1 Sãruna 2
2
Huzmitipsirea al Pavlu Sãruna
1Voi idyilji, frats sh-surãri, shtits cã vinita a noastrã la voi nu eara digeaba. 2Ma dupã tsi nã munduim ma nãinti sh-nã tirãnsirã tu Filipii, ashã cum shtits, lom curaiu di la Dumnidzãlu a nostru s-dimãndãm trã voi evanghelu a Dumnidzãlui cu tutã cã avum multã ncuntrari.#Fap 16:19-24; 17:1-9. 3Cã inimusirea a noastrã nu yini di arãdeari, nitsi di nicurãtsii, nitsi di la ileili, 4ma, hiinda cã nã aprovãm di la Dumnidzãlu tsi s-nã si pistipseascã evanghelu, ashãtsi noi grim nu tra si arãsim a oaminjlor, ma a Dumnidzãlui, tsi veadi ininjli a noastri. 5Cã, nu avem ufilisit pute, cum shtits, zboari trã alãvdari, sh-nitsi nu earam tãmãcheari, Dumnidzãlu easti martir trã noi. 6Noi nu avem cãftatã mãriri di la oaminjlji, nitsi di la voi, nitsi di la altsã, 7cã va nã fãtseam sartsinã a voauã ca apostulji a Hristolui. Noi earam moali cu voi, ashãtsi ca muma tsi ari cãshtigã trã cilimenjlji a ljei. 8Ashãtsi avãnda unã vreari mari trã voi, nã arsi s-vã dãm nu mash evanghelu a Dumnidzãlui, ma sh-suflitli a noastri, cã nã si featsit vruts. 9Voi, frats sh-surãri, vã adutsets aminti apustusirea sh-munduirea a noastrã. Lucrãm noapti sh-dzuã tra s-nu lji him sartsinã a vãrui di voi sh-dimãndãm evanghelu a Dumnidzãlui la voi. 10Voi sh-Dumnidzãlu hits martiri, cã cum him aspus sãmtsã, ndreptsã sh-fãrã cusuri cu voi tsi pistipsits. 11Voi shtits, cum him aspus cu cathiun di voi ca tatãli cu cilimenjlji a lui. 12Vã avem urnipsit, vã avem dat curaiu, vã him spigiurat s-fãtsets unã banã cu tinjii cãtrã Dumnidzãlu, tsi vã grãi tu amirãriljea sh-tu mãrirea a lui.
13Trã atsea sh-noi hãristisim fãrã pãpsiri Dumnidzãlu, tsi cãndu loatã zborlu a Dumnidzãlui, tsi avdzãtã di la noi, lu ashtiptat nu ca zbor di oaminji, ma, cum easti di-alihea, ca zbor di la Dumnidzã, tsi lucreadzã tu voi tsi pistipsits. 14Cã voi, frats sh-surãri, vã featsit imitatorlji a biseritslor a Dumnidzãlui tu Iudea, tsi suntu tu Isus Hristos, cã sh-voi hits munduits di partea a compatriotsilor a voshtri ashã cum sh-elji pãtsãr di Iudeilji, 15tsi vãtãmarã sh-Domnul Isus sh-prufitsilji, sh-nã priaĝunirã sh-noi. Elji nu s-arsescu di Dumnidzãlu, sh-suntu neamitsi cu tuts oaminjlji, 16nchidicãnda a noauã tsi si-u grim a pãngãnjilor tsi elji s-ascapã, tra si mplineascã totãna misura a amãrtiilor a lor. Ma nãrirea agiumsi pri nãshi.
Dorlu al Pavlu tra s-Veadã Atselji di Sãruna
17Sh-noi, frats sh-surãri, cãndu armasim fãrã di voi ti shcurtu chiro, cu fatsã ma nu cu inimã, nã cilistisim ma multu cu mari dor, s-videm dinou fatsa a voastrã. 18Trã atsea vrum s-yineam la voi, ma multu mini Pavlu unã oarã sh-ninga unã oarã, ma Satanlu nã nchidicã. 19Cai easti nãdia a noastrã, haraua a noastrã, icã curuna a alãvdariljei nãintea a Domnului a nostru Isus Hristos tu vinita a lui? Nu hits idyilji voi? 20Cã voi hits alãvdarea sh-haraua a noastrã.
Currently Selected:
1 Sãruna 2: BLRR
Highlight
Copy
Compare
Share
Want to have your highlights saved across all your devices? Sign up or sign in
