युहन्ना 11
11
लाजरसहेङ सिन्हुपाका
1लाजरस मिङको एअ्मि द्याङ मासाअ्धेका हिघाखे। इङको मरियम रो वाको बाइ मारथाको देरा बेथानियाको हिघाखे।#लुका १०:३८-३९ 2प्रभुहेङ आतर लाइपितेङ वाको खोकोइ ताइको पुसिङहोइ योअ्पिका मरियम या दोङ हिघाहि। याकोङ ओने लाजरस मासाअ्धेका हिघाखे।#युहन्ना १२:३ 3इदोइ न्हेमि बाइओने इसुकोता एसा दोअ्तेङ बानाल पिगिल्हि, “प्रभु, जाइहेङ ना दायाखेना, इङको मासाअ्धेका हि।”
4इदोइ बानाल हिङतेङ इसु दोअ्हि, “इदोइ मासाअ्धेकाहोइ सिकाता माथुकापाङ, कालाउबुङ या परमेस्वरको पारतापकोभाअ्सिङ, कालाउ इदोइसो परमेस्वरको चानको पारताप ज्याको।” 5इसु मारथा, इङकोको ओने मरियम रो लाजरसहेङ माया पाघाखे। 6कालाउबुङ लाजरस मासाअ्धेका हि दोअ्का हिङतेङ वा जेता हिघाहि, आरोङ न्हे दिना इन्ताङ हि।
7इङकोन्हुअ्सो इसु चात्यागेलाइहेङ दोअ्हि, “ते एला केलाइ आरोङ यहुदिया घुरितेङ हानाइने।”
8चात्यागेलाइ वासेहेङ दोअ्हि, “मास्टर, एलाङखिनिङ यहुदिगेलाइ नासेहेङ उन्ठुइ तोलि भोघाखे, हाइ आरोङ ना इन्ताङ हानाना?”
9इसु दोअ्हि, “हाइ एअ्निता तेन्हे घान्टा माजेङखे कुनु? दिनाता हिगिल्कालाइचाहिँ माबोखेखे, हाइदोनु इङको इदोइ दुनियाको फाइसालाम्का तिङखे। 10कालाउबुङ न्हिसिङता हिगिल्कालाइ बोखेन्हाखे, हाइदोनु इङको द्याङता फाइसालाम्का मान्थुखे।”
11इङकोन्हुअ्सो इसु एम्बालाइहेङ दोअ्हि, “केलाइको सानाइति लाजरस निन्धाता परेका हि, कालाउबुङ इङकोहेङ निन्धासो ल्होपालि का इन्ता हानाङका।”
12चात्यागेलाइ वासेहेङ दोअ्हि, “प्रभु, इङको निन्धाता परेका हि पानु इङको एलावा।” 13इसु इङकोको सिकाको बारेता दोअ्का हिघाखे, कालाउबुङ एम्बालाइचाहिँ जातिङको निन्दाको बारेता दोअ्का फोमपाहि।
14इसु एम्बालाइहेङ सोझाङ दोअ्पिहि, “लाजरस सिहोइ। 15नेलाइ खान्धुर पासु दोअ्तेङ नेलाइको भाअ्सिङ का इन्ता मान्थुकाता लेङचाका हिघा। जेदोङ जेङलाउ बुङ केलाइ इङकोता हानाइने।”
16कालाउ दिदुमस दोअ्का थोमा ताइको दोसाङको चात्यागेलाइहेङ दोअ्हि, “ते, केलाइ बुङ हानाइने रो वाकोदोफाङ स्याइने।”
इसु लाजरसहेङ सिन्हुपाका
17जेलाउ इसु बेथानियाता थुकालिलोहि, कालाउ लाजरसहेङ तोमता ताअ्का द्यानि जेङका हिघाहि। 18बेथानिया यरुसलेमसो सुम किलोमिटर झोको दुरे हिघाहि। 19हेन्जा यहुदिगेलाइ मारथा रो मरियमकोता इङकोको ओने सिकाता थुमथुमाइ पिलि लोका हिघाखे। 20इसु लोदोङखे दोअ्का हिङतेङ मारथा हानिहि रो वासेहेङ दामाताङ दुसुहि, कालाउबुङ मरियम साअ्ताङ हि।
21कालाउ मारथा इसुहेङ दोअ्हि, “प्रभु, ना इता हिनुते काङको ओने मासिधावा। 22कालाउबुङ एला बुङ का गिखा, ना परमेस्वरदोफा जेदोङ र्हेकाना, परमेस्वर नासेहेङ प्यावा।”
23इसु मारथाहेङ दोअ्हि, “नाङको ओने आरोङ सिन्हुतावा।”
24मारथा वासेहेङ दोअ्हि, “का गिखा, इङको आखिरिको दिनाता सिकालाइ सिन्हुकाता आरोङ सिन्हुतेङ ल्होकावा।”
25इसु इङकोहेङ दोअ्हि, “सिकासो सिन्हुपाका रो जिबन पिका कादोङ। कासेहेङ खान्धुर पाका सिलाउ बुङ सिन्हुतावा। 26कालाउ सिन्हुका रो कासेहेङ खान्धुर पाका झाराङ हेअ्लाउ मास्यावा। हाइ ना इदोइ काथा खान्धुर पाना?”
