मरकुस 11
11
यरुसलेमता इसुहेङ स्वागत पाका
(मत्ति २१:१-११; लुका १९:२८-४०; युहन्ना १२:१२-१९)
1इसु वाको चात्यागेलाइदोफा यरुसलेम हानिकाताङ पालाउ जेलाउ ओबालाइ यरुसलेमको भेरपा जाइतुन आरदाङको भेरपा बेदफागे रो बेथानिया दोअ्का थामेता थुकालिलोहि, कालाउ वा ताइको चात्यागेलाइता न्हेमिहेङ एसा दोअ्तेङ दिङगिल्हि, 2“नेलाइको आगाता तिङका देराता हानितेसाङ एलाथिकापा हासु बुङ माधोल्का एलोङ गाधाको चान नेलाइ निङस्वाना। इङकोहेङ खाइतेङ इता चुमासु। 3हासुङ नेलाइहेङ ‘इदोइ हाइ पासुखेना?’ दोअ्नु, ‘प्रभुहेङ गोइका हि रो वा मारफाङ घुरिपाप्यावा’ दोअ्सु।”
4एम्बालाइ इन्ता हानिलाउ जातिङको एलोङ साअ्को बाहार मुल फिनु भेरपा इङको गाधाको चान धेउतेङ ताअ्का तिङहि रो इङकोहेङ खाइलि तोम्लाउ 5इन्ता जाअ्तेङ हिका आधिमि द्याङगेलाइ एम्बालाइहेङ हिअ्हि, “या गाधाको चानहेङ खाइतेङ नेलाइ हाइ पादोङसुखेना?” 6इसु आर्हाइकाभाइपाङ एम्बालाइ दोअ्हि रो इन्ता हिका द्याङगेलाइ गाधाको चान चुमपुलि पिहि।
7एम्बालाइ इङको गाधाको चानहेङ इसुकोता चुमाहि, इङको गाधाको चानर्हुता ताइको धाबागेलाइ दाअ्पिहि कालाउ इसु इङकोर्हुता धोल्हि। 8आधिमि ताइको धाबागेलाइ रो बो आधिमि बारिसो ल्हाअ्बा सुदाङ हिका सिङको म्हुम्हुइका दालेङगेलाइ पालतेङ दामाता दाअ्पिहि।#११:८ यहुदि चलनता ताइको मान पालिगोइका द्याङहेङ मान पालाउ एसाङ पाघाखे। 9कालाउ इसुको आगापाहा तेका रो न्हअ्न्हुअ् लोकालाइ एसा दोअ्तेङ बाखिन्लि तेङहि, “जाय जाय ज्याको! परमप्रभुको मिङता लोका सहसाम्पा निनाको!#ले ११८:२५-२६ 10सहसाम्पा निङका, केलाइको आजुखाल दाउदको सारभि लोलि तोम्काहि। वाकोङ सारभिको जाय जाय ज्याको। स्वरगता हिका परमेस्वरको पारताप ज्याको!”
11इसु यरुसलेमता लोतेङ थानलिअ्ता दुल्हि। कालाउ वा थानता कोरबितिङ रेसेलि दोकान्हुअ्सो बेलोमनाङ ताइको चात्यागेलाइहेङ चुमतेङ बेथानिया हानिहि।
फल मासेका दुमरिको सिङ
(मत्ति २१:१८-१९)
12जुम्निदिना ओबालाइ बेथानियासो घुरिलाउ इसु म्हितुहि। 13कालाउ वा आसा दुरे एलोङ चाभ्रिका दुमरिको सिङ तिङतेङ इङकोता फल निनाङका बे दोअ्तेङ हानिहि। कालाउबुङ इन्ता थुकाकान्हुअ्सो वा सिङको ल्हाअ्बा बाहेक हाइदोङ मानिङहि, हाइपानु इङको पहर दुमरिको फल सेका पहरदोङ जेङनाङ मान्थुघाहि। 14कालाउ इसु इङको सिङहेङ दोअ्हि, “एलासो ओसो हासु बुङ नासो फल माचाको।” कालाउ इदोइ दोअ्का वाको चात्यागेलाइ हिङहि।
इसु थानता हानिका
(मत्ति २१:१२-१७; लुका १९:४५-४८; युहन्ना २:१३-२२)
