युहन्ना 12
12
बेथानियाता इसु
(मत्ति २६:६-१३; मरकुस १४:३-९)
1लाअ्पिका पारबाको तु दिनालाम्फा इसु बेथानियाता लोहि। इन्ता लाजरस हिघाखे, जाइहेङ इसु सिकासो सिन्हुपाका हिघाहि। 2एम्बालाइ वाको भाअ्सिङ इन्ता दिलिमाको उम त्यार पाहि। मारथा उम चोदोङघाहि, लाजरस बुङ इसु रो बो बान्सालाइदोफाङ चालि योम्काहिघाखे। 3कालाउ मरियम आधा लिटर झोको जाङका जटामसिको मालामालाका आतर चुमातेङ इसुको खोकोइता लागाइपिहि। कालाउ वाको खोकोइ ताइको पुसिङहोइ योअ्हि रो आतरको मालामालाहोइ साअ् पोङघाहि।#लुका ७:३७-३८
4कालाउ इसुको चात्यागेलाइता एअ्मि जाइ वासेहेङ रिम्पालि भोका यहुदा इस्करियोत दोअ्हि, 5“इदोइ आतर सुमसाइ रुपाको टाका#१२:५ सुमसाइ रुपाको टाका इदोइ सुमसाइ रुपाको टाकाचाहिँ एअ्मि द्याङको एअ्बाअ्सारको जेला झोको जेङखे। ता पिअ्तेङ इङको टाका गरिबगेलाइहेङ पिनु माजेङधाङ?” 6कालाउबुङ इङको गरिबगेलाइको ख्याल ताअ्तेङ इदोइ दोअ्का मान्थुघाखे। हाइपानु इङको खुका हिघाहि रो टाकाको जाबि इङकोङ ताअ्घाखे, कालाउ इन्तासो खुघाखे। 7इसु दोअ्हि, “यासेहेङ हाइदोङ मादोसु, कासेहेङ लिअ्लिको भाअ्सिङ यासेहेङ इङको पालि पिसु। 8हाइदोनु गरिबगेलाइ दिनाङ नेलाइदोफा ह्यावा, कालाउबुङ काते दिनाङ नेलाइदोफा माह्याङका।”#न्याम १५:११
9इसु बेथानियाता हि दोअ्का गितेङ हेन्जाङ यहुदिगेलाइ इन्ता लोहि। एम्बालाइ इसुहेङ खिनिङ माको, कालाउबुङ वा सिकासो सिन्हुपाका लाजरसहेङ बुङ खाङलि दोअ्तेङ लोका हिघाखे। 10इङकोभाअ्सिङ मुल धामिगेलाइ लाजरसहेङ बुङ सेअ्लि बिचार पाहि। 11हाइदोनु लाजरस पातेङ यहुदिगेलाइता हेन्जाङ खेङन्हातेङ इसुहेङ खान्धुर पालि तेङका हिघाखे।
यरुसलेमता इसुहेङ मान पाका
(मत्ति २१:१-११; मरकुस ११:१-११; लुका १९:२८-४०)
12जुम्निदिना लाअ्पिका पारबाता लोका हेन्जाङ द्याङगेलाइ इसु यरुसलेमता लोदोङखे दोअ्का हिङहि। 13कालाउ एम्बालाइ सोर्हाइको दालेङगेलाइ चुम्तेङ वासेहेङ सेउपालि र्हिकाइतेङ ओल्हिहि,
“जाय ज्याको! सहसाम्पा परमप्रभुको मिङता लोका इस्राएलको राजा!”#ले ११८:२५-२६
14कालाउ गाधाको एलोङ चान निङतेङ इसु इङकोर्हुता धोल्हि, जिसिका लेखिका हिः
15“यरुसलेमको द्याङगेलाइ, माथिसु।
