शक्ति काम 26
26
अग्रिपा गेल्बो दोन्दु पावलगी खाबाते बात
1फेस्तसकी थोक साकीन सिन्नामेकी अग्रिपेकी पावलला “लो खुईते सिरा फाप्च्येते बात च्यि ईन्दे, दुरू सि,” सिन सिदुक। थेमे पावलगी गाङेकी थे बात ङेन्स्यीत सिन लाक्पेकी चाल खिन गेल्बो अग्रिपे दोन्दु दोक सिन बयान तेराला स्यूसुङ। 2थेकी “सरकार, ङाला यहूदीओनगी लै खाबाते दोष ईनराङ मेन सिन गेल्बो खुई दोन्दु सिरा ङेत्जीन ङाला आउदी गा लाबा ओत। 3च्यिला सासीन यहूदीओन रीतिथिति चुक ओते थेमे खोपरोङ धर्मे बात खित्जीन खाङ बातला थेबा मिडिक्ते सिन गेल्बो खोल्ला लेमु खाला छ्याराङ ओत। था दुक्पा माने मिक्किता खाला ङे बात ङेन्ला नाङ सिन ङा बिन्ती खिओ।
4च्यि सासीन ङा खाम्बादु ओत्जीन थेमे तिरी यरूशलेमदु देत्जीनोङ ङेराङ यहूदी नाङराङ देताते ईन। थोगी ङा चुक्ते ईन्दे थेमे ङे च्यि च्यि खाबा ओताने सिन यहूदी गाङेला छ्याराङ ओत। 5ङा फरिसी पाटी मि ईन सिन थेबाला गोमामेईराङ छ्या ओत। दि बात मेन सिन थेबा सुङगीङ सिरा मुथुबो। थेमे यहूदी नाङ फरिसी पाटी मिओन झन आउदी लेमु खाला खोपरोङ धर्मे नियम ङेन्कान्ते ईन सिनोङ गेल्बो खोल्ला छ्याराङ ओत। 6स्याप्ते मिओनला तिरी सोम्बो लोइओ सिन परमेश्वरगी ङेराङ ज्युज्यु पुर्खाला जमान खाबाते बात पक्काराङ ईन सिन साबेकी खित्सादु यहूदीओनगी ङाला दि मुद्धा कोन्दाते ईन। 7परमेश्वरगी दि जमान पूरो खाबाते थोङा ङेत्स्यीत सिन आश खाईन ङ्योकोन थर च्युन्ङी यहूदी गाङेराङ ङीन नुप थेला माने खिन गुकीन देता ओत। यहूदी गाङेकी आश खाईन गुकीन देताते दि बातला ङे पक्काराङ ईन सिरजीनचेन होथेबेकीराङ ङाला दोक खाईन दोष लै खाबाते ईन सरकार। 8परमेश्वरगी स्याप्ते मिला सोम्बो लोक्पा ओत सिरजीनचेन ख्योकोन यहूदीओन च्यिला सुङ पत्ते मिक्किते? ङालानी अचम्ब लाङगीदुक। 9ईन्दानी नासरतपे येशू बात ङेन्ला सुङ थे छ्य्वापा लै मिक्किस्यीत सिन गोमा ङेङ खितासम्म थे विरोध खाबाप। 10चुक सासीन छ्ये छ्ये पूजारी अधिकार ङेत्कीन ङे यरूशलेमदु ओताते परमेश्वर सन्तान काल्बेईला जेलला लुक्पाप। थेमे होथोक्ते मिला सेता फाप्क्यो सिरकान्तेबाताङराङ डिगीन ङेङ होथेबाला सेत च्युताप। 11थेमे बाजिताङ बाजि यहूदीओनते मिटिङ खित्च्येते खाम्बा खाम्बाला गाल्गीन थेबेकी येशूला विश्वास खिता ताङला थे विरोध खित्स्यीत सिन ङे थेबाला आउदी खाईन दुक्पा बिन्दाप। थेबाला थोङजीन ङाला टिक्पीई स्येदाङनी लाङगीन मेतान। यरूशलेमदुकामा मेन्देकी मि लुङबाला सार सारला समेदोङ गाल्गीन ङे थेला विश्वास खित्कान्तेबाला तेरासम्म दुक्पा बिन्दाप।
