Narpa Phingchaun XVI.
XVI.
1Yang kho Derbe nang Lustreang hlobs; yang ltos, der Timotheus zerkhan lzadrulbakhan chikchik yodpin, chhesluksbakhan Yudaiaspi ane chigi buthsao, amma (rangi) atao Hellenpa (inmin). 2Kho Listra nang Ikonyimi phonouniang rgyalba rshpangpo yodkhan inmin. 3Paulosis dyu rang nanyambo chha rgosuk sams; ni kho tede, de malsauniang yodkhan Yudaiapauni phya khoe khridkhorpo rshtubs, chiazerbana khoe ata Hellenpa in zere khong saqa rshtaḵẖspa yodpin. 4Yang khong rgyalsauni phres chhen yodtsana khoagunla khongis Yerusalemi phrinkhyedchukkhanun nang chhimiunis phingskhan skalun jaqpi phya tangs. 5Ni, grikskhorun chhesluksiang ngadchan song yang rtsiseang jaqbajaq thosen song.
6Ni, khong Phrigya nang Galatikye yuli phres, rgalena yang Rtsangma Sems-zangpos khonga Asyeang Ashipi Sperao ma tong zero molena, 7ni, khong Misyeang babsena Khongis Bithinyeang chhachi phraluks bas yang Yeshui Semszangpos khong chhamachuks. 8Ni, khong Misye phres rgalona khong Troasiang babs. 9Yang Paulosla thsanla thongluksika Makodonyapa khyoqok langse yodpin, khoa ju namsi ben yodpin yang (dyu) zoren yodpin pharkâ bingse Makedonyeang yongsena ngachâ yato bos (zeren) khoa thong. 10Ni, khoe thonglukspo thong-machikna ngachas Makedonyeang chhachi stabs bas, Ashipaos khonga phrinzang hagochukpi phya ngacha salephese kus tabsed zere chhutedpin. 11Troasikana Rgyamthsoe nayoeka ngacha walikhyoq strangse, Samothrasyeang yongs, yongsena ejaqa Neapolusiang (yongs). 12Derna Makedonye rgyalsa nang de khori chhopo malsa nang Romapauni duksa inkhan Philippyeang hleb, ni ngacha jaq khachik de rgyalsiang duks. 13Duksena Sabati jaqpa rgyalsi zgoe phyista bingse groqpoe zurika song, deka laqpa sunchi malsok duktuk zere sams, yang sâ duksena deka nyambo hlebskhan aneunla spera bas. 14Yang ane chikchik, Lidya zerkhan Thyateir rgyalsapa marpo ras thsongkhan Ashipâ rchorkhanis rshna ben yodpin; Khoe snying o Ashipas Paulosis tamunika snanga be phya phes. 15Ni kho nang khuri khangmapaunis Baptisma lenena khos ju namsi base zes : Taqdir yentes nga Ashipi chhesluks bakhan samedna ngi khangma-a juksena skyode jukshik. Khos ngachâ rtsode dukchuks. 16Ni, ḏinḏek song, ngacha laqpa zunchi malseka chhen yodtsana ngacha na Puthoni semshik yodkhan bomoek thuk, khos rgyabthongchi las base rangi ashipauni phya phankye mangmo khyongedpin. 17Khos Paulosi rgyabpona nang ngachi (jukna) yongse dyu zeren khstabs: Di miun thonmo nang chhopo Rshnamchoe tsonun in khongis ngantanga khomluksi lampo hagochuged. 18Ni de bomos jaq mangmo thsaqpa dya tsoḵẖs baspin; amma Paulos ḵẖolṯo songse yang loqse de semspoa zes : Ngas khyeranga Yeshu Masihi mingika di bomoeangna bingse song zere skaled. Ni dyana tho khurika bingse song. 19Ni, bomoo ashipaunla khonti phankhye yongmi rdyangmao bingse songse meden thongmana Paulos nang Silas zunena rgyalchos bakhanuni der mîdamsi malsika trude khyors. 