शक्ति काम 27
27
पावलबा रोम सारनापा ख्याम्बाते
1थेरूई ङ्योकोनला इटाली लुङबापा तोङच्ये टुङ्गो ओङसुङ। थोक ओङनामेई थेपा खेराला पावल थेमे ज्येनोङ कोई कोई कैदीला मिल्टेरी क्याप्टेन युलियस सिराते जिम्मा लै खासुङ। थे क्याप्टेनचेन अगस्टस सिराते पल्टन मि ओतान। 2थेरू ङ्योकोन गाङेराङ एड्रामिटियम सिरसादुकी वाबाते पानीजहाजला जेबाप। थे जहाजचेन एशिये अञ्चल छेउकी नाङला फाप्च्येते ठाउँ ठाउँ ड्वाप्ला ठीक खाबा ओतान। ङ्योकोनताङ म्यासिडोनिये लुङबे थिस्सलोनिकापे अरिस्तार्खस सिरातेङ ओतान। 3थेरूई पानीजहाज चले खानामेई ङारो च्योक्ते ङ्योकोन सीदोन सिरसादु लेप्सुङ। थेमे थे क्याप्टेनगी थेरू पावल र्वातेबेकी थेला गोच्येतेबा तेरा ङेत्स्यीत सिन थेबाला ठेता खित ताङगीन लेमु खासुङ। 4थेमे थेरूकीङ ङ्योकोन ख्याम्बाप। तर पानीजहाज खेरा चाल्से छ्य्वापेकी आउदी खाईन ल्हाबा चले खाबेकी ङ्योकोन साइप्रस लुङबे पूर्वे छ्य्वापा खाईन ड्वा फाप्सुङ। 5थोक खिन खिन ङ्योकोन सिलिसियाताङ पामफिलिये अञ्चल छेउताङ छेउ खाईन लाइसिये अञ्चलते माइरा सिरसादु लेपाप। 6माइरादुकी थे क्याप्टेनगी अलेक्जेन्ड्रियापेकी इटाली लुङबापा डोच्येते पानीजहाज थेप्कीन ङ्योकोनला थे पानीजहाजला जेक च्युत्सुङ। 7थे जहाजला जेनामेकी पानीजहाज खेरा फाप्से छ्य्वापेई आउदी खोक्पो खाईन ल्हाबा चले खाबेकी ङ्योकोन काल्बेई दिन तिरीकामा क्नीडस सिरसे खादु ख्योल्सुङ। थे ल्हाबेकी खित्सादु थेरूई ङ्योकोन ड्वा फाप्च्ये लामलेई ड्वा माथुप्कीन समुन्द्रे किल्दु ओताते क्रेट लुङबे छ्य्वापा गालाप। दोक खाईन ङ्योकोन थे लुङबे सालमोने सिरसादुई क्योगीन दक्षिण छ्य्वामेई खाईन गालाप। 8थेमे थे लुङबे छेउताङ छेउ खाईन बल्ल बल्ल ङ्योकोन सुन्दर बन्दरगाह सिरसादु ख्योलाप। सुन्दर बन्दरगाहचेन लासिया सिराते सारगी खादुराङ फाप्कीन ओतान।
9थेस्साक ख्योल्केलाराङ काल्बेई दिन गाल्गीन सिन्दा ओतान। थेमे बर्त देत्च्येते चाडोङ माने खाईन सिन्दा ओतान। थोगी हुन्डी चले खित्च्येते समय लेपेकी पानीजहाज चले खिताला आउदी ज्यीबा लाङच्या गाल्गीन सिन्दा ओतान। थेमे पावलगी थे क्याप्टेनताङ जहाजकी छ्ये छ्ये मिला 10“लो हजूरवे, दि समयला ङुरूङ दुरूकी पानीजहाजला गाल्सीन खालि दुक्पाकामा ङेदोङ सिराच्योक ङाला लाङगीदुक। काल्बा मेलेबा ओङसीन माल सामान ङ्येच्येतेकामा मेन, पानीजहाज छ्याक्ला दाक्पोनराङ नुप्ला स्यिरोङ,” सिन थेरूई मोन्डोच्ये बात खासुङ। 