12होथोक्ते मिओनला दुक्पा तेरालाराङ ङा ङीमाई दमस्कसपा डुइन ओतान। छ्ये छ्ये पूजारी अधिकार ङेत्कीन थेबेकी खि साबाच्योक खिताला ङा थोक खाईन थेपा ख्याम्बा ओतान। 13ज्येन र्वाओनलाङ टीला थेपा डुइन डुइनला ङीम्मु बाह्र बजे नाङपा लामला च्यि ओङसुङा सासीन सरकार, नामनेकी नाम्दाकज्यीक फोगीन ङात्ताङ ङे र्वाओन फेरोला नाम्दाक छ्याङे गाल्सुङ। थे नाम्दाक ङीमे नाम्दाक भन्दाङ ल्हाक्पा ओतान। 14थोक ओङजीन ङ्योकोन गाङेराङ साला रिल्सुङ। थेमे ङे हिब्रू बातला ‘ए शावल, खो च्यिला ङाला खेदापानी खिते? ङाला दुक्पा तेरच्येतेनी खोरोङला मेलेबा ओङच्येतेकामा ईन,’ सिन सिरा थोसुङ। 15थेमे ङे ‘खो सु ईन्दे प्रभु?’ सिन ठिजीन प्रभु येशूकी ङाला ‘ङा येशू ईन। खुई खेदा खाबाते ङालाराङ ईन। 16लो था खो ल्वा। खोल्ला ङे ङाराङ काम खिताला खटे खाबा ओत। खुई थरिङ थोङातेताङ थोबाते बातओन थेमे तिरीङ ङे खोल्ला छ्या स्येबा खाला तेरच्येते बाततेबा ज्येनला लोपालाराङ ङे थरिङ खोल्ला ठेता खाबाते ईन। 17थोक खिताला था ङा खोल्ला यहूदीताङ ज्येन ज्येन जातकी मि ओत्साला तोङगो। तर ज्यीबा माकेत। ङा खोल्ला थेबा गाङे लाःक्तुकी जोए खाला ज्य्वाक्यो। 18थेबा पापताङ लोभदुकी ठाल्ला परमेश्वर नाम्दाकला देता ङेत्स्यीत, दोक खाला शैतान लाःक्तुकी ठोल्ला परमेश्वर छ्य्वापा लै खित्स्यीत सिन खुई थेबाला ङे बात छ्या स्येबा खाला तेरा फाप्क्यो। थेमे थेबेकी ङाला विश्वास खानामेई परमेश्वरगी थेबे पाप गाङे माफ तेरग्यो। थेमे परमेश्वरगी सेम खुदुक जोबाते मि ज्येनतेबेकी ङेत्च्येते जति गाङे थेबेकीङ ङेत्क्यो,’ सिन सिरा थोसुङ।
19थोक खाला स्वर्गनेकी वाला ङाला ठेता खित्कान्ते प्रभु येशूकी खि साबाते बात मेङेन्दा खाईन ङानी देताराङ माथुप्सुङ सरकार। 20थोगी ङे गोमा दमस्कसदु थेमे यरूशलेमताङ यहूदिये अञ्चल नाङला गाङेपा थेमे ज्येन लुङबा लुङबाला गाल्गीन ज्येन ज्येन जातकी मिलाङ ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि सिन लापाप। थोक खित्जीन ङे थेबा गाङेला खोपरोङ पक्काराङ परमेश्वर छ्य्वापा लै खाबाते ईन सिन कामगीराङ खाला तेन्दा फाप्क्यो सिन साबाप। 21ङे गाङेला दोक दोक खि सिन लाप्कीन ख्याम्बेकीराङ यहूदीओनगी ङाला परमेश्वर मन्दिरदु ओते बेलाला जुम्गीन दुकीन झन्दै सेत्सुङ। 