20Khongunis rgyalchosbakhanuni dunla khyerena zes : Di miunis Yudayapa inenchik ngachi rgyalsiangnuk khrul mangmo ltsanged. 21Yang (khongis) ngachâ Romapa inonchik midodkhan yang lzadrulba (ninyankhan) khrimsun hagochuged. 22Yang mibongspo nyambo khongi loqparla langs, yang rgyalchosbakhanunis khongi gonchaun chade phudena khongika rshrupikun na rdungshik zere skals. 23Yang rshmaka mangmo phingsena khong kaqkhangeang tangs kaqkhangi ltakhanpoa khong rgyala base strungma khaq tangs. 24Khoa ḏinḏek skalchashik thobsona Khong rdani kaqkhangeang tangs, yang khongi kangmaun rdoseang skars. 25Ni, thsanphedtsega Paulos nang Silasis laqpa zunen Ashipi stodkhauni sas tangen yodpin, ni kaqso ypdkhanunis khonga rshna bas. 26Ni, hunmedika chhopo sanggulchik yongs; kaqkhangi smeang thsaqpa skul, skulena dyanatho khurika zgoun be, yang saqi rdosun grol. 27Ni kaqkhangi ltakhanpoa nyid thsad, yang kaqkhangi zgoun bese thongmana kaqse yodkhanun shorsed zere samse rargyik thene phingse khorang rang sadpa chhetaq yodpin. 28Amma, Paulosis thonmo skadika kustabse ses : Rangi rgoa rshnodkye hlebmachuk, chiazerbana diang ngantang saq yod. 29Ni, khos skyongtse khyongchuksena nanga rgyukse chhongs yang droqse daron Paulos nang Silasi dunla dril. 30Yang khong phyistâ khyongsena zes : Kasa ashipaun, nga-a khomluks thob-chi phya nga-a chi ba thsathsa duk? 31Ni, khongis zes : Ashipa Yeshu [Masih] ika chhesluks bos, yang khyeranga khomluks thobtuk, yang khyerang nang khyeri khangmapaunla (khomluks thobtuk). 32Yang khongis khoa nang khoe khangmapaun saqa Ashipi Speri spera bas. 33Yang khos thsanla dyana thoeka khong khyore khongi rshmakhaun khrus; yang dyana bangs khurika kho nang rangi miun saqa Baptisma tangs. 34Tangsena khos khong rangi khangma-a khyere solchoqs khyongs yang rangi khangmapaun saq nadrese Ashipika chhesluks based zere thadkha mangmo bas. 35Ni, nyima sharena rgyalchosbakhanunis rshtuksmiuni gowaun nanyambo do miun phude tong zere tangs. 36Yang kaqkhangi ltakhanpos rgyalchosbakhanunis khyentang phude tong zere zersed zere Paulpsla spera tangs, dekana dare phyista skyodpa bingse zomluksiang skyodshik! 37Amma, Paulosis khongunla zes : Khongunis ngacha Romapa inkhan chang budthalchik mangonma saqa rshtaḵẖspa chhachukse, rdungchukse, kaqkhangoang tangs, yang dare ngacha sangse phingse tangeda ? Dyu chang nyanmamed, dobasang khongun khontang yongse ngacha phyistâ khyerchukshik! 38Ni, rshtuksmi gowaunis rgyalchosbakhanunla di tamun gochuks; yang khongunla dyun Romapa in zero goana jiks. 39Yang yongsena khonga junamsi bas yang phyistâ khyere rgyalsiangna skyod zore jus. 40Ni, khong kaqkhangeangna bingsena Lidyo deka yongs, yang phonoun thongsona khongunla jalta tangs yang bingse song.
Currently Selected:
Narpa Phingchaun XVI.: SOMA
Highlight
Share
Copy
Want to have your highlights saved across all your devices? Sign up or sign in
© Société Biblique de Genève