27मारथा वासेहेङ दोअ्हि, “प्रभु, का खान्धुर पाखा, ना दुनियाता लोका ख्रिस्ट, परमेस्वरको चान हिना।”
28इदोइ दोअ्तेङ मारथा हानिहि रो ताइको ओने मरियमहेङ काइतेङ सिपापा दोअ्हि, “मास्टर थुकालिलोहि रो नासेहेङ काइदोङखे।” 29इदोइ हिङतेङ मरियम ओदोङघरि ल्होतेङ वाकोता हानिहि। 30इङको पहरथिकापा इसु देराता थुकालिलोका मान्थुघाहि, कालाउबुङ वा इङकोङ थामेता हिघाहि जेता मारथा वासेहेङ दुसुका हिघाहि। 31साअ्ता इङकोहेङ थुमथुमाइ पिलि लोका यहुदिगेलाइ मरियम ओदोङघरि ल्होतेङ बाहार हानिका तिङतेङ, इङको ओनेको तोमता खारलि हानिका दोअ्का गितेङ इङकोहेङ पिताइहि।
32जेलाउ मरियम इसु हिका थामेता लोहि रो वासेहेङ तिङहि, कालाउ एसा दोअ्तेङ इङको वाको खोकोइता पोम्भेलेहि, “प्रभु, ना इता हिका हिनुते काङको ओने मासिधावा।”
33जेलाउ इसु मरियमहेङ खारतेङ हिका रो इङकोदोफा लोका यहुदिगेलाइ बुङ खारतेङ हिका तिङहि, कालाउ वा हाङसाता हेन्जाङ दुखि जेङहि। 34वा एम्बालाइहेङ हिअ्हि, “नेलाइ इङकोहेङ हिसो ताअ्का हिसुन्हा?”
एम्बालाइ वासेहेङ दोअ्हि, “प्रभु, लोतेङ खाङ।”
35इसु खारहि। 36इदोइ तिङतेङ यहुदिगेलाइ दोअ्हि, “खाङसु, वा लाजरसहेङ हेथे माया पाघाहि।”
37कालाउबुङ आधिमि दोअ्हि, “हाइ कान्हाको मिँ हेपिका या हाइ लाजरसहेङ बुङ सिकासो बान्चिपालि मादोधावा कुनु?”
38कालाउ इसु आरोङ हेन्जाङ दुखि जेङतेङ तोमता हानिहि। इदोइ तोम एलोङ गुफाता हिघाहि। इङकोको नुइ एलोङ उन्ठुइहोइ थुम्का हिघाहि। 39इसु दोअ्हि, “उन्ठुइ लाअ्पासु।”
सिका द्याङको बाइ मारथा वासेहेङ दोअहि, “प्रभु, इदोइ पहरथिकापा ते इङको न्हाम्लि तोमहोइ वाला, हाइपानु इङको सिका द्या दिना जेङहोइ।”
40इसु इङकोहेङ दोअ्हि, “हाइ का नासेहेङ ‘ना खान्धुर पान्हा पानु परमेस्वरको पारताप तिनाना’ दोअ्तेङ दोअ्का माको कुनु?”
