रोमि 6
6
सिका रो जिबन
1एन्सा जेङनु केलाइ आखेका काम पालाउ बुङ परमेस्वर केलाइहेङ निगाहा पावा दोअ्तेङ केलाइ आरोङ पाप पातेङह्याङ कुनु? 2माको! केलाइ ताताइको पापको भाअ्सिङ सिन्हाहोइ। इदोइभाअ्सिङ केलाइ पापको आधिनता मान्थुन्हाहि। 3जेलाउ केलाइ ख्रिस्ट इसुता चिभुअ्का र्हुन्हाहि, वाकोदोफाङ सिन्हाहि दोअ्तेङ हाइ नेलाइ मागिसुखेना? 4इदोइभाअ्सिङ केलाइ बुङ वाकोदोफाङ चिभुअ्कासो सितेङ लिअ्न्हाका हिन्हाहि। सरबङ हिका परमेस्वर आबा ताइको पारतापसो इसु ख्रिस्टहेङ सिकासो सिन्हुपाहि। एन्साङपातेङ केलाइ बुङ पुरुना जिबन लाअ्तेङ नावा जिबनता ख्रिस्टभाइपाङ सिन्हुताङ।#कलस्सि २:१२
5हाइदोनु वाको सिकाता केलाइ एलोङ जेङन्हाहि पानु वाकोदोफाङ सिकासो सिन्हुलाउ बुङ एलोङ जेनाङ। 6केलाइ गिन्हाखे, केलाइको पुरुना जिबन मुअ्ताको रो केलाइ पापको बान्धाइ माज्याइने दोअ्तेङ केलाइको पुरुना जिबन ख्रिस्टदोफाङ सिका हि। 7हाइदोनु जाइ सिका हि इङको पापसो छुटकारा जेङका हि।
8कालाउ एदि केलाइ ख्रिस्टदोफाङ सिन्हाहि पानु, वाकोदोफाङ सिन्हुताङ दोअ्तेङ केलाइ खान्धुर पान्हाखे। 9हाइदोनु केलाइ गिन्हाखे, ख्रिस्ट सितेङ बुङ आरोङ सिन्हुहि। एला वा आरोङ हेअ्लाउ मास्यावा रो सिका वासेहेङ हेअ्लाउ बुङ सेअ्लि माद्वावा। 10हाइदोनु ख्रिस्ट पापहेङ जितिलिको भाअ्सिङ एअ्खे सिहि। एला आरोङ वा हेअ्लाउ मास्यावा। कालाउ एला वा परमेस्वरको पारतापकोभाअ्सिङ सिन्हुतेङ हि।
11एन्साङपातेङ नेलाइ बुङ ताइमिहेङ पापको भाअ्सिङ सिका कालाउ परमेस्वरको भाअ्सिङ ख्रिस्ट इसुदोफाङ सिन्हुतेङ हिन्हाहि दोअ्तेङ फोम पासु। 12इदोइभाअ्सिङ नेलाइको सितेङ हानिका जिउहेङ आरोङ पापहेङ आधिन पालि मापिसु। कालाउ नेलाइको जिउको पालि भोका आखेका काम पालि मापिसु 13नाङको जिउको आङगगेलाइहेङ पाप रो दुरजन काम पालि माचार्हाइसु। भुरुङ सिकासो सिन्हुका द्याङगेलाइभाइपा ताइमिङहेङ परमेस्वरकोता चार्हाइसु। रेम्का कामको भाअ्सिङ नाङको जिउको आङग परमेस्वरको चाकरता चार्हाइसु। 14पाप नेलाइहेङ आधिन मापावा, हाइदोनु नेलाइ मोसाको न्यामको आधिनता मान्थुसुन्हा, कालाउ परमेस्वरको निगाहाको आधिनता हिसुन्हा।
धरमातिको बान्धाइ
15एन्सा जेङनु हाइ केलाइ मोसाको न्यामको आधिनता मान्थुन्हाहि कालाउ परमेस्वरको निगाहाको आधिनता हिन्हाहि दोअ्तेङ केलाइ पाप पालि कुनु? इदोइ हेअ्लाउ बुङ माज्याङ। 16नेलाइ जाइको काथा मानितेङ चाकर पालि इछा पास्वाना, वाकोङ बान्धाइ जेङस्वाना। पापको बान्धाइ जेङतेङ इङकोकोङ हुकुम मानिस्वाना पानु नेलाइ सिस्वाना। कालाउ परमेस्वरको हुकुम मानिस्वाना पानु नेलाइ वाकोङ आगाता धरमाति ठार्हाइन्हास्वाना। 17नेलाइ लाम्फा पापको बान्धाइ हिघासुन्हा कालाउ एला नेलाइ कोन्धाङसोङ ताइको परमेस्वरको धिरपाका बिद्या मानिसुखेना। याको भाअ्सिङ परमेस्वरहेङ च्याबास ज्याको। 18एला नेलाइ पापसो छुटकारा निङतेङ परमेस्वरको रेम्का काम पाका बान्धाइ जेङका हिसुन्हा।
19काङको दोअ्का काथा रेम्फा बुझिलि दोसु दोअ्तेङ नेलाइहेङ इदोइ काथा दोअ्दोङखा। लाम्फा नेलाइ ताइको जिबनहेङ आखेका कामको भाअ्सिङ चार्हाइका हिघासुन्हा। एला एन्साङपातेङ पुनित जेङलि ताइको जिबनहेङ रेम्का कामको भाअ्सिङ चार्हाइसु। 20जेलाउ नेलाइ पापको बान्धाइ हिघासुन्हा, एन्सालाउ परमेस्वरको आगाता रेम्का काम पालि मन मापासुन्हा। 21लाम्फा नेलाइ दुरजन कामगेलाइ पासुन्हा रो एला नेलाइ इङको दुरजन कामगेलाइसो लेदेरका हिसुन्हा। कालाउ इङको दुरजन कामगेलाइसो नेलाइहेङ हाइदोङ लाभ माजेङहि। हाइपानु इङको काथागेलाइ ते सिका खिनिङ चुमाखे। 22कालाउ एला नेलाइ पापसो छुटकारा निङतेङ परमेस्वरको बान्धाइ जेङका हिसुन्हा। कालाउ यासो नेलाइहेङ पुनित पाखे रो हेअ्लाउ मामुअ्का जिबनता थुकापाखे। 23हाइदोनु जाइ पाप पाखे इङकोको जेलाचाहिँ सिका। कालाउ परमेस्वरको पिका एन्साङको बरचाहिँ केलाइको प्रभु इसु ख्रिस्टसो निङका हेअ्लाउ मामुअ्का जिबन।
Currently Selected:
रोमि 6: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
