearea, ma axizeashti mash pistea cai lucreadzã prit vrearea.
7Voi avets alãgat ghini. Cai vã nchidicã tra s-nu vã cãndãrsits a alihiljei? 8Aestã cãndãrsiri nu yini di atsel tsi vã acljeamã. 9Putsãn mãeauã lipseashti tra s-yinã tut aloatlu. 10Mini escu pistimen tu Domnul cã voi nu va s-minduits altã soi. Ma atsel tsi vã tulburã, caitsido s-hibã va s-ljea condamna a lui. 11Macã mini, frats shi surãri, dimãndu ninga anvãrliga-tãljearea, cãtse escu tora priaĝunit? Atumtsea crutsea a Hristolui nu va eara ma ncheadic. 12Va s-vream si sãcãtipseascã atselji tsi vã tulburã. 13Voi, frats sh-surãri, hits acljimats s-hits liberi. Ma nu u ufilisits aestã libertati tra si-mplinits orixili a truplui, ma ma ghini s-lji-huzmitipsits a un alantui cu vreari. 14Cã tutã legea easti priadunatã tu aestã dimãndari: “S-vrei aproapilu ca bana a ta.” 15Macã voi mãshcats sh-mãcats un alantu, afirits-vã tra s-nu vã afãnisits di un-alantu.
Faptili a Truplui sh-Frutili a Duhlui
16Trã atsea vã dzãc: imnats tu Duh, sh-ashãtsi nu va s-mplinits orixili a truplui. 17Cã orixili a truplui suntu contra a Duhlui, sh-Duhlu easti contra a orixilor a truplui. Elji ncuntreadzã un alantu sh-ashãtsi voi nu putets s-fãtsets atsea tsi vrets. 18Macã voi vã cãlãuzits di Duhlu, nu hits sum legea. 19Faptili a truplui suntu vidzuti: putãnsirea, lãvushiturã, disfrãnarea, 20idulatria, mãyiia, dushmãnilji, ngrãnji, nchizmã, nãriri, ambitsili egoisti, dispãrtsãrili, ereziili, 21zilii, mbitãrili, chehili disfrãnati sh-alti ca aesti. Mini vã prihãbãrsescu, cum vã am dzãs sh-ma nãinti, cã atselji tsi fac ahtãri lucri nu va s-mushtineadzã amirãriljea a Dumnidzãlui. 22Ma frutlu a Duhlui easti, vrearea, haraua, pacea, arãvdarea, imireatsa, bunã-vrearea, pistimeniljea, 23frunimeatsa sh-contsãnearea. Contra atsilor nu ari lege. 24Atselji tsi suntu tu Hristolu Isus lu au crutsisit truplu cu pasiunili sh-orixili a lui. 25Macã bãnãm tu Duh, prindi s-imnãm dupã Duhlu. 26S-nu nã alãvdãm cu cãrteari shi s-nu him nchizmataric cu un alantu.
Currently Selected:
Galatsenji 5: BLRR
Highlight
Copy
Compare
Share
Want to have your highlights saved across all your devices? Sign up or sign in
