إنجيل يوحنا 8

1أما يسوع، راح لجبل الزيتون.

2ورجع عند الفجر للهيكل، وأتجمع حولينه ناس من الشعب، وصار يعلمهم. 3وجابولو معلمين الشريعة والفرسيين حرمة مسكوها وهي تزني، وخلوها توقف في الوسط 4وقالولو:« يا معلم ، هادي الحرمة انمسكت وهي تزني. 5واحنا وصانا موسى في شريعتو إننا نرجم اللي زييها بالحجاره، فإيش تقول انت؟» 6سألوه علشان يحرجوه ويلاقوا تهمه يحاكموا فيها. اما هو انحنى وصار يكتب على الأرض. 7وفضلوا يلحوا عليه بالسؤال: فعدّل نفسه وقاللهم: اللي منكم ما عندو خطئية خللي يرميها بحجر في الأول 8رجع انحنى وصار يكتب على الأرض 9لمن سمعوا كلامه انسحبوا واحد ورا التاني، الشيوخ أول شي وبقي يسوع لحالة، والحرمة واقفة في مكانها. 10فعدل نفسه وقال لها:« فينهم يا حرمة؟ مافي واحد منهم يحكم عليكي؟» 11فردت عليه: «ولا واحد يا سيد». فقاللها: «وأنا كمان ما احكم عليكي. روحي ولا ترجعي تخطئي!»

صحة شهادة يسوع

12وخطب فيهم يسوع كمان وقال: «أنا نور العالم اللي يتبعني ما رح يتخبط في الضلام لكن راح يكون له نور الحياه». 13اعترض الفرسيين عليه وقالوا: «انت داحين تشهد لنفسك وشهادتك ما تجوز». 14فرد عليهم: «صحيح أنا أشهد لنفسي بس شهادتي صحيحه، لأني أعرف من فين جيت ولفين رايح، بس انتوا ما تعرفوا من فين جيتوا ولا لفين رايحين. 15علشان كدا تحكموا علي كبشر، أما أنا ما أحكم على أحد. 16ولو أنا حكمت راح يكون حكمي عادل، لأنو ما أحكم لوحدي، لأني احكم أنا والأب اللي أرسلني. 17ومكتوب في شريعتكم أنو شهادة شاهدين تكون صحيحه: 18وأنا اشهد لنفسي ويشهدلي الأب اللي أرسلني ». 19فسألوه: «فين أبوك؟» فرد عليهم: أنتوا «ما تعرفوني، ولا تعرفوا أبويا. ولو أنتو عرفتوني راح تعرفوا أبويا كمان».

20يسوع قال هادا الكلام في الهكيل عند صندوق التقدمات. وما في أحد قبض عليه، لأنو ساعتو لسه ما جات.

مصيراللي ما يآمن

21وبعدين قاللهم يسوع: «أنا رايح وأنتوا رح تدورا ورايا بس انتوا ما رح تقدروا تيجوا للمكان اللي رح أكون فيه. وأكيد رح تموتوا في خطاياكم». 22وصار اليهود يفكروا: ايش قصدة لمن يقول ما تقدروا تيجوا للمكان اللي رح أكون فيه؟ هل راح يقتل نفسه ؟ 23وكان رده: انتوا من تحت بس أنا من فوق انتوا من هادا العالم بس أنا مو منو 24علشان كدا قلتلكم: راح تموتوا في خطاياكم اذا ما تآمنوا اني أنا هو، راح تموتوا في خطاياكم 25وسألوه: مين انتا؟ رد عليهم يسوع: قلتلكم من البداية! 26وعندي حاجات كتيره أقولها وأحكم عليكم فيها. لكن اللي أرسلني هو حق، واللي أقوله للناس هو اللي سمعته منو. 27وما فهموا أنويسوع بكلامه هادا كان قصده عن الأب. 28علشان كدا قالهم يسوع: «لمن تعلقوا ابن الأنسان رح تعرفوا اني أنا هو، واني ما أسوي شي من نفسي، لكني أقول الكلام اللي علمني هو أبويا. 29اللي ارسلني هو معايا وما يتركني وحدي، لأني دايما أسوي اللي يرضيه».

30ولمن كان يسوع يتكلم بهادا الكلام، آمن فيه ناس كتيرين.