11तर थे मिल्टेरी क्याप्टेनगीचेन पावल बातला नामज्योकराङ मेसेता खाईन पानीजहाज क्याप्टेनताङ थे जहाजकी धनीकी साबाते बात ङेन्सुङ। 12गुनला हुन्डी चले खित्च्येते समय ईन्देकी लासियादु देता थोक लेमु ओङच्या मेतान। थोगी पानीजहाज नाङ ओताते काल्बा च्योक्ते मिओनगी थुप थुपला बरू फोनिक्स सिरसादु गाल्ला देत्की सिन सासुङ। थेरूचेन पानीजहाज लेमु खाला ज्य्वाच्येते ठाउँ ओतान। थे ठाउँओङ क्रेट लुङबादुराङ फाप्कीन ओतान। थे ठाउँ दक्षिण पश्चिमताङ उत्तर पश्चिम छ्य्वापा ग्युरा ओतेकी ज्येननापा हुन्डी चले खासीनोङ थेरू छ्याःङ खिन मेतान।
हुन्डी चले खाईन पानीजहाज छ्याक्पाते
13थेमे दक्षिण छ्य्वामेकी खोले खोले ल्हाबा चले खिताला स्यूसुङ। थोक ओङजीन पानीजहाज चले खित्कान्ते मिओनगी था थेरूई ड्वा थुप्च्याक्वा सिन पानीजहाज आरे खाईन ज्याक्पाते अङ्कुसे च्योक्ते बालुवे नाङदुई थेन्गीन पानीजहाजला थे लुङबे छेउताङ छेउ खेराला स्यूसुङ। 14-15तर होत्ताराङ थे लुङबे यामारगी आउदी ज्यीबा लाङच्याई हुन्डी वाकीन पानीजहाजला हुत्ते खाईन समुन्द्रे किलगी नाङपा खेराला स्यूसुङ। उत्तर पूर्वे छ्य्वापेई चले खित्च्येते हुन्डी सिराते दि हुन्डी चले खिताला स्यूनामेई पानीजहाज चले खित्कान्ते मिओनगी लोईन थे लुङबे छेउनापाराङ ग्युरगीन ड्वा चाल्सुङ। तर छ्याःङ लै माक्याबेकी पानीजहाजला ल्हाबेकी हुत्ते खाला खेरस्यीत सिन थोकराङ तोङा फाप्सुङ। 16ल्हाबेकी हुत्ते खिन खेरगीन ङ्योकोन समुन्द्रे किल्दु ओताते क्लौडा सिराते टेक्टेज्यीक लुङबे खादु ख्योल्दुक। थे लुङबे दक्षिण छ्य्वामाचेन हुन्डीकी आता दुक्पा माबिन्देकी पानीजहाज चले खित्कान्तेबेकी जहाजकी ल्हाकनापा ठाकीन ज्याक्पाते डुङ्गा मोतोरस्यीत सिन बल्ल बल्ल ठुत्कीन नाङने लुइन ज्याक्सुङ। 17थेमे पानीजहाज माछ्याक्स्यीत सिन थेबेकी जहाजकी फेरोला थाक्पेकी रोम्बो खाईन ठासुङ। थेमे ल्हाबेकी पानीजहाजला सिरटिस सिरसापाला हुत्ते खाला खेरला थेरू बालुवादु गा ज्युत्कीता सिन आउदी ज्यीबा खासुङ। थोगी थेबेकी पानीजहाजला ल्हाबेकी थेपा मेखेरस्यीत सिन जहाजकी लाक्तु थामओनला टाँए खाबाते पालचेन थेन्सुङ। 18ईन्सीनोङ हुन्डी ज्यीबा लाङच्या खाला चले खिनराङ देतेकी पानीजहाजला येङगे ज्वाप सिन ङारो च्योक्ते थेबेकी थे नाङ ओताते माल सामानतेबा थेन्गीन क्युराला स्यूसुङ। 19थेमे ना च्योक्ते थेबेकी पानीजहाज चले खिताला गोच्येते सामानओनोङ खोपरोङगीराङ थेन्गीन क्युरसुङ। 20दोक खाला ङीमा काल्बेईसाक हुन्डी चले खिन देत्कीन ङीमाताङ कार्मे छ्येत समेदोङ मोथोङजीन था ईन्सीनचेन मोसोन्च्या दुका सिन ङ्योकोनगी सेम सेत्कीन सिन्दा ओतान।
