मरकुस 10
10
खातिपोकाको बारेता इसुको बिद्या
(मत्ति १९:१-१२; लुका १६:१८)
1इसु इङको थामेहेङ लाअ्तेङ यरदन झोराको ओदोइपार यहुदिया माउजाता हानिहि। आरोङ हेन्जा द्याङगेलाइ वाकोता जोम्हि रो लाम्फाको भाइपाङ वा एम्बालाइहेङ बिद्या पिलि तेङहि।
2फरिसिगेलाइ इसुकोता लोतेङ वासेहेङ जाच पातेङ हिअ्हि, “हाइ केअ् ताइको बेअ्दोफा खातिपोलि एलाङ ना माएलाङ?” 3इसु एम्बालाइहेङ दोअ्हि, “मोसा नेलाइहेङ हाइ हुकुम पिका हि?” 4एम्बालाइ दोअ्हि, “मोसा ते खातिपोतेङ ताइको बेअ्हेङ लाअ्लाउ बुङ ज्याङ दोअ्का हि।”#न्याम २४:१-४; मत्ति ५:३१ 5कालाउबुङ इसु एम्बालाइहेङ दोअ्हि, “नेलाइको कोन्धाङ थाङका हिनाङसिङ वा नेलाइहेङ इदोइ हुकुम लेखिपिहि। 6कालाउबुङ सिरजाइको लाम्फासोङ परमेस्वर द्याङहेङ वाबाल रो बेबाल पातेङ बान्हाइहि।#सिरजाइ १:२७; ५:२ 7‘इदोङभाअ्सिङ द्याङ ताइको आबा आमाइहेङ लाअ्तेङ ताइको बेअ्दोफा मिलितेङहिखे। 8कालाउ इङको न्हेमि एलोङ जिउ जेनावा।’#सिरजाइ २:२४ एम्बालाइ न्हेमि माको, कालाउबुङ एलोङ जिउ जेनावा। 9इदोइभाअ्सिङ परमेस्वर जाइहेङ एदोसाङ गासेका हि द्याङ माखेनाको।”
10साअ्ता हिलाउ चात्यागेलाइ आरोङ इदोइ बारेता इसुहेङ हिअ्हि। 11वा एम्बालाइहेङ दोअ्हि, “जाइ ताइको बेअ्दोफा खातिपोतेङ भेनेङदोफा बिहु पाखे, इङको वाको खिलापता कासबिरि पावा।#सिरजाइ ५:३२; १ कोरिन्थि ७:१०-११ 12कालाउ जाइ बेबाल ताइको केअ्हेङ लाअ्तेङ भेनेङदोफा बिहु पाखे पानु, वा कासबिरि पावा।”
इसु रो जामालाइ
(मत्ति १९:१३-१५; लुका १८:१५-१७)
13इसु ताइको खुर ताअ्तेङ सहसाम्पा प्याको दोअ्तेङ द्याङगेलाइ ताइको जामालाइहेङ वाकोता चुमाहि। इदोइ तिङतेङ चात्यागेलाइ इङको द्याङगेलाइहेङ हाकाराइहि। 14कालाउबुङ इसु इदोइ तिङतेङ चेरताम्पातेङ चात्यागेलाइहेङ दोअ्हि, “म्हुइका जामालाइहेङ काङकोता लोलि पिसु, एम्बालाइहेङ मारोकेसु, हाइदोनु स्वरगको सारभि इस्कालाइकोङ। 15जातिङको का नेलाइहेङ दोअ्ताङका, जाइ स्वरगको सारभिहेङ एलोङ म्हुइका जामालभाइपाङ मार्हुकावा, वा हेअ्लाउ इङकोलिअ्ता दुल्लि मानिनावा।”#मत्ति १८:३ 16कालाउ इसु एम्बालाइहेङ कोल्हेता बाअ्तेङ एम्बालाइर्हुता ताइको खुर ताअ्तेङ सहसाम्पा पिहि।
एअ्मि धनि द्याङ
(मत्ति १९:१६-३०; लुका १८:१८-३०)
17इसु दामाता हानिकाताङ पालाउ एअ्मि द्याङ धाअ्तेङ लोतेङ वाको आगाता तिर्हो थोहि रो वासेहेङ हिअ्हि, “ओइ रेम्का मास्टर, हेअ्लाउ मामुअ्का जिबन निङलि का हाइ पालिगोयाङ?” 18इसु इङकोहेङ दोअ्हि, “ना कासेहेङ हाइपालि रेम्का दोखेना? परमेस्वरसो बाहेक हासु बुङ रेम्का मान्थु। 19ना परमेस्वरको इदोइ हुकुमगेलाइ ते गिखेना, ‘मासेअ्लि, कासबिरि मापालि, माखुलि, ढाटाइका दासि मापिलि, माठगिलि, आबा रो आमाइहेङ मान पालि।’”#दामालाअ्का २०:१२-१६; न्याम ५:१६-२० 20कालाउ इङको इसुहेङ दोअ्हि, “मास्टर, इदोइ गोताङ ते का काङको म्हुइनासोङ मानितेङ हिघा।” 21इसु इङकोहेङ माया पातेङ खाङहि रो दोअ्हि, “नासेहेङ एलोङ चिजको खाचो हि। हाने रो नाङको जेथे हि पिअ्तेङ मान्थुकालाइहेङ पि। ना स्वरगता हिका टाका निनाना, कालाउ लोतेङ कासेहेङ पिताइ।” 22इदोइ काथा हिङतेङ इङको द्याङ ताइको र्हाइ झामा पाहि रो पिर मानितेङ हानिहि, हाइदोनु इङकोदोसा हेन्जाङ टाका काउरि हिघाहि।