عيال ابراهيم

31فقال لليهود اللي أمنوا فيه: اذا تثبتوا على كلامي راح تكونوا بجد تلاميذِي. 32وتعرفوا الحق، والحق راح يحرركم 33فرد اليهود: «احنا أحفاد ابراهيم وما كنا عبيد عند أحد! كيف تقوللنا: انكم راح تصيروا أحرار؟» 34فرد يسوع الحقيقة الحقيقة أقوللكم: انوا اللي يسوي الخطيئة يصير عبد لها. 35والعبد ما يفضل في بيت سيدو دايما، بس الأبن يعيش فيه للأبد 36اذا حرركم الإبن راح تصيروا بجد أحرار. 37انا أعرف انكم أحفاد ابراهيم. بس انتوا تبغوا تقتلوني، لأنو كلامي مو داخل قلوبكم ولا عاجبكم 38لأني اتكلم باللي شفته عند الأب، وانتوا تسووا باللي سمعتوا من أبوكم. 39فاعترضوا وقالوأ: «ابراهيم هو أبونا!» فقال: لو انكم أولاد ابراهيم كان سويتوا أعمال ابراهيم « 40بس انتو تبغوا تقتلوني وأنا انسان كلمتكم بالحقيقة اللي سمعتها من الله. وهادا الشي ابراهيم ما سواه. 41انتوا تسوا أعمال أبوكم!» قاللولوا: «إحنا مو أولاد زنى! عندنا أب واحد هو الله».

عيال ابليس

42فقال يسوع: لو كان الله أبوكم كنتوا حتحبوني، لأني خرجت وجيت من عند الله. ما جيت من نفسي، الله هو اللي أرسلني. 43ليش ما تفهموا كلامي؟ لأنكم ما تتحملو تسمعوا كلمتي! 44انتوا أولاد أبوكم ابليس، وعندكم الرغبة أنكم تسووا شهوات أبوكم. هو من البداية يقتل الناس، وما ثبت على الحق لأنو مافيه حق! لمن يتكلم بالكذب كل اللي يخرج منو كذب، لأنو كذاب وأبو الكذابين 45أما أنا فأقول الحق بس تصدقوني. 46مين منكم يقدر يثبت علي خطيئة؟ ما دمت أقول الحقيقة، ليش ما تصدقوني؟ 47اللي مع الله بجد، يسمع كلام الله. بس انتوا ترفضوا كلام الله، لأنكم مو من الله.

ايش قال يسوع عن نفسه

48فقال اليهود: «يعني ما نقول الحقيقة لمن نقول انك سامري وأنو فيك شيطان؟» 49جاوبهم: «مافي شيطان فييا، أنا أكرم أبويا وانتوا بتهينوني. 50أنا ما ابغى مجد علشاني لأنو في اللي يطالب ويقاضي لي. 51الحقيقة الحقيقة أقولكم: اللي يطيع كلامي ما رح يشوف الموت مره». 52فقال اليهود: «لأننا أتأكدنا أنو فيك شيطان. مات ابراهيم ومات الأنبيا، وانت تقول أنو اللي يطيع كلامك ما رح يموت مره. 53انت يعني أعظم من أبونا ابراهيم اللي مات؟ حتى الأنبيا ماتوا، مين تفكر نفسك؟» 54فرد عليهم «إزا أنا بَمَجِّد نفسي، مجدي هادا مو بشي. بس أبويا هو اللي يمجدني. وانتوا تقولوا انو الله حقكم. 55مع انكم ما تعرفوه بس أنا اعرفه لو قلت لكم إني ما أعرفة كان صرت كذاب زييكم لكني أعرفة وأسوي كلمته 56أبوكم ابراهيم فرح وترجي أنو يشوف يومي، شافه وفرح» 57قاللوا اليهود: «لسه ما كملت خمسين سنة، كيف شوفت ابراهيم؟» 58فرد عليهم «الحقيقة الحقيقة أقوللكم: أنا موجود من قبل ما يكون ابراهيم أنوجد». 59فقاموا شالوا حجاره علشان يرموها عليه، بس هو خفى نفسه وخرج من الهيكل.

Currently Selected:

إنجيل يوحنا 8: HNAV

Highlight

Copy

Compare