Faptili 26
26
1Agripa lj-dzãsi al Pavlu: “Tini ai ndreptul si zburashti.” Pavlu sculã mãna shi ahurhi apãrarea a lui: 2“Mini escu hãros tsi s-mi apãrã azã nãintea a ta, amirã Agripa, di tuti acuzãli a Iudeilor contra mini, 3cã ma multu tini li cunoshti ghini adetsili sh-ngrãnjili a Iudeilor. Trã atsea, tsã fac rigeai s-mi avdzã cu arãvdari. 4Tuts Iudeilji shtiu cã cum am bãnat di njicu, dit ahurhita a banãljei a mea tu loclu a meu sh-tut ashã tu Ierusalem. 5Elji mi cunoscu di multu chiro sh-pot s-mãrtirseascã cã mini earam parti di sectul ma strictu a pistiljei a noastrã sh-cum am bãnat ca un Fariseu. 6Iarã tora stau aoa tra s-mi giudic cã nãdãescu tu tãxirea a Dumnidzãlui cãtrã pãrintsãlji a noshtri, 7tsi doisprãdzatsi fãrili a noastri nãdãescu s-agiungã, alãvdãnda Dumnidzãlu dzuã sh-noapti cu arãvdari. Trã aestã itii escu cãtigursit di Iudeilji, amirã Agripa. 8Cãtse vã-si pari nipistipsit a voauã cã Dumnidzãlu lji nyeadzã mortsãlji? 9Shi mini idyiul am minduit cã prindi s-fãtseam itsido tsi puteam contra a numãljei al Isus Nazareanlu. 10Sh-atsea u-am faptã tu Ierusalem. Cu autoritatea tsi nj-deadirã arhipreftsãlji am arcat tu hapsi multsã di sãmtsãlji shi am dat vota cãndu elji s-condamnarã cu moarti. 11Di multi ori tu tuti sinagodzãli escu cilistisit tsi cu zori s-lji stringu s-aleapid pistea a lor, sh-cu mari inati lji am priaĝunit pãnã tu cãsãbadzli xeani. 12Ashãtsi mi nchisii cãtrã Damascu avãnda autoritatea sh-voljea a arhipreftsãlor. 13Pri cali cãtrã njeadzã-dzuã, amirã Agripa, vidzui unã lunjinã dit tser, tsi eara ma strãlutsit di soarili, tsi strãlutsi anvãrliga di mini sh-anvãrliga di atselji cai eara cu mini. 14Cãdzum tuts mpadi sh-mini avdzãi unã boatsi tsi dzãtsea pi uvreascã: ‘Saul, Saul, cãtse mi priaĝuneshti? Easti greu trã voi s-agudits cu scoatsi contra a perunãljei.’ 15Mini ntribai: ‘Cai eshti tini, Doamne?’ Domnul nj-apãndisi: ‘Mini escu Isusul tsi tini lu priaĝuneshti. 16Tora scoalã-ti shi shedz pri cicioari. Mi aspush tra s-ti arãdãpsescu huzmichearlu a meu shi s-mãrtirseshti atseali tsi vidzush sh-atseali tsi va ts-aspun a tsãia. 17Mini va ti apãrã sh-di populu a tãu sh-di pãngãnjlji iu ma ti pitrec tora. 18Tini va s-lã discljidzi ocljilji a lor tra s-toarnã di tu scutidi tu lunjinã sh-di tu putearea a Satanlui tu Dumnidzã. Ashãtsi cu pistea la mini va ljea ljirtarea a amãrtiilor sh-mushtinirea namisa di sãmtsãlji.’ 19Dupã aestã, amirã Agripa, nu mi feciu nicãndãrsit nãintea a viziuniljei tsereascã. 20Apãrnjii s-preadicã ma nãinti atsilor di Damasc sh-deapoea atsilor tu Ierusalem sh-tu tut loclu a Iudeiljei, shi a pãngãnjilor, cã elji prindi s-mitãnjiuseascã shi si s-toarnã la Dumnidzãlu fãcãnda fapti axiusiti di mitãnjiusiri. 21Di aestã itii Iudeilji mi acãtsarã tu templu sh-cãftarã s-mi vãtãma. 22Pãnã azã mi ari agiutat Dumnidzãlu sh-mini escu aoa trã dari mãrtirii la mãrlji sh-la njitslji. Mini nu dzãc tsiva altu di-cãt atseali tsi dzãsirã prufitsilji sh-Moisiu cã va s-undzea, 23cã Hristolu va si s-munduea, sh-va s-nyia protlu dit mortsã sh-deapoea va dimãnda lunjina a popului sh-a pãngãnjilor.”
24Iarã Pavlu ma dzãtsea aesti zboari trã apãrarea a lui, Festul dzãsi cu boatsi analtã: “Eshti zurlu Pavle! Nvitsãturili atseali multi ti au zurlitã.” 25Ma Pavlu dzãsi: “Mini nu escu zurlu, multu bune Feste, ma dzãc zboari di-alihea sh-di mintimenilji. 26Amirãlu li shtii ghini aesti lucri, trã atsea mini zburãscu discljis cu nãsu. Escu sigur cã vãrã di aesti lucri nu easti nicunuscut trã nãsu, cã nu suntu fapti pi ascumtu. 27Amirã Agripa, pistipseshti tini tu prufits? Mini shtiu cã tini pistipseshti.” 28Atumtsea Agripa lj-dzãsi al Pavlu: “Ninga putsãn sh-va mi cãndãrseshti sh-mini s-mi fac Crishtin.” 29Pavlu lji apãndisi: “Mini lj-fac rigeai a Dumnidzãlui cã curund icã amãnat nu mash tini ma sh-tuts atselji tsi ma mi ascultã azã s-facã ca mini, ma ni-fãrã aesti prãnghi.” 30Atumtsea amirãlu, guvernatorlu, Bernica sh-tuts atselji cai eara apunat cu nãshi si scularã. 31Cãndu ma fudzea dzãtsea cu un-alantu: “Aestu om nu ari faptã tsiva tra s-axizeascã moartea icã hapsea.” 32Atumtsea Agripa lj-dzãsi al Festu: “Aestu om putea s-eara liberat, macã nu va eara faptã apel al Cezaru.”