15इसु चात्यागेलाइदोफा आरोङ यरुसलेमता दुल्हि रो थानता हानिहि। वा थानता चोलतेङपिअ्तेङ हिका पाइकारिगेलाइहेङ बाहार ओल्हिपागिल्हि। वा टाका सोकालाइको टेबुलगेलाइ उन्धिपापिहि रो पारेउ पिअ्कालाइको दोन्ध्रागेलाइ तुपिगिल्हि। 16वा हासुहेङ हिदोङ चिज थानसो चुमपुलि मापिहि। 17कालाउ इसु बिद्या पितेङ दोअ्हि, “हाइ इस्का लेखिका मान्थु, ‘काङको साअ् गोताङ जात्याको भाअ्सिङ पारथानाको साअ् दोअ्न्हावा?’ कालाउबुङ नेलाइते यासेहेङ डाकुगेलाइको आडा बान्हाइका हिसुन्हा।”#यासाइया ५६:७; यरमिया ७:११ 18इदोइ काथा हिङतेङ मुल धामिगेलाइ रो धरम मास्टरगेलाइ इसुहेङ सेअ्लि जुक्ति भोलि तेङहि। हाइदोनु एम्बालाइ वाकोदोफा थिघाखे रो झाराङ द्याङगेलाइ वाको बिद्याता भारभुसाइघाखे। 19दिलिमा जेङलाउ इसु ताइको चात्यागेलाइदोफाङ यरुसलेम पुरसो ओल्हितेङ हानिहि।
दुमरिको सिङसो बिद्या
(मत्ति २१:२०-२२)
20जुम्निदिना एअ् र्हिमाङ इन्तासो लाम्फाकोङ दामा हानिलाउ ओबालाइ इङको दुमरिको सिङहेङ जारिसोङ सेङका तिङहि। 21कालाउ पत्रुसहेङ इदोइ फोम लोहि रो वा इसुहेङ दोअ्हि, “मास्टर, खाङ, ना साराप पिका दुमरिको सिङ ते सेङहि।”
22इसु एम्बालाइहेङ दोअ्हि, “परमेस्वरता खान्धुर पासु। 23जातिङको का नेलाइहेङ दोअ्खा, जाइ ताइको कोन्धाङता आतुइसा बुङ साङखा मापासिङ ताइमिको दोअ्का काथा पोङघाङ दोअ्तेङ खान्धुरपातेङ इदोइ आरदाङहेङ ‘इतासो उअ्न्हातेङ जाहादिता हुल’ दोअ्नु, वाको भाअ्सिङ इन्सकाङ ज्यावा।#मत्ति १७:२०; १ कोरिन्थि १३:२ 24इदोइभाअ्सिङ का नेलाइहेङ दोअ्खा, नेलाइ पारथाना पातेङ हाइ र्हेसुखेना, इङको का निङहोइका दोअ्तेङ खान्धुर पासु रो इङको नेलाइको ज्यावा। 25जेलाउ नेलाइ पारथाना पालि जाअ्स्वाना, हासुङको खिलापता नेलाइको हाइ हि पानु माफ पिसु। कालाउ स्वरगता हिका नेलाइको आबा बुङ नेलाइको पाप माफ पाप्याको।#मत्ति ६:१४-१५ 26[कालाउबुङ माफ मापानु, स्वरगता हिका नेलाइको आबा बुङ नेलाइको पापगेलाइ माफ मापाप्यावा।”]#११:२६ इदोइ पद आधे पुरना स्रोत बाइबलता मान्थु।
इसुको खाबराबारे हिअ्का
(मत्ति २१:२३-२७; लुका २०:१-८)
27इसु ताइको चात्यागेलाइदोफा आरोङ यरुसलेमता लोहि। कालाउ वा थानता इसोओसो हिगिल्लाउ मुल धामिगेलाइ, धरम मास्टरगेलाइ रो आगुवागेलाइ वाकोता लोहि। 28एम्बालाइ वासेहेङ हिअ्हि, “हिदोइ खाबारासो ना इदोइ कामगेलाइ पाखेना? इदोइ कामगेलाइ पाका खाबारा नासेहेङ हासु पिहि?” 29इसु एम्बालाइहेङ दोअ्हि, “का नेलाइहेङ एलोङ काथा हिअ्ताङका, नेलाइ इङकोको जाबाफ पिसु, हिदोइ खाबारासो का इदोइ काम पाखा, इङको नेलाइहेङ दोअ्ताङका। 30ते दोअ्सु, युहन्नाको पिका चिभुअ्लि स्वरगसो ना द्याङसो?” 31इदोइ हिङतेङ एम्बालाइ एसा दोअ्तेङ ताताइमिता बहस पालि तेङहि, “स्वरगसो दोअ्ताङ पानु नेलाइ वासेहेङ हाइपालि खान्धुर मापासुन्हा?” दोअ्तेङ वा दोअ्तावा। 32द्याङपाहासो दोअ्ताङ पानु हेसापा दोअ्लि? एसा दोअ्लि एम्बालाइ थिहि। हाइपानु झाराङ युहन्नाहेङ परमेस्वर पाहासो धुइका दोअ्तेङ मानिघाखे।
33कालाउ एम्बालाइ इसुहेङ दोअ्हि, “केलाइ मागिन्हाखे।”
इसु एम्बालाइहेङ दोअ्हि, “का बुङ हिदोइ खाबारासो इदोइ काम पाखा, इङको नेलाइहेङ मादोअ्ताङका।”
Currently Selected:
मरकुस 11: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
