रोमि 7
7
बिहुको उदारन
1दादाओने बाइओनेगेलाइ, का इदोइ काथा मोसाको न्याम गिकालाइहेङ दोअ्दोङखा। नेलाइ इदोइ बुङ गिसुखेना, सिन्हुपाधाउ खिनिङ द्याङता इदोइ न्याम लागु जेङखे। 2उदारनको भाअ्सिङ, हिदिङ बुङ बिहु पाका बेबाल ताइको केअ् सिन्हुपाधाउ मोसाको न्याम आन्सार ताइको केअ्दोफा इदोइ न्यामता धेउन्हाका हिखे। कालाउ केअ् सिहि पानु वासेहेङ इदोइ न्याम माधेउखे। 3एसाङपातेङ ताइको केअ् हिकाहिकाताङ बोमिदोफा हानिहि पानु वा कासबिरि पाखे। कालाउ केअ् सिहि पानु वा इङको न्यामसो छुटकारा निङखे रो भेनेङ वाबालदोफा बिहु पाहि पानु बुङ वा कासबिरि माजेङखे।
4दादाओने बाइओनेगेलाइ, एसापा नेलाइ बुङ ख्रिस्टदोफाङ न्यामको भाअ्सिङ सिका हिसुन्हा। एला नेलाइ सिकासो सिन्हुका ख्रिस्टदोफा एलोङ जेङसु रो परमेस्वरको भाअ्सिङ रेम्का काम पासु। 5लाम्फा केलाइ केलाइको पाप आनिबानिको आधिनता हिघान्हाहि। मोसाको न्यामसो केलाइता पापको कामगेलाइ पालि इछा जागिहि रो केलाइको जिउहेङ आधिनता ताअ्हि। इदोइभाअ्सिङ जेदोङ काथागेलाइ केलाइ पाका हिघान्हाहि इङकोसो केलाइता सिका जेङहि। 6एला केलाइ न्यामको दोअ्का भाइपाङ पुरुना ढङगसो माको कालाउ ख्रिस्टको हाङसाको नावा ढङगसो चाकर पान्हाखे। हाइदोनु एला केलाइ ख्रिस्टदोफा सिनाङ इदोइ न्यामको थुनासो फुक्का जेङका हिन्हाहि।
न्याम रो पाप
7एन्सा जेङनु केलाइ हाइ दोअ्लि? हाइ केलाइ मोसाको न्याम पाप चुमाहि दोअ्लि भोका कुनु? आहाँ माको! एदि न्याम मान्थुनु ते का पाप दोङ मानाल्धाङका। हाइदोनु कासेहेङ न्याम “मादिअ्” दोअ्तेङ मादोअ्पिका हिनु का दिअ्लि माएल दोअ्तेङ मामागेधाङका।#दामालाअ्का २०:१७; न्याम ५:२१ 8कालाउ इदोइ न्यामसो मापालि दोअ्का काथा पालाउ पाप माउका भोतेङ का लिअ्ता दिअ्लि इछा पापिहि। हाइदोनु मोसाको न्याम मान्थुलाउ पाप सिकाभाइकाङ जेङखे। 9लाम्फा का मोसाको न्यामको बारेता माबुझिसिङ दोङ सिन्हुका हिघाखा। जेलाइ मोसाको न्यामको दोअ्का काथा बुझिघा कालाउ का पाप पातेङहिका काथा था गिघा। 10इदोइभाअ्सिङ पापको भाअ्सिङ का एसापा सिलि गोइघा। न्यामको हुकुमको माने हिघाहि जिबन चुमालि कालाउ काङको भाअ्सिङ सिका कि चुमाहि। 11हाइदोनु पाप धरमाति हुकुमको माउका निङतेङ कासेहेङ आवाइपाहि। एसापा पाप धरमाति हुकुमहेङ आउजार बान्हाइतेङ कासेहेङ सेअ्हि।#सिरजाइ ३:१३ 12न्याम पुनित हि कालाउ न्यामको गोताङ हुकुमगेलाइ पुनित, ठिक रो रेम्का हि।
13एन्सानु हाइ रेम्का न्याम कासेहेङ सेअ्हि दोअ्का कुनु? आहाँ माको! कालाउ पाप कि कासेहेङ सेअ्का। हाइपानु पाप ताइको जातिङको रुप तिङपालि रेम्का हात्यार चालाइतेङ कासेहेङ सेअ्का। इदोइभाअ्सिङ न्यामको हात्यार चालाइतेङ दुरजन पाप आरोङ थिलिगोइका जेङहि।
द्याङको आनिबानि
14केलाइ गिन्हाखे, मोसाको न्याम परमेस्वरको हाङसाको पिका रेम्का काथा। कालाउ काचाहिँ जिउता हिघा रो पापताङ पिअ्न्हाका हिघा। 15का हाइ पाखा, इङको माबुझिखा। हाइपानु का जेदोङ रेम्का काम पालि भोखा, इङको मापाखा। कालाउ का इङकोङ आखेका काम पाखा, जाइहेङ का दिगमिग पाखा।#गलाति ५:१७ 16एसापा का पालि माभोका काम पाघा पानु, का न्याम रेम्का हि दोअ्तेङ मान्याङका। 17इदोइभाअ्सिङ काङको पाका पाप काङको पाका माको। इदोइ ते का लिअ्ता हिका पाप पाका। 18हाइपानु का गिखा, हिदिङ बुङ रेम्का काथा का लिअ्ता बासा माहिखे। काङको दोअ्का इदोइ काङको पापको आनिबानि। हाइदोनु रेम्का काम पाका इछा का लिअ्ता हितेङ बुङ का इदोइ पालि मादोखा। 19हाइदोनु जेदोङ रेम्का काम का पालि भोखा, इङको मापाखा। कालाउ दुरजन काम जाइ का पालि माभोखा, इङकोङ का पातेङहिखा। 20एला का जेदोङ इछा मापाखा, इङकोङ पाखा पानु इङको पाका का माको। कालाउ का लिअ्ता बासा हिका पाप।
21एसापा एलोङ न्याम काङको जिबनता काम पाका का तिङखा, जेलाउ का रेम्का काम पालि भोखा, इङको पहर दुरजन इछा बुङ कादोफाङ हिका तिङखा। 22हाइदोनु का काङको कोन्धाङसो दोङ परमेस्वरको न्यामता लेन्चाखा। 23कालाउ काता भेनेङ न्याम काम पाका तिङखा। इदोइ न्यामचाहिँ काङको ताइकोङ मनसो मानिलि भोका न्यामको खिलापता फेअ्सुखे। एन्साङ कासेहेङ पापको थुनुवा बान्हाइखे। 24का हिसिका दुखि द्याङ! इदोइ मुअ्तेङ हानिका जिउसो कासेहेङ हासु बान्चिपावा? 25इसु ख्रिस्ट केलाइको प्रभुसो दोङ परमेस्वर कासेहेङ बान्चिपावा। याको भाअ्सिङ परमेस्वरहेङ च्याबास चार्हाइखा।
इदोइभाअ्सिङ का ताइमिङ ताइको मनहोइ परमेस्वरको न्याम मानिखा। कालाउ काङको पापको आनिबानिहोइ कासेहेङ पापको आधिनता ताअ्खे।
Currently Selected:
रोमि 7: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
