साल्तेङ दिङगिल्का 5
5
हननिया रो सफिरा
1कालाउबुङ इन्ता हननिया दोअ्का एअ्मि द्याङ हिघाखे। वाको बेअ्को मिङ सफिरा हिघाहि। एम्बालाइ बुङ ताइको आतुइसा मिलिङ पिअ्हि, 2कालाउ मिलिङ पिअ्का आधे टाका साल्हा पातेङ ताइमिङदोफा ताअ्हि रो आधे टाका चुमातेङ साल्तेङ दिङगिल्कालाइहेङ गोताङ टाका चुमाघा दोअ्तेङ पिहि। 3कालाउ पत्रुस दोअ्हि, “ओइ हननिया, पुनित हाङसादोफा आसत्ते धुइका रो भोनो पिअ्का टाका ताइमिदोफा ताअ्का काथा साइतान हेसापा नाङको मनता ह्वापिहि? 4मिलिङ मापिअ्लाउ बुङ इङको मिलिङ नेलाइकोङ हिघाहि। पिअ्कान्हुअ्सो बुङ इङकोसो लोका टाका नेलाइकोङ हिघाहि। इस्का मारेम्का काम पाका बिचार नाङको कोन्धाङता हेसापा लोहि? नेलाइ द्याङगेलाइहेङ ते माको, कालाउबुङ परमेस्वरहेङ दोङ ढाटाइका हिसुन्हा।” 5इदोइ काथा हिङतेङ हननिया भोनोता लोङहि रो ताइको पारान लाअ्हि। इदोइ हिङकालाइ झाराङ थिहि। 6कालाउ वाजालाइ लोतेङ वासेहेङ धाबाहोइ लुन्दाइहि रो बाहार चुमपुतेङ लिअ्पिहि।
7सुम घान्टान्हुसो हननियाको बेअ् सफिरा बुