युहन्ना 19
19
इसुहेङ कुरुसता टाङगाइलि हुकुम पिका
(मत्ति २७:१५-३१; मरकुस १५:६-२०; लुका २३:१३-२५)
1कालाउ पिलातस इसुहेङ चुम्पुतेङ छरि म्हेअ्लि हुकुम पिहि। 2छरि लागाइकान्हुअ्सो सिपाल्हाइगेलाइ इसुहेङ चुइको सिरपेच रो बेङगाना रङको राजाको लागाइकाभाइका धाबा होङपापिहि। 3कालाउ वाको भेरपा लोतेङ दोअ्हि, “यहुदिगेलाइको राजाहेङ सेउपाखा!” दोअ्तेङ निन्दा पातेङ चाउर्हिलि तेङहि।
4आरोङ बाहार ओल्हितेङ पिलातस एम्बालाइहेङ दोअ्हि, “खाङसु, का यासेहेङ नेलाइकोता बाहार चुमादोङखा रो नेलाइहेङ दोअ्लि भोखा, का याकोता हाइदोङ दुस मानिङखा।” 5कालाउ चुइको सिरपेच रो बेङगाना रङको धाबा होङतेङ इसु बाहार लोहि रो पिलातस एम्बालाइहेङ दोअ्हि, “खाङसु, इदोइ द्याङहेङ!”
6जेलाउ मुल धामिगेलाइ रो पालेगेलाइ इसुहेङ तिङहि, कालाउ एम्बालाइ एसा दोअ्तेङ र्हिकाइलि तेङहि, “इङकोहेङ कुरुसता टाङगाइ, इङकोहेङ कुरुसता टाङगाइ!”
पिलातस एम्बालाइहेङ दोअ्हि, “एन्सानु नेलाइदोङ यासेहेङ चुम्पुतेङ कुरुसता टाङगाइसु, हाइदोनु का याता हाइदोङ कसुर मानिङखा!”
7यहुदि आगुवागेलाइ वासेहेङ दोअ्हि, “केलाइको न्याम आन्सार इङको सिलिङगोयाङ। हाइपानु या ताइमिहेङ परमेस्वरको चान हिघा दोअ्तेङ दोअ्का हि।”
8इदोइ काथा हिङतेङ पिलातस आरोङ थिहि। 9वा आरोङ महललिअ्ता दुल्हि रो इसुहेङ हिअ्हि, “ना हिताको हिन्हा?” कालाउबुङ इसु वासेहेङ हाइदोङ मादोहि। 10इदोइभाअ्सिङ पिलातस वासेहेङ दोअ्हि, “हाइ ना कादोफा माधुयाना? नासेहेङ लाअ्पिका रो कुरुसता टाङगाइका खाबारा कादोफा हि दोअ्का हाइ ना मागिखेना?”
11इसु दोअ्हि, “नासेहेङ र्हुतासो मापिका हिनु कार्हुता नाङको हिदिङ खाबारा माहिधावा। इङकोभाअ्सिङ कासेहेङ नाङको खुरता पिका आरोङ हेन्जा पापको दुसि जेनावा।”
12इङकोन्हुअ्सो पिलातस इसुहेङ लाअ्पिलि हेन्जा बल पाहि। कालाउबुङ यहुदि आगुवागेलाइ एसा दोअ्तेङ र्हिकाइहि, “एदि ना इङकोहेङ लाअ्पिन्हा पानु ना काइसरको सानाइति मान्थुन्हा। जाइ ताइमिङहेङ राजा दोअ्तेङ जिकिर पाखे इङको काइसरको खिलापता जाअ्खे।”
13पिलातस इदोइ काथा हिङतेङ इसुहेङ बाहार चुमाहि रो वा “उन्ठुइको पाउवा” दोअ्का थामेता (जाइहेङ हिब्रु राउता गब्बथा दोअ्खे) चुम्पुहि। इन्ता पिलातस निया पाका थामेता योम्हि। 14इङको पहर लाअ्पिका पारबाको लाङ दिना हिघाहि। एन्सालाउ नितिमाको तेन्हे बजेका हिघाहि रो पिलातस यहुदि आगुवागेलाइहेङ दोअ्हि, “खाङसु, नेलाइको राजा!”
15कालाउबुङ एम्बालाइ एसा दोअ्तेङ र्हिकाइहि, “चुम्पु, चुम्पु, इङकोहेङ कुरुसता टाङगाइ!”
पिलातस एम्बालाइहेङ हिअ्हि, “हाइ का नेलाइको राजाहेङ कुरुसता टाङगायाङका?”
