رومیوں 10
10
1بِھراؤ! اِسرائیلی قوم کیتے میڈی دِلی خواہش تے خُدا کنُوں میڈی دُعا ہے جو او نجات پاوݨ۔ 2کیوں جو مَیں اُنہاں دا گواہ ہاں جو او خُدا کیتے غیرت تاں رکھیندے ہِن پر سمجھ نال نئیں۔ 3او اُوں راستبازی کنُوں واقف نہ ہَن جیہڑی خُدا دی طرفوں ہے بلکہ او خود آپنڑی راستبازی کُوں قائم کرݨ دی کوشش کریندے ریہے، اِیں واسطے او خُدا دی راستبازی دے تابع نہ تھئے#10:3 یعنی او راستبازی جیہڑی خُدا دی طرفوں اِیمان گِھن آوݨ نال مِلدی ہے نہ جو اعمال نال۔۔ 4کیوں جو مسیح شریعت دی تکمیل ہے تے نتیجے ءچ ہر اِیمان گِھن آوݨ آلا راستباز کھڑایا ویندے۔
نجات سبھ کیتے
5کیوں جو مُوسیٰ اُوں راستبازی دے بارے ءچ جیہڑی شریعت کنُوں ہے ایہ لِکھیا ہے جو
”جیہڑا اُنہاں حُکماں اُتے عمل کریندے
او اُنہاں دے وسیلے زندہ راہسی#احبار 18:5۔۔“
6پر جیہڑی راستبازی اِیمان تُوں حاصل تھیندی ہے او ایہ آدھی ہے جو آپنڑے دل ءچ ایہ نہ آکھ جو ”اسمان اُتے کوݨ چڑھسی؟“ (یعنی مسیح کُوں تلے گِھن آوݨ کیتے،) 7یا ”کوݨ تلے گہراؤ ءچ لہسی#اِستِثنا 30:12،13۔ ؟“ (یعنی مسیح کُوں مُردیاں ءچوں زندہ کر تے اُتے گِھن آوݨ کیتے۔) 8تاں کیا آدھی ہے؟ ایہ جو ”کلام تیڈے کولھ ہے بلکہ تیڈے مُنہ ءچ تے تیڈے دل ءچ ہے#اِستِثنا 30:14۔۔“ ایہ اِیمان دا اُوہو کلام ہے جیندی اساں تبلیغ کریندے ہیں جو، 9جے تُوں آپنڑی زبان نال اِقرار کریں جو یسُوع خُداوند ہے تے آپنڑے دل نال اِیمان گِھن آویں جو خُدا اُونکُوں مُردیاں ءچوں زندہ کیتے تاں نجات پا گِھنسیں۔ 10کیوں جو راستباز کھڑائے ونجنڑ کیتے دل نال اِیمان گِھن آونڑاں ہوندے تے نجات حاصل کرݨ کیتے اِقرار مُنہ کنُوں کیتا ویندے۔ 11اِیں واسطے خُدا دا کلام ایہ آدھے جو ”جیہڑا کوئی اُوندے اُتے اِیمان گِھن آسی او کڈھائیں شرمندہ نہ تھیسی#یسعیاہ 28:16۔۔“ 12کیوں جو یہُودی تے غیریہُودی ءچ کوئی فرق نئیں اِیں واسطے جو خُداوند ای سبھ دا خُداوند ہے تے سبھ کُوں جیہڑے اُوندے تُوں دُعا کریندن فیاضی نال برکت ڈیندے۔ 13کیوں جو ”جیہڑا وی رب دا ناں گِھنسی نجات پیسی#یُوایل 2:32۔۔“
14پر او اُوندا ناں کِینویں گِھننڑ جیندے اُتے او اِیمان نئیں گِھن آئے؟ تے اُوندے اُتے اِیمان کِینویں گِھن آوݨ جیندے بارے ءچ سُنڑیا نئیں؟ تے کِینویں سُنڑݨ جئیں تئیں کوئی اُنہاں کُوں خوشخبری نہ سُنڑاوے؟ 15تے خوشخبری کِینویں سُنڑاوݨ جئیں تئیں کوئی اُنہاں کُوں نہ بھیجے ؟ اِیں واسطے لِکھیا ہے جو ”جیہڑے لوک خوشخبری سُنڑیندے ہِن، اُنہاں دے پیر کیجھے بختاں آلے ہِن#یسعیاہ 52:7۔۔“
16پر ساریاں اُوں خوشخبری کُوں قبول نئیں کیتا۔ اِیں واسطے یسعیاہ آدھے جو ”یا رب، ساڈے پیغام اُتے کوݨ اِیمان گِھن آئے#یسعیاہ 53:1۔؟“ 17بس اِیمان سُنڑݨ تُوں پیدا تھیندے یعنی مسیح دا کلام سُنڑݨ نال۔
18پر مَیں پُچھدا ہاں، کیا اُنہاں نئیں سُنڑیا؟ بے شک سُنڑیا، جِینویں لِکھیا ہے جو
”اُنہاں دی اواز پُوری زمین تئیں
تے اُنہاں دا پیغام دُنیا دی اِنتہا تئیں پُج گِیا#زبُور 19:4۔۔“
19مَیں ولا پُچھدا ہاں، کیا بنی اِسرائیل نئیں سمجھیا؟ پہلے تاں مُوسیٰ آدھے جو
”مَیں اُنہاں کنُوں جیہڑے قوم وی کائنی تُہاکُوں غیرت ڈیویساں
ہِک نادان قوم کنُوں تُہاکُوں کاوڑ ڈیویساں#اِستِثنا 32:21۔ #10:19 یعنی خُدا آدھا ہے جو جِیں ویلے غیر قوم آلے جِنہاں کولھ شریعت نہ ہئی، خُدا کولھ آسن تاں یہُودیاں کُوں حسد ہوسی تے اُنہاں دے اِیمان نہ گِھن آوݨ دا کوئی عُذر نہ ہوسی۔۔“
20وَل یسعیاہ بہُوں دلیری نال ایہ آدھے جو
”جیہڑے میکُوں نہ گولھیندے ہَن،
اُنہاں میکُوں گولھ گِھدا
تے جیہڑے میڈے طالب نہ ہَن،
مَیں اُنہاں اُتے ظاہر تھی گِیا#یسعیاہ 65:1۔ ۔“
21پر بنی اِسرائیل دے بارے ءچ او فرمیندے جو
”سارا ڈینہہ مَیں ہِک باغی تے ضِدی قوم کیتے آپنڑے ہتھ ودھائی ریہا#یسعیاہ 65:2۔۔“
Currently Selected:
رومیوں 10: SKRV
Highlight
Copy
Compare
Share
Want to have your highlights saved across all your devices? Sign up or sign in
Modern Central Saraiki Bible © 2024 Strategic Resource Group
