2 Corintenji 12
12
Viziunea al Pavlu sh-Discupiririli
1Prindi s-mi alavdu! Cu tutã cã nu axizeashti, va yin la viziunili sh-la discupiririli di la Domnul. 2Cunoscu un om tu Hristos, cai patrusprãdzatsi di anji ma nãinti fu arãchit pãnã tu a treilu tser, cã eara tu trup icã nafoarã di trup nu u shtiu, aestã Dumnidzãlu u shtii. 3Shi shtiu cã atsel om, nu shtiu eara tu trup icã nafoarã di trup, aestã Dumnidzãlu u shtii, 4s-arãchi tu paradis sh-avdzã lucruri ni-spusi, cai nu suntu lipsiti trã un om s-li zburãscã. 5Trã un ahtar om va mi alavdu, iarã trã mini nu va mi alavdu, dicãt mash trã slãbintsãli a meali. 6Sh-ca s-vream s-mi alãvdam, nu va eram zurlu, cã va dzãtseam alihea. Ma nu ma u dzãc tra s-nu mindueascã tsiniva trã mini nafoarã di atsea tsi veadi sh-avdi di la mini, 7trã itia a discupiririlor atsilor mãri. Trã atsea, tra s-nu mi alãvdam, nji si deadi un schin tu trup, un anghil di la Satan tra s-mi agudea, tsi mini s-nu mi alãvdam. 8Ti aestã mi rugai di trei ori a Domnului, tsi elu s-lu dipãrta di la mini. 9Ma Domnul nji dzãsi: “Ts-agiundzi harul a meu, cã putearea a mea s-fatsi perfectã tu slãbintsã.” Cu multã harauã va mi alavdu ma multu tu slãbintsãli a meali, cu nãeti tsi putearea a Hristolui s-armãnã tu mini. 10Trã atsea, trã itia a Hristolui, mi hãrsescu tu slãbintsã, tu ngiurari, tu ananghi, tu priaĝuniri sh-tu strimturi, cã cãntsido tsi escu slabu, atumtsea escu vãrtos.
Pavlu Mindueashti trã Corintenji
11Escu faptu zurlu! Voi mi strimtu, cã mini prindea s-earam alãvdat di la voi, cã tu tsiva nu armash ma nghios dicãt apostulji cai suntu tu frãmti, cu tutã cã nu escu tsiva. 12Dealihea seamnili a unui apostul s-featsirã ntru voi cu cathi arãvdari, cu seamni, cu thavmati sh-cu fapti pututi. 13Cum fut voi ma nghios di alti biseritsi, mash cã mini nu fui sartsinã di voi? Ljirtats-mi ti aestã nindriptati!
14Ia, aestã easti a treia oarã tsi escu etimu s-yin la voi sh-nu va mi fac sartsinã, cã nu caftu lucrili a voastri, ma caftu voi. Cã nu easti borgea a cilimenjilor s-adunã ayishteari ti pãrintsãlji, ma pãrintsãlji ti cilimenjlji. 15Mini cu multã harauã hãrgiuescu sh-va mi hãrgiuescu ntreg trã suflitli a voastri. Macã mini vã voi multu sh-ma multu, atumtsea voi mi vrets ma putsãn? 16Ma cumtsido s-hibã, mini nu vã ngãrcai, ma hinda cã escu hitru, vã acãtsai cu ilei. 17Nacã am amintat tsiva di la voi prit vãrã di atselji tsi vã-am pitricut? 18Lji feciu rigeai al Titu s-yinea sh-deadun cu nãsu pitricui sh-fratili a nostru. Nacã amintã tsiva Titul di la voi? Nu imnãm noi tu idyili urmi prit idyiul Duh? 19Di multu chiro vã si pari cã ma nã apãrãm nãintea a voastrã? Noi zburãm nãintea a Dumnidzãlui ca atselji tu Hristolu. Sh-tuti aesti tsi fãtsem, multu-vruts, suntu trã nvãrtushirea a voastrã. 20Cã am fricã cã, vahi cãndu s-yin, va vã aflã ashã cum nu va vream, sh-voi va mi aflats ashã cum nu va vreats, s-aibã ngrãnji, nchizmã, inãtsi, ambitsii egoisti, cacu-zburãri, pushpurari, fuduleatsã sh-mintituri. 21Mi-aspar cã cãndu va yin dinou, Dumnidzãlu a meu va mi tãpinuseascã nãintea a voastrã sh-mini va plãngu ti multsã di atselji cai au amãrtisitã ma nãinti sh-nu s-mitãnjiusirã di lãvushitura, putãnsirea sh-disfrãnarea la cai s-au mplãtitã.
Currently Selected:
2 Corintenji 12: BLRR
Highlight
Copy
Compare
Share
Want to have your highlights saved across all your devices? Sign up or sign in
