Colosianji 3
3
Urnimii trã Sãmtsãri sh-trã Vrearea Frãtseascã
1Trã atsea, macã vã nyeat cu Hristolu, cãftats atseali di nsus, iu Hristolu easti apunat tu nandreapta a Dumnidzãlui. 2Minduits trã atseali di nsus, nu trã atseali di pri loc, 3cã avets murit sh-bana a voastrã easti ascumtã deadun cu Hristolu tu Dumnidzã. 4Cãndu va s-aspunã Hristolu, cai easti bana voastrã, atumtsea va vã aspunets sh-voi tu mãriri deadun cu nãsu. 5Trã atsea fãtsets s-moarã orixili a voastri pri loc: curvãriljea, disfrãnarea, orixili atseali arali, chehili atseali arali sh-tãmãchearlãchili, cai easti idulatria. 6Trã tuti aesti yini inatea a Dumnidzãlui pristi hiljilji a niascultariljei. 7Tu aestã cali avets imnat sh-voi, cãndu bãnat tu eali. 8Ma tora, arucats hima sh-voi tuti aesti: nãrirea, inatea, arãutatea, ngiurarea shi zboarili atseali lãvoasi dit gura a voastrã. 9Nu arãdets un-alantu, cã voi lu dizviscut omlu atsel vecljiul deadun cu faptili a lui, 10sh-nviscut omlu atsel noulu tsi easti rinoit tu cunushtearea dupã icoana atsilui cai lu adrã. 11Trã atsea nu ari ma Elinji sh-Iudei, anvãrliga-tãljeari sh-nianvãrliga-tãljeari, barbari shi Schithi, sclayi sh-liberi, ma itsido sh-tu iutsido easti Hristolu.
12Nvishtets-vã ca aleptsã a Dumnidzãlui, sãmtsã sh-vruts cu njila a dorlui, cu bunãtati, cu tãpinii, cu frunimeatsã sh-cu arãvdari. 13Arãvdats-lu sh-ljirtats-lu un-alantu, macã un ari vãrã tsiva contra a vãrui, ashãtsi di cum Domnul vã ari ljirtatã, ashãtsi fãtsets sh-voi. 14Pristi tuti aesti, nvishtets vrearea, tsi easti ligãtura a perfectsionariljei! 15Pacea a Hristolui trã cai voi fut acljimat tu un singur trup, s-domneascã tu ininjli a voastri shi s-hits hãristisitori. 16Zborlu a Hristolui s-bãneadzã tu voi cu bulãchi, cu cathi frunimeatsã nvitsãnda sh-urnipsinda un-alantu cu psalnji, imnuri sh-cãntitsi duhuroasi, sh-cãntãnda al Dumnidzãu cu har tu ininjili a voastri. 17Itsido tsi fãtsets, cu zbor icã cu fapti, fãtsets-li tu numa a Domnului Isus, hãristisinda prit nãsu Dumnidzãlu Tatãl.
Dimãndãciunji trã Casã
18Voi muljeri, s-hits sumbãgati a bãrbatslor a voshtri, ashãtsi cum vã ari hari tu Domnul. 19Voi bãrbatsi, s-li vrets muljerili a voastri sh-nu vã fãtsets amãroshi cu nãsi. 20Voi cilimenji ascultats pãrintsãlji a voshtri tu tuti, cã aestã easti arsitã di Domnul. 21Voi pãrintsã, nu lã nãrãits cilimenjlji a voshtri, tra s-nu chearã curaiulu. 22Voi sclayi, ascultats tu itsido nicuchirlji a voshtri tu trup, huzmitipsinda nu mash nãintea a ocljilor a lor tra s-lã arsits a lor, ma cu tãpinia a inimãljei, avãnda fricã di Domnul. 23Itsido tsi fãtsets, s-u fãtsets cu tutã inimã ca trã Domnul, nu ca trã oaminjlji, 24shtinda cã di la Domnul va loats arãsplata a mushtiniriljei. Huzmitipsits-lji a Domnului Hristos. 25Iarã atsel tsi fatsi nindriptati va ljea plata trã tuti nindriptatili tsi ari faptã. Dumnidzãlu nu tsãni cu hãtãri.
Currently Selected:
Colosianji 3: BLRR
Highlight
Copy
Compare
Share
Want to have your highlights saved across all your devices? Sign up or sign in