मुल धामिगेलाइ दोअ्हि, “काइसरबाहेक केलाइको बो हिदिङ राजा मान्थु।”
16कालाउ पिलातस इदोइ काथा हिङतेङ इसुहेङ कुरुसता टाङगाइलि एम्बालाइको खुरता पिहि। सिपाल्हाइगेलाइ बुङ इसुहेङ जिमा र्हुहि।
इसु कुरुसता
(मत्ति २७:३२-४४; मरकुस १५:२१-३२; लुका २३:२६-४३)
17इसु ताइको कुरुस ताइमिङ फातेङ खप्परे दोअ्का आरदाङता हानिहि, जाइहेङ हिब्रु राउता गलगथा दोअ्खे। 18इन्ता एम्बालाइ वासेहेङ काटि तातेङ कुरुसता टाङगाइहि। एन्साङपातेङ वाको दाम्पाहा रो केपाहा बो न्हेमिहेङ बुङ भेनेङ भेनेङ कुरुसता टाङगाइहि। इसु एम्बालाइको माझाता टाङगाइन्हाका हिघाहि।
19पिलातस एलोङ दुस चिथि बुङ लेखितेङ कुरुसर्हुता टाङगाइपिहि। जाइ इस्का लेखिका हिघाहि, “नासरतको इसु यहुदिगेलाइको राजा।” 20इङको दुस चिथि हेन्जाङ यहुदिगेलाइ पर्हिहि, हाइदोनु इसु कुरुसता टाङगाइन्हाका थामे पुरको भेरपाङ हिघाहि। इङको चिथि हिब्रु, ल्याटिन रो ग्रिक राउता लेखिका हिघाहि। 21कालाउ यहुदिगेलाइको मुल धामिगेलाइ पिलातसहेङ दोअ्हि, “‘यहुदिगेलाइको राजा’ दोअ्का माको, कालाउबुङ ‘या का यहुदिगेलाइको राजा दोअ्हि’ दोअ्तेङ लेखिपि।”
22पिलातस एम्बालाइहेङ दोअ्हि, “का जेदोङ लेखिघा, इङको लेखिहोइघा।”
23जेलाउ सिपाल्हाइगेलाइ इसुहेङ कुरुसता टाङगाइहि, कालाउ एम्बालाइ वाको लोखोन र्हुतेङ ताताइमिता बाखाराइहि। वाको बाहारको धाबा बुङ र्हुहि, कालाउबुङ इङको धाबाचाहिँ माजोका र्हुतासो लेताथिकापा थिरतेङ बान्हाइका हिघाहि।
24इदोइभाअ्सिङ एम्बालाइ ताताइमिता दोअ्हि, “इदोइचाहिँ माथेअ्ताइने, कालाउबुङ इदोइ हासुको ज्याङ दोअ्तेङ चिठा ह्वाअ्ताइने।” धरमकिताब पोङघाको दोअ्तेङ दोङ इदोइ जेङका हिघाहिः
“एम्बालाइ काङको लोखोन ताताइमिता बाख्राइहि
रो बाहारको धाबाचाहिँ चिठा ह्वाअ्हि।”#ले २२:१८
25इदोइभाअ्सिङ सिपाल्हाइगेलाइ इदोइ काम पाहि। कालाउ इसुको कुरुस भेरपाङ वाको आमाइ, वाको माउसि, क्लोपासको बेअ् मरियम रो मरियम मग्दलिनि जाअ्तेङ हिघाखे। 26जेलाउ इसु ताइको आमाइ रो वाको माया पाका चात्या भेरपा जाअ्तेङ हिका तिङहि। कालाउ वा ताइको आमाइहेङ दोअ्हि, “आमाइ, खाङ, नाङको चान!” 27कालाउ इङको चात्याहेङ बुङ वा दोअ्हि, “खाङ, नाङको आमाइ!” इङको पहरसो इङको चात्या इसुको आमाइ मरियमहेङ ताइकोङ साअ्ता चुम्पुहि।
इसु कुरुसता सिका
(मत्ति २७:४५-५६; मरकुस १५:३३-४१; लुका २३:४४-४९)
28इङकोन्हुअ्सो इसु गोताङ काम दोहोइ दोअ्का गितेङ धरमकिताब पोङघाको दोअ्तेङ दोअ्हि, “का आम्लि किअ्घा।”#ले २२:१५; ६९:२१ 29इन्ता आङगुरको झोलहोइ पोङघाका एलोङ भान्दा ताअ्का हिघाहि। इङको आङगुरको झोलता चेन्थारा चोभेरतेङ र्हिङका नाले पासिम्ता खेअ्पातेङ सिपाल्हाइगेलाइ इसुको नुइता लागाइपिहि। 30जेलाउ इसु इङको आङगुरको झोल र्हुहि, कालाउ वा दोअ्हि, “एला दोहोइ!” कालाउ वा पुरिङ तुघुरपातेङ पारान लाअ्पिहि।