22दि दिनसाक परमेश्वरगी ङाला लेमुराङ खाईन ताबा ओत। थोगी खित्सादु ङा दुरूङ छ्ये टेक्टे जो ईन्सीनोङ गाङेला ङाराङगी छ्या स्येबातेताङ ओङाते बातकामा खिन ओत। दोक खित्जीन मोशा थेमे परमेश्वर बात खित्कान्तेबेकी तिरी चुक चुक ओङगीते सिन साबाते बातराङ ङा लोप्कीन ओत। 23थेबेकीचेन ख्रीष्टकी विषयला बात खिन ख्रीष्टकी दुरू वाला आउदी दुक्पा भोगे खिता फाप्क्यो थेमे स्याङ फाप्क्यो। थेमे स्याप्तेबा गाङे नाङ थे गोमा सोम्बो लोक्ला था परमेश्वरगी मिओनला पापताङ दुक्पादुकी डेल्ग्यो सिन खोपरोङ यहूदी थेमे ज्येन ज्येन जातकी मि गाङेला छ्या स्ये ज्युत्क्यो सिन साबा ओतान,” सिन सिदुक।
24पावल दोक खाला बात खिन खिनला किल्दुराङ हाकिम फेस्तसकी गाङेकी थोच्या खाईन “पावल, खो लेम्बे बात माकेत। खोनी काल्बा बात छ्या स्येच्या गाल्गीन ङ्योकीन सिन्दुक,” सिन सासुङ। 25थोक सिरजीन पावलगी “हजूर, ङा ङ्योबा मेत। ङे खिन ओताते बात मेन्दाते मेन। दि गाङे ओङाते बातराङ ईन। 26ङे च्यि च्यि बात खासुङा सिन गेल्बो अग्रिपाला गाङे लेमु खाला छ्या ओत। थोगी गेल्बोकी मोखोता सिन छ्याःङ ज्यीबा मिक्किता खाला ङा दि गाङे बात खिन ओत। दि बाततेबा गाङे मि मिगी दोन्दुराङ ओङाते बात ईन्देकी गेल्बोला छ्या मेताते बात मेन,” सिन साकीन 27गेल्बो अग्रिपालाङ “परमेश्वर बात खित्कान्ते मिओनगी साबाते बात सरकार खुई मेन मिसिरतासीन। सरकार खुई थेबे बात ईन सिओ सिन ङाला छ्या ओत,” सिन सिदुक। 28थोक सिरजीन थेकी “च्यि खो दोस्यिक बात खाला ङालाङ येशूला विश्वास खित ज्युताप सिओ?” सिन सिदुक। 29थेमे पावलगी “बात जस्तो ईन्सीनोङ होत्ता ईन्स्यीत तिरीकामा ईन्स्यीत थरिङ दुरू दि बातओन थोकान्तेबा सरकार खो थेमे ज्येन दुरू ओतातेबरी गाङेराङ ङा च्योकराङ येशूला विश्वास खित्कान ओङस्यीत सिन ङा परमेश्वरला प्रार्थना खिओ। तर ङे च्योक खाला ख्योकोनगीचेन नेल खोन्दा माफाप्स्यीत,” सिन सिदुक।
30थेमे थेरूकी गेल्बो अग्रिपा, हाकिम फेस्तसताङ बर्णिस थेमे थेरू ओताते छ्ये छ्ये मि गाङे थेरूई लाकीन गाल्सुङ। 31डोजीन थेबेकी “दि मिला सेताराङ फाप्च्येते कि जेलला ज्य्वाबा फाप्च्येते गल्तीनी दिकी छ्याःङ खाबा मेताक्वा,” सिन खोपरोङ नाङ बात खासुङ। 32थेमे अग्रिपेकी फेस्तसला “दिकी थे खोरोङ मुद्धा रोमी गेल्बोकीराङ तारस्यीत साबा मेता ईन्सीन दिला ताङसीनोङ ओङच्या ओताक्वा,” सिन सिदुक।
Currently Selected:
शक्ति काम 26: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