21थोक ओङजीन थे पानीजहाजला ओताते मिओनगी साप मासोबाते काल्बेई गाला ओतान। थेमे पावलगी “हजूरवे, ख्योकोनबरीकी ङे बात ङेन्गीन क्रेटदुकी माख्याम्बा ईन्सीन दि दुक्पा ङेत्च्या मेतान। ज्येनतोक माल सामानोङ छ्याःङ नोक्सान ओङच्या मेतान। 22जे ईन्सीनोङ था ख्योकोन सुङ सेम मासेत। पानीजहाजचेन ङ्येक्यो तर ङुरूङ सुङ मिस्यिओ। 23च्यिला सासीन ङे माने खिन ओताते परमेश्वरगी दाङ ग्वाका ङा ओत्सादु थे खोरोङ दूतज्यीक ताङदुक। 24थे दूतकी वाकीन ङाला ‘पावल, खो बान्दा ज्यीबा माकेत। खो रोमी गेल्बो ओत्सादु पक्काराङ लेप्क्यो। था खोल्लाकामा मेन, खुई खित्सादु दया खाला खोत्ताङ ओताते मि गाङेला परमेश्वरगी सोन ज्युत्क्यो,’ सिन सासुङ। 25थोगी ख्योकोन सेम मासेत, ज्यीबा खिता थोङ। परमेश्वरगी थे खोरोङगी साबा च्योकराङ खिओ। 26थाचेन ल्हाबेकी जहाजला समुन्द्रे किल्दु ओताते खइँदा लुङबे छेउनापा हुत्ते खाला खेरला गा ज्युत्क्यो,” सिन सिदुक।
27थोक खाईन हुन्डीकी पानीजहाजला एड्रिये समुन्द्रे नाङ हुत्ते खिन खेराते हप्ता ङि गाल्गीन सिन्दा ओतान। थे छोमु ग्वाका नुप फेतला थे जहाज चले खित्कान्ते मिओनला लुङबाज्यीक खादु ख्योला खाबाच्योक लादुक। 28थोगी थेबेकी रीम्बुई थाक्पाला च्येन्देज्यीक च्याकी डल्लो ताबाते थाक्पेकी छ्यु थोई तीङ दुका सिन थाप्कीन तासुङ। थोक खाला ताजीन थेरू ठु खाल ठुकचो तीङ थेप्सुङ। थेरूई टिक्पी फजेकपा लेप्नामेई थाप्ला ताजीन ठु खाल स्यीताङ च्युताम्बाकामा तीङ ओतान। 29था छ्यु थोक काल्बा तीङ मेतेकी पानीजहाज खइँसाला गाल्ला दोला थुरे खाला छ्याइता सिन थे मिओन ज्यीबा खासुङ। थोगी थेबेकी पानीजहाज आरे खिताला थे ल्हाकनापा ओताते थाक्पाला ताबाते अङ्कुसे च्योक्ते स्यी समुन्द्रमा बालुवे नाङ पाप्कीन नाम लाङ लाङसाक गुकीन देत्सुङ। 30दोक खाला गुला देत्जीन खाराक्पा नुपलाराङ छ्योङाप सिन थे जहाज चले खित्कान्ते मिओन पानीजहाजकी दोन्नापे अङ्कुसे च्योक्ते छ्युनामा बेप्च्ये निउँ खाईन डुङ्गा छ्युनामा पाप्कीन फ्रोबा चाला ओतान। 31थेबा फ्रोबा चालाते छ्या स्येकीन पावलगी मिल्टेरी क्याप्टेनताङ मिल्टेरीओनला “दि पानीजहाज चले खित्कान्ते मिओन फ्रोसुङ सासीनचेन हजूरबा ख्योकोन सुङ मोसोनो याङ,” सिन सिदुक। 32थेकी थोक सानामेई मिल्टेरीओनगी थे डुङ्गा ताबाते थाक्पा तुप्कीन डुङ्गाला थोकराङ ताङसुङ।