खाङ, नाङको राजा गाधाको चानर्हुता धोल्तेङ लोदोङखे।”#जकरिया ९:९
16इङको काथागेलाइ वाको चात्यागेलाइ लाम्फा मागिहि। कालाउबुङ इसुको पारताप जेङकान्हुअ्सो इदोइ काथा वाको बारेता लेखिका हिघाहि रो इदोइ काम वाको भाअ्सिङ एम्बालाइ पाका दोअ्का एम्बालाइ फोमपाहि।
17इसु लाजरसहेङ तोमसो काइतेङ सिकासो सिन्हुपालाउ वाको दोसाता हिका हेन्जाङ द्याङगेलाइ वाको दासि पितेङ दोङ हि। 18वा इदोइ भारभुसाइका काम हिघाहि दोअ्तेङ हिङका हिनाङ बुङ हेन्जाङ द्याङगेलाइ वासेहेङ दुसुलि हानिका हिघाखे। 19कालाउ फरिसिगेलाइ एअ्मि भेनेङहेङ दोअ्लि तेङहि, “खोइ, केलाइ हाइदोङ पालि मादोन्हाहि। तिङदोङसुखेना दुनियाङ इङकोहेङ पिताइलि दोहोइ।”
ग्रिकगेलाइ इसुहेङ भोका
20लाअ्पिका पारबाता उपासाना पालि हानिकालाइता आधिमि बोजात्यागेलाइ बुङ हिघाखे। 21एम्बालाइ गालिलको बेथसेदाता हिका फिलिपकोता लोतेङ एसा दोअ्तेङ बिम्ति पाहि, “मास्टर केलाइ इसुहेङ दुसुलि भोन्हाखे।” 22फिलिप हानितेङ आन्द्रियासेहेङ दोअ्हि, कालाउ आन्द्रियास रो फिलिप हानितेङ इदोइ काथा इसुहेङ हिङपाहि।
23इसु एम्बालाइहेङ दोअ्हि, “एला का द्याङको चानको पारताप जेङका पहर लोका हि। 24जातिङको, का नेलाइहेङ दोअ्खा, गोहोमको सिहाँ भोनोता बिअ्न्हातेङ मासिहि पानु इङको एलोङ हिखे। कालाउबुङ इङको सिहि पानु इङको हेन्जाङ फल सेपाखे। 25एन्साङपातेङ ताइको जिबनहेङ दाया पाकालाइ इङको राम्पाखे। कालाउबुङ ताइको जिबनहेङ इदोइ दुनियाता म्हुइका दोअ्कालाइ हेअ्लाउ मामुअ्का जिबनको भाअ्सिङ इङको जोगाइतेङ ताअ्खे।#मत्ति १०:३९; १६:२५; मरकुस ८:३५; लुका ९:२४; १७:३३ 26जाइ काङको कामत्या जेङलि भोखे इङको कासेहेङ पितायाको रो का जेता हिघा, काङको सेबक बुङ इन्ता ह्यावा। जाइ काङको कामत्या जेङखे पानु आबा इङकोको मान पावा।
27 “एला काङको मन हेन्जाङ तु:का हि, का हाइ दोअ्ताङका? ‘आबा, कासेहेङ इदोइ तु:सो बान्चिपा’ दोअ्ताङका? माको, इदोङभाअ्सिङ दोङ का इदोइ तु:थिकापा लोका हिघा। 28आबा, नाङको मिङको पारताप पा।”
कालाउ स्वरगसो इस्का गाला लोहि, “का इङको पारताप पाका हिघा रो आरोङ पाङका।” 29इन्ता जाअ्तेङ हिका द्याङगेलाइ इदोइ हिङतेङ दोअ्हि, “इदोइ बादेल गुरगुराइका!” आधिमि दोअ्हि, “स्वरगदुत वादोफा धुइका!”