23कालाउ इसु कोरबितिङ खान्तेङ ताइको चात्यागेलाइहेङ दोअ्हि, “धनिगेलाइहेङ स्वरगको सारभिता दुल्लि हेथे मुस्किल हि।” 24इसुको दोअ्का इदोइ काथाता चात्यागेलाइ भारभुसाइहि। कालाउबुङ वा आरोङ एम्बालाइहेङ दोअ्हि, “जामालाइ, टाका काउरिता आस ताअ्कालाइ स्वर्गको सारभिता दुल्लि मुस्किल हि। 25मालिक द्याङहेङ स्वरगको सारभिता दुल्काखान्तेङ ते भुरुङ बिन्दुको कानासो उटहेङ दुल्लि सुकाका ज्यावा।” 26इदोइ हिङतेङ चात्यागेलाइ झन भारभुसाइतेङ इसुहेङ दोअ्हि, “एन्सा पानु हासु छुटकारा निङलि द्वाङ?” 27इसु एम्बालाइहेङ खान्तेङ दोअ्हि, “इदोइ द्याङगेलाइको भाअ्सिङ ते मादोका हि, कालाउबुङ परमेस्वरको भाअ्सिङ हाइदोङ माको, हाइपानु परमेस्वरको भाअ्सिङ गोताङ काम जेङलि दोखे।”
28कालाउ पत्रुस इसुहेङ दोअ्हि, “खाङ, केलाइ गोताङ लाअ्न्हाहि रो नासेहेङ पिताइदोङन्हाखे।” 29इसु दोअ्हि, “जातिङको का नेलाइहेङ दोअ्खा, जाइ काङको भाअ्सिङ रो रेम्काबानालको भाअ्सिङ दादाओने, बाइओने आबा आमाइ, चानचामिन्दिगेलाइ, साअ्द्वार रो मिलिङ लाअ्खे, 30इङको सान्ताइका दोसादोसाङ साइ गुना हेन्जा दादाओने, बाइओने आबा आमाइ, चानचामिन्दिगेलाइ, साअ्द्वार रो मिलिङ इदोङ पहरता निनावा। कालाउ लोका जुगता हेअ्लाउ मामुअ्का जिबन निनावा। 31कालाउबुङ लाम्फा जेङकालाइ न्हुअ्तावा रो न्हुअ्कालाइचाहिँ लानावा।”#मत्ति २०:१६; लुका १३:३०
इसु सुमखे ताइको सिकाको बारेता काथा पाका
(मत्ति २०:१७-१९; लुका १८:३१-३४)
32ओबालाइ यरुसलेमभारि हानिदोङघाहि, इसु चात्यागेलाइको आगाआगा तेदोङघाहि। चात्यागेलाइ भारभुसाइका हिघाखे रो बो न्हअ्न्हुअ् लोकालाइ थिका हिघाखे। कालाउ वा ताइको तेन्हे चात्यागेलाइहेङ आरोङ एअ्पाहा चुमपुतेङ ताइमिर्हुता जेङलि तोम्का काथागेलाइ एम्बालाइहेङ हिङपाहि। 33वा दोअ्हि, “खाङसु, केलाइ यरुसलेम हानिदोङन्हाखे। इन्ता का द्याङको चानहेङ मुल धामिगेलाइ रो धरम मास्टरगेलाइको खुरता जिम्मा प्यावा। एम्बालाइ वासेहेङ सेअ्लि गोयाङ दोअ्तेङ बोजात्यागेलाइको खुरता जिम्मा प्यावा। 34कालाउ एम्बालाइ वासेहेङ गिल्ला पावा, थोअ्तावा, छरि म्हेअ्तावा रो सेअ्तावा। कालाउबुङ वा सितेङ आरोङ सुम्निता सिन्हुतावा।”
याकुब रो युहन्नाको बिम्ति
(मत्ति २०:२०-२८)