33था नाम लाङा लाङा खाबा ओतान। थेमे पावलगी जहाजकी नाङ ओताते गाङेताङ बात खिन “था मोसोन्च्याक्वा सिन ज्यीबेकी हप्ता ङिसाक ख्योकोन छ्याःङ मास्साबा खाईन देता ओत। 34ओर्च्ये खइँदा साप सो। दोक खाईन छ्याःङ मासोसीन सोन्दा मुथुबो। छ्याःङ ज्यीबा माकेत। ख्योकोन सुङगीतेङ टे केस्राज्यीगोङ मिङीलो,” सिन सिदुक। 35थोक सानामेकी थेकी लाःक्तु स्योबेन लाकीन थेबा गाङे ङोन्दु परमेश्वरला धन्यवाद बिन्गीन स्योबेन च्यागीन साप्ला स्यूसुङ। 36थोक थोङनामेकी था ईन्सीनचेन सोन्च्या ओङसुङ सिन ज्येनगीङ साप साप्ला स्यूसुङ। 37थे पानीजहाज नाङ ङ्योकोन जम्मा मेरा सय ङिताङ खाल सुमताङ च्युरूक ओतान। 38मि गाङेकी सुबा रेरे सोसुङ। सोकीन सिन्नामेकी जहाज चले खित्कान्ते मिओनगी जहाज येङगे ज्वाप्ला लोईन थे नाङ ओताते ठातेबा समुन्द्रमाराङ पोत्कीन ताङसुङ।
39थेमे नाम लानामेकी पानीजहाज चले खित्कान्ते मिओनगी थे लेपाते लुङबा खाङ ईन्दे सिन छ्याःङ छ्या मास्येसुङ। थेमे समुन्द्रे छेउनापा सम्मते ठाउँज्यीक थोङनामेई पानीजहाजला थे छेउनापाराङ खेरगी सिन ठो खाईन 40थेबेकी थे जहाज आरे खाईन ज्याक्पाते थे अङ्कुसे च्योक्ते ताबाते थाक्पातेबा तुप्कीन समुन्द्रमाराङ क्युरसुङ। पानीजहाज क्योक्च्येते दबी ठाबाते थाक्पाङ टोल्सुङ। थेमे पानीजहाजला ल्हाबेकी समुन्द्रे छेउनापा खेरस्यीत सिन दोनगी छ्य्वापे पालोङ टाँए खासुङ। थोक खानामेई पानीजहाज छेउनापा ड्वाप्ला स्यूसुङ। 41थेपा डुइन डुइनला छ्युई नाङ ओताते बालुवे थुप्रोला थुरे खाईन पानीजहाज थेरूराङ गाकीन जति खासीनोङ थेरूई डेग चले माक्यासुङ। थेमे समुन्द्रे छालगी खित्सादु पानीजहाज ल्हागी छ्य्वापा गाङे छ्याक्सुङ। 42थोक ओङजीन था कैदीबरी गाङे पौडे खाला छ्योङच्या ओङसुङ सिन ज्यीबेकी मिल्टेरीओनगी थेबा गाङेला सेता चाल्सुङ। 43तर मिल्टेरी क्याप्टेनगी पावलला सेता मेङगो सिन कैदीज्यीकलाङ सेत माच्युत्सुङ। बरू थेकी गाङेला “लो पौडे खिता थुप्कान्तेबा पौडे खाला पाङनापा थेन। 44थोक खिता मुथुप्कान्तेबाचेन पानीजहाज छ्याक्पाते फलेकताङ स्यिङला जुम्ला समुन्द्रदुकी थेन,” सिन कोत्सुङ। थोक खाईन ङ्योकोन गाङेराङ लेमुराङ खाईन समुन्द्रदुकी पाङनापा थेन्दाप।
Currently Selected:
शक्ति काम 27: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
