Efesienji 1
1
1Mini Pavlu, apostul al Hristolu Isus prit vrearea a Dumnidzãlui, ma lji scriu a popului a Dumnidzãlui cai easti tu Efes sh-pistipseashti tu Hristolu Isus:
2Har sh-pace s-avets di la Dumnidzãlu, Tatãl a nostru sh-di la Domnul Isus Hristos.
Ghinicuvintãrili a Dumnidzãlui tu Hristolu
3Alãvdat s-hibã Dumnidzãlu sh-Tatãl a Domnului a nostru Isus Hristos. Elu nã ari ghinicuvintat prit Hristolu tu locurili tsereshti cu cathi ghinicuvintari sufliteascã. 4Dumnidzãlu nã aleapsi nãinti di thimiljiusirea a lumiljei tu nãsu tra s-him sãmtsã sh-fãrã cusuri nãintea a lui, tu vrearea a lui. 5Elu nã arãdãpsi tra s-himã hiljashtsrã prit Isus Hristos cu arsirea sh-vrearea a lui, 6tsi noi s-lu alãvdãm trã harul a lui mãrit tsi nã durusi tu vreari trã Hiljilu a lui. 7Elu nã arãscumpãrã prit sãndzili a lui sh-nã li ljirtã amãrtiili dupã avearili a harului a lui. 8Aestu har elu nã lu ari dat cu artirsiri, cu frunimeatsã sh-cu mintimenilji. 9Elu nã featsi cunuscut mistiryiul a vreariljei a lui dupã arsirea a lui, tsi elu u-avea arãdãpsitã tu Hristolu. 10Aestu mistiryiu elu va lu mplinea tu chirolu tsi prindea, tra s-li adunã tuti lucrili sum Hristolu, cum atseali tsi suntu tu tseruri sh-atseali tsi suntu pri loc. 11Tu Hristolu noi nã aleapsim, tra s-nã arãdãpsim dupã scupolu atsilui tsi lã fatsi itsido dupã urnimia a vreariljei a lui. 12Ashãtsi noi tsi avem nãdãit ma nãinti tu Hristolu, s-adutsem alãvdarea a mãririljei a lui. 13Tutashã, sh-voi earat mpriunat tu Hristolu cãndu avdzãtã zborlu a alihiljei, evanghelu a ascãpariljei a voastrã. Cãndu voi pistipsit, vã vulusit cu Duhlu Sãmtu, cai eara tãxit. 14Aestu Duh easti cãpara a mushtiniriljei a noastrã, trã arãscumpãrarea atsilor cai suntu a Dumnidzãlui sh-trã alãvdarea a mãririljei a lui.
Rugãciuni trã Frunimeatsã sh-Discupiriri
15Trã aestã, di cãndu avdzãi di pistea a voastrã tu Domnul Isus sh-ti vrearea a voastrã tsi avets trã tut populu a Dumnidzãlui, 16nu pãpsescu ti hãristisiri Dumnidzãlu trã voi, aducãnda-vã aminti tu rugãciunjili a meali, 17tsi Dumnidzãlu a Domnului a nostru Isus Hristos, Tatãl a mãririljei, s-vã da a voauã Duhlu a frunimeatsiljei sh-a discupiririljei tra s-putets s-lu cunushtets atsel ma ghini. 18Mi rog s-vã lunjineadzã ocljilji a ininjilor a voastri, tra s-cunushtets nãdia trã cai vã acljimã, s-cunushtets avearea a mushtiniriljei alãvdatã trã populu a Dumnidzãlui, 19sh-cãt mari easti putearea a lui cãtrã noi tsi pistipsim tu nãsu. Aestã fuchii easti idyia puteari a Dumnidzãlui tsi lucreadzã tu noi. 20Easti aestã puteari cu cai elu nyie Hristolu dit mortsã sh-lu bãgã tu nandreapta a thronlui a lui tu locurili tsereshti, 21lu bãgã pristi cathi stãpuiri sh-puteari, pristi cathi fuchii sh-domnilji sh-pristi cathi numã tsi s-cunoashti nu mash tu aestã etã, ma sh-tu atsea tsi va yinã. 22Dumnidzãlu sumbãgã itsido sum cicioarili a Hristolui sh-lu bãgã ca cap pristi tuti la bisearicã. 23Bisearica easti truplu a Hristolui, mplinirea a lui tsi mplineashti itsido la tuti.
Currently Selected:
Efesienji 1: BLRR
Highlight
Copy
Compare
Share
Want to have your highlights saved across all your devices? Sign up or sign in