35इङकोन्हुअ्सो जब्दियाको न्हेमि चानगेलाइ, याकुब रो युहन्ना इसुकोता लोतेङ दोअ्हि, “मास्टर, केलाइ नादोफा हाइ र्हेन्हाखे ना केलाइको भाअ्सिङ पि दोअ्का केलाइको इछा हि।” 36इसु एम्बालाइहेङ हिअ्हि, “नेलाइको भाअ्सिङ का हाइ पाप्याको दोअ्का नेलाइको इछा हि?” 37एम्बालाइ इसुहेङ दोअ्हि, “नाङको पारतापता केलाइता एअ्मिहेङ नाङको दाम्पाहा रो भेनेङहेङ नाङको केपाहा योम्लि निङका मन्जुरि केलाइहेङ पि।” 38कालाउबुङ इसु एम्बालाइहेङ दोअ्हि, “नेलाइ हाइ र्हेदोङसुखेना, इङको नेलाइ मागिस्वाना। हाइ जेदोङ तु:को बातिसो का आमाङका, इङको नेलाइ आम्लि दोस्वाना? का जेदोङ चिभुअ्लि र्हुका हिघा हाइ नेलाइ बुङ र्हुलि दोस्वाना?”#लुका १२:५० 39एम्बालाइ वासेहेङ दोअ्हि, केलाइ द्वाङ। इसु एम्बालाइहेङ दोअ्हि, “जेदोङ तु:को बातिसो का आमाङका, इङको नेलाइ आमस्वाना रो जेदोङ चिभुअ्लि का र्हुका हिघा इङको नेलाइ र्हुस्वाना। 40कालाउबुङ काङको दाम्पाहा रो काङको केपाहा योम्लिपिलिचाहिँ का पिका माको, इदोइ ते जाइको भाअ्सिङ त्यार पातेङ ताअ्काहि वासेहेङ प्यावा।”
41इदोइ हिङतेङ तेमिङ चात्यागेलाइ याकुब रो युहन्नादोफा चेरताम्पाहि। 42कालाउ इसु एम्बालाइहेङ ताइकोता काइतेङ दोअ्हि, “नेलाइ गिसुखेना, बोजात्यागेलाइता राज पाकालाइ नेलाइहेङर्हुता हक चालायावा। कालाउ नेलाइको बाबारकालाइ नेलाइर्हुता खाबारा पावा।#लुका २२:२५-२६ 43नेलाइताचाहिँ एन्सा माज्याको। कालाउबुङ नेलाइता जाइ बारालि इछा पाखे, इङको नेलाइको सेवा पालि गोयावा।#मत्ति २३:११; मरकुस ९:३५; लुका २२:२६ 44कालाउ नेलाइता लाङलि इछा पाखे, इङको झाराङको कामत्या जेङलिङगोयाङ। 45हाइपानु का द्याङको चान सेवा निङलि माको, कालाउबुङ सेवा पालि रो हेन्जाङहेङ लाअ्पालि भाअ्सिङ ताइको जिबन भोक पिलि लोका।”
इसु मिँ मातिङका बारतिमाइहेङ एल्पाका
(मत्ति २०:२९-३४; लुका १८:३५-४३)
46इङकोन्हुअ्सो इसु चात्यागेलाइदोफा यरिहोता लोहि। वा ताइको चात्यागेलाइ रो हेन्जाङ द्याङगेलाइसुदाङ यरिहोसो ओल्हिलाउ तिमाइको चान बारतिमाइ दोअ्का एअ्मि कान्हा र्हेतेङ चाका, दामाको आलिता योम्तेङ हिघाहि। 47जेलाउ वा नासरतको इसु लोका हि दोअ्का हिङतेङ र्हिकाइतेङ दोअ्हि, “दाउदको चान#१०:४७ दाउदको चान यहुदिगेलाइ “ख्रिस्ट इसु” दाउदको खालसो ल्वाङ दोअ्तेङ आस पाका हिघाखे। इसु, कासेहेङ दाया पा।”
48इन्ता हिका हेन्जाङ द्याङगेलाइ वासेहेङ सिकापा हि दोअ्तेङ हाकाराइहि। कालाउबुङ वा झन बारका गालापातेङ र्हिकाइतेङ दोअ्हि, “ओइ दाउदको चान, कासेहेङ दाया पा।” 49कालाउ इसु थिङगापा जाअ्तेङ दोअ्हि, “इङकोहेङ काइसु।” कालाउ एम्बालाइ इङको कान्हाहेङ एसा दोअ्तेङ काइहि, “ना लेन्चा, वा नासेहेङ काइदोङखे, मारफा लोउ!” 50कालाउ ताइको गुअ्का धाबा थालतेङ इङको जुरुक्पा ल्होहि रो इसुकोता लोहि। 51इसु इङकोहेङ दोअ्हि, “ना हाइ भोखेना, का नाङको भाअ्सिङ हाइ पाप्याङका?” इङको कान्हा बिम्ति पातेङ इसुहेङ दोअ्हि, “मास्टर, का मिँ तिङलि निनाको।” 52कालाउ इसु इङकोहेङ दोअ्हि, “हाने, नाङको खान्धुरसो एला ना मिँ तिङका जेङन्हा।” ओदोङघरि इङको मिँ तिङका जेङहि रो इसुहेङ पिताइहि।
Currently Selected:
मरकुस 10: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
