Faptili 24
24
Pavlu Nãintea al Felix
1Dupã tsintsi dzãli vinirã nghios tu Cesarea Anania arhipreftul cu niscãntsã aushi sh-cu un avucat cu numa Tertul. Elji lji spusirã a guvernatorlui tsi avea contra al Pavlu. 2Cãndu Pavlu s-acljimã nãuntru, Tertulu apãrnji acuza contra a lui dzãcãnda: “Multu-tinjisit Felix, prit tini noi avem avut pace ti multu chiro sh-cu cãshtiga a ta suntu fapti reformi mãri trã aestu popul. 3Noi apruchem cu hãristisiri aestã iutsido sh-totãna. 4Ma, ni vrut s-ti tsãn multu, tsã fac rigeai cu a ta bunãtati s-nã ascultsã ti ndoauã zboari. 5Noi avem vidzut aestu om tsi fatsi mintituri, sh-lji pindzi Iudeilji trã rebilipsiri tu tutã lumea. Elu easti caplu a sectului a Nazareanjilor. 6Elu s-cilistisi s-pãngãnea templu, ma noi lu acãtsãm. 7[Ma vini tribunlu Lisia, sh-lu lo cu zori di mãnjili a noastri.] 8Tini giudicãnda, va pots s-nvetsi di la nãsu itsido trã cai ma lu acuzãm.” 9Cu aestã acuzã s-featsirã deadun sh-alantsã Iudei sh-dzãsirã cã lucrili ashãtsi suntu.
10Cãndu guvernatorlu lj-featsi semnu al Pavlu, elu apãndisi: “Mini shtiu cã di mults anji eshti giudicãtor a popului a nostru, trã atsea pistipsescu la tini trã apãrarea a mea. 11Tini pots s-nvets lishor cã nu suntu ma multu di doisprãdzatsi di dzãli di cãndu mi alinai tu Ierusalem trã alãvdari. 12Aeshti nu mi au aflatã ngrãnjinda cu vãrã tu templu, icã sculãnda multsãmea tu sinagodzi icã iuva tu cãsãbã. 13Elji nu pot s-alihipseascã acuzãli tsi nji li fac tora a njia. 14Mini mãrtirsescu cã mãrescu Dumnidzãlu a pãrintsãlor a noshtri dupã Calea, tsi elji u-acljeam sect. Mini pistipsescu tu itsido tsi esti scriat tu Lege sh-tu itsido tsi easti scriat la Prufitsilji. 15Mini am idyia nãdii tu Dumnidzãlu di cum aeshti oaminji, cã ndreptsãlji sh-nindreptsãlji va s-nyeadzã. 16Trã aestã totãna caftu s-am conshtintsã curatã nãintea a Dumnidzãlui sh-nãintea a tuts oaminjlor. 17Tora dupã multsã anji mi turnai tu Ierusalem trã adutseari agiutãri a popului a meu sh-trã curbãnsiri trã Dumnidzãlu. 18Cãndu Iudeilji mi aflarã tu uborlu a templui, mini earam curat cum prindi. Aclo nu avea nitsi multsãmi sh-nitsi mintiturã. 19Aclo eara niscãntsã Iudei di Asia, tsi prindi s-ishea nãintea a ta shi s-mi acuza, macã avea tsiva contra mini, 20icã aeshti cai suntu aoa prindi sã spunã tsi nindriptati aflarã la mini cãndu stãteam nãintea a Sinedriului. 21Mini mi giudicã mash di un zbor tsi mini dzãsh cu boatsi analtã nãintea a lor: ‘Mini ma mi giudic azã di voi cã pistipsescu tu nyearea a mortsãlor.’” 22Ma Felixul, cai cunushtea ghini Calea, amãnã giudicarea, dzãcãnda: “Cãndu s-dipunã di Ierusalem tribunlu Lisia, va s-ljea apofãsi trã lucrul a vostru.” 23Deapoea elu ursi tsenturionlu s-veaglji Pavlul, ma s-lji dãdea putsãn libertati shi s-lu alãsa s-aduna cu sotslji a lui s-lji huzmitipsea tu ananghili a lui.
24Dupã niscãnti dzãli, cãndu vini Felixul cu muljearea a lui, Drusila, tsi eara uvreauã, acljimã Pavlul shi avdzã di la nãsu trã pistea a Hristolui Isus. 25Cãndu Pavlu grãi trã ndriptatea, contsãnearea sh-trã giudicata tsi ma yini, Felixul s-aspãrã shi lj-dzãsi: “Tora, pots s-ti duts. Va ti acljem cãndu s-am chiro.” 26Tu aestã oarã, Felixul avea nãdii cã Pavlul va lj-dãdea pãradzi a lui, trã atsea lu acljima di multi ori shi zbura cu nãsu. 27Cum tricurã doi anji, dupã Felixul vini Portsiu Festi. Metsi Felixul vrea s-lj fãtsea tinjii a Iudeilor, alãsã Pavlul tu hapsi.