इसुको कोखेता बाका
31इङको दिना माइसाका दिनाको लाङ दिना हिघाहि। इदोइभाअ्सिङ यहुदि आगुवागेलाइ इङको जरुरि माइसाका दिनाता सिका जिउगेलाइ कुरुसता माह्याको दोअ्तेङ पिलातसहेङ पारथाना पाहि रो एम्बालाइको खोकोइ थुरतेङ एम्बालाइको जिउ चुमप्वाको दोअ्तेङ र्हेहि। 32कालाउ सिपाल्हाइगेलाइ लोतेङ इसुदोफाङ कुरुसता टाङगाइन्हाकालाइता लाम्फा एअ्मिको, इङकोन्हुअ्सो भेनेङको खोकोइ थुरपिहि। 33जेलाउ एम्बालाइ इसुकोता लोहि कालाउ एम्बालाइ तिङहि, वा लाम्फादोङ सिलिदोका हिघाहि रो वाको खोकोइ माथुरपिहि। 34कालाउ एअ्मि सिपाल्हाइ इसुको कोखेता बाहि रो ओदोङघरि हिति रो चि ओल्हिहि। 35नेलाइ बुङ खान्धुर पालि दोसु दोअ्तेङ इदोइ तिङकालाइ दासि पिका रो वाको दासि जातिङको हि रो जातिङको दोअ्तेङ वा गिखे। 36“वाको हिदि बुङ हारा माथुरावा” दोअ्का धरमकिताबको बचन पोङघाको दोअ्तेङ इदोइ जेङलि लोहि।#दामालाअ्का १२:४६; गान्देका ९:१२; ले ३४:२० 37कालाउ आरोङ भेनेङ थामेता धरमकिताबता एसा दोअ्खे, “जाइहेङ एम्बालाइ बाका हि, एम्बालाइ वासेहेङ खानावा।”#जकरिया १२:१०; पारकास १:७
इसुहेङ तोमता ताअ्का
(मत्ति २७:५७-६१; मरकुस १५:४२-४७; लुका २३:५०-५६)
38आरिमाथिया पुरसो लोका योसेफ मिङ हिका एअ्मि चात्या हिघाखे। यहुदि आगुवागेलाइदोफा थितेङ इङको बोमिहेङ मागेपासिङ इसुहेङ खान्धुर पाका हिघाखे। इङको वाआङ पिलातसकोता लोतेङ इसुको सिका जिउहेङ चुम्पुलि निनाको दोअ्तेङ पारथाना पाहि। कालाउ पिलातस चुम्पुलि हुकुम पिहि रो इङको इसुकोता लोतेङ वाको सिका जिउ चुम्पुहि। 39कालाउ इसुहेङ न्हिसिङ दुसुलि लोका निकोदेमस बुङ योसेफदोफाङ हिघाखे। इङकोचाहिँ एअ्कुरितेसुम किलो झोको मुरर रो एलवा सिङसो बान्हाइका मालामालाका आतर चुम्तेङ लोका हिघाखे।#युहन्ना ३:१-२ 40एसापा एम्बालाइ इसुको सिका जिउहेङ यहुदि रितआन्सार मालामालाका आतरदोफा मानचाउलिहोइ लुन्दाइहि रो तोमता ताअ्लि त्यार पाहि। 41इसु कुरुसता टाङगाइन्हाका थामेको भेरपाङ एलोङ बागान हिघाहि। इङको बागानता हेअ्लाउ हासुङ माताअ्का एलोङ नावा तोम हिघाहि। 42हाइपानु इङको दिना यहुदिगेलाइको माइसाका दिनाको साजेका दिना हिघाहि। कालाउ इङको तोम बुङ भेरपाङ हिघाहि रो एम्बालाइ इसुको सिका जिउहेङ इङकोङ तोमता चुम्पुतेङ ताअ्हि।#१९:४२ माइसाका दिना सुरु जेङलि तोम्का हिघाहि, इदोङभाअ्सिङ माइसाका दिनाको साजेका दिनाखान्तेङ लाम्फा भेरपाङको तोम्ता इसुको सिका जिउहेङ ताअ्हि।
Currently Selected:
युहन्ना 19: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