30इसु एम्बालाइहेङ दोअ्हि, “इदोइ गाला काङको भाअ्सिङ जेङका माको, कालाउबुङ नेलाइको भाअ्सिङ। 31एला इदोइ दुनियाको निया ज्याङ। इदोइ दुनियाको राज पाका बाहार थालन्हावा। 32कालाउ जेलाउ का सुमिङसो तोल्हेन्हाङका, का गोताङ द्याङहेङ ताइमिभारि हेराङका।” 33इदोइ काथा इसु वा हेसापा सिलिगोयाङ इङको तिङपालिकोभाअ्सिङ इदोइ बारेता दोअ्का हिघाहि।
34द्याङगेलाइ वासेहेङ हिअ्हि, “ख्रिस्ट दिनाङ ह्यावा दोअ्का न्यामसो केलाइ हिङका हिन्हाहि। कालाउबुङ द्याङको चान तोल्हेन्हालिङ गोयाङ दोअ्तेङ ना हेसापा दोअ्लि द्वाना? इदोइ द्याङको चानचाहिँ हासु?”#ले ११०:४; यासाइया ९:७; इजकिएल ३७:२५; दानिएल ७:१४
35इसु एम्बालाइहेङ दोअ्हि, “आरोङ आतुइसा पहरथिकापा फाइसालाम्का नेलाइको माझाता ह्यावा। फाइसालाम्का नेलाइदोफा हिपाधाउ तेगिल्सु, कालाउ कितिकितिका नेलाइहेङ माथुमाको। जाइ कितिकितिकाता हिगिल्खे पानु, इङको हिसो हानिदोङखा, इङको मागिखे। 36जेलाउथिकापा फाइसालाम्का नेलाइदोफा हि जोल्काता खान्धुर पासु रो नेलाइ फाइसालाम्काको चानचामिन्दि जेङस्वाना।” इदोइ काथा दोअ्कान्हुअ्सो, इसु इन्तासो हानिहि रो एम्बालाइसो म्होअ्तेङ हि।
यहुदिगेलाइ इसुहेङ खान्धुर मापाका
37इसु द्याङगेलाइको आगाता हेन्जाङ भारभुसाइका कामगेलाइ पाका हिघाहि, कालाउबुङ एम्बालाइ वासेहेङ खान्धुर मापाहि। 38कालाउ एसापा यासाइया परमेस्वर पाहासो धुइकाको बचन पोङघालि लोहिः
“परमप्रभु, केलाइको बानाल हासु खान्धुर पाहि?
कालाउ परमप्रभुको सरबङ हिका काम हासुहेङ तिम्पाहि?”#यासाइया ५३:१
39इदोइभाअ्सिङ एम्बालाइ खान्धुर पालि मादोहि रो यासाइया आरोङ एसा दोअ्हि:
40“परमेस्वर एम्बालाइको मि तुअ्पापिका हि
रो एम्बालाइको कोन्धाङ थाङपापिका हि।
एसापा एम्बालाइ मिहोइ मातिनाको,
कालाउ कोन्धाङहोइ माग्याको,
माकुनुते एम्बालाइ घुर्यावा,
कालाउ का एम्बालाइहेङ एल्पालि गोयाङ।”#यासाइया ६:१०
41यासाइया इदोइ काथा दोअ्हि, हाइपानु इङको वाको पारताप तिङहि रो वाको बारेता दोअ्हि।
42कालाउबुङ हेन्जाङ यहुदि आगुवागेलाइ इसुहेङ खान्धुर पाहि, कालाउबुङ फरिसिगेलाइ एम्बालाइहेङ कचहरिसाअ्सो ओल्हिपागिलाङ दोअ्तेङ थितेङ इङको मन्जुर मापाहि। 43हाइदोनु एम्बालाइ परमेस्वरको बाखिन्काखान्तेङ द्याङको बाखिन्का हेन्जा मोन्दाताघाखे।
खान्धुर मापाका दुसि ज्यावा
44इसु बारका गालाता दोअ्हि, “कासेहेङ खान्धुर पाकालाइ कासेहेङ माको, कालाउबुङ कासेहेङ दिङगिल्काहेङ खान्धुर पाखे। 45जाइ कासेहेङ तिङखे, इङको कासेहेङ दिङगिल्काहेङ तिङखे। 46का दुनियाता फाइसालाम्का जेङतेङ लोका हिघा, कालाउ कासेहेङ खान्धुर पाका कितिकितिकाता माह्याको।
47 “जाइ काङको बचन हिङखे रो मासाअ्खे पानु, का इङकोको निया मापाङका। हाइदोनु का दुनियाको निया पालि लोका माको, कालाउबुङ दुनियाहेङ सिन्हुपालि लोका। 48कासेहेङ इन्कार पाका रो काङको बचन मार्हुकाको भाअ्सिङ दुसि ठर्हायावा। जाइ बचन का धुइघा इङको आखिरि दिनाता इङकोको दुसि ठर्हायावा। 49हाइदोनु का ताइकोङ पाहासो माधुइघा, कालाउबुङ का हाइ दोअ्लिगोइका रो हाइ धुइलिगोइका, कासेहेङ दिङगिल्का आबा ताइमिङ कासेहेङ हुकुम पिका हि। 50का गिखा, वाको हुकुम हेअ्लाउ मामुअ्का जिबन। इदोइभाअ्सिङ का जेदोङ धुइखा, आबा कासेहेङ दोअ्का भाइपाङ धुइखा।”
Currently Selected:
युहन्ना 12: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