41एम्बालाइ तोमको नुइसो उन्ठुइ लाअ्पाहि। कालाउ इसु र्हुता खान्तेङ दोअ्हि, “आबा, का नासेहेङ च्याबास दोअ्खा, हाइपानु ना काङको पारथाना हिङन्हा। 42का गिखा, ना काङको पारथाना जेलाउ बुङ हिङखेना। कालाउबुङ इता जाअ्कालाइको भाअ्सिङ का इदोइ दोअ्का। कालाउ ना कासेहेङ दिङगिल्का दोअ्तेङ एम्बालाइ खान्धुर पाको।”
43इदोइ काथा दोअ्कान्हुअ्सो वा बारका गालाहोइ र्हिकाइतेङ दोअ्हि, “लाजरस, बाहार ओल्हितेङ लोउ।” 44कालाउ इङको सिका लाजरस बाहार ओल्हितेङ लोहि। वाको पुरिङसो खोकोइथिकापाङ मान्चाउलि लुन्धाइन्हाका हिघाहि। कालाउ इसु एम्बालाइहेङ दोअ्हि, “इङकोको मान्चाउलि खाइपिसु रो इङकोहेङ हानिलि पिसु।”
इसुहेङ सेअ्लि भोका
(मत्ति २६:१-५; मरकुस १४:१-२; लुका २२:१-२)
45मरियमकोता लोका हेन्जाङ यहुदिगेलाइ इसुको पाका काम तिङतेङ वासेहेङ खान्धुर पाहि। 46कालाउबुङ एम्बालाइता आधिमिचाहिँ फरिसिगेलाइकोता हानिहि रो इसुको पाका कामगेलाइ दोअ्पिहि।
47मुल धामिगेलाइ रो फरिसिगेलाइ बाराकचहरिको सदसेगेलाइहेङ काइहि रो एम्बालाइहेङ दोअ्हि, “एला केलाइ हाइ पाङ? हाइदोनु इङको द्याङते हेन्जाङ चिनोगेलाइ पादोङखे। 48यासेहेङ एसाङ लाअ्पिन्हाहि पानु झाराङ यासेहेङ खान्धुर पावा रो रोमिगेलाइ लोतेङ केलाइको पुनित थामे रो केलाइको यहुदि जात्या न्हेमिहेङ मुअ्पा प्यावा।”
49कालाउबुङ एम्बालाइता एअ्मि काइयाफा, जाइ इङको बाअ्सारको बारका धामि हिघाखे, वा एम्बालाइहेङ दोअ्हि, “नेलाइ हाइ बुङ मागिसुखेना! 50गोताङ सारभि मुअ्का जेङकाखान्तेङ भुरुङ द्याङगेलाइको भाअ्सिङ एअ्मि द्याङ सिलिदोङ रेम्का ज्याङ दोअ्का नेलाइ मागिसुखेना?”
51इदोइ इङको ताइकोङ पाहासो दोअ्का मान्थुघाहि, कालाउबुङ इङको बाअ्सारको बारका धामि जेङका हिनाङ यहुदि जात्यागेलाइको भाअ्सिङ इसु सिलिगोयाङ दोअ्का काथा आगमबानि पाका हिघाहि। 52यहुदि जात्यागेलाइको भाअ्सिङ खिनिङ इङको इदोइ दोअ्का मान्थुघाहि, कालाउबुङ राइन्हातेङ हिका परमेस्वरको चानचामिन्दिगेलाइहेङ एदोसाङ जोम्पालि इदोइ दोअ्का हिघाहि। 53कालाउ इङको दिनासो एम्बालाइ वासेहेङ सेअ्लि साल्हा पाहि।
54इदोइभाअ्सिङ इसु आरोङ यहुदिगेलाइको माझाता खुलेआम माहिगिल्हि। कालाउबुङ इन्तासो उदादाङका थामेको भेरपा हिका एफ्राइम दोअ्का पुरता हानिहि रो इन्ता चात्यागेलाइदोफा हि।
55यहुदिगेलाइको लाअ्पिका पारबा लोलि तोम्का हिघाहि। देरा देरासो हेन्जाङ द्याङगेलाइ ताताइमिहेङ चोखाइलि दोअ्तेङ लाअ्पिका पारबा लाम्फादोङ यरुसलेमता हानिहि। 56कालाउ एम्बालाइ इसुहेङ भोहि, कालाउ एम्बालाइ थानता जाअ्लाउ ताताइमिता दोअ्लि तेङहि, “नेलाइहेङ हिसिका लागिखे, हाइ वा परबाता ल्वावा?” 57मुल धामिगेलाइ रो फरिसिगेलाइ चाहिँ इसुहेङ रिम्लि वा हिसो हि दोअ्तेङ हासु बुङ गिनु बानाल पिलि दोअ्का हुकुम पिका हिघाखे।
Currently Selected:
युहन्ना 11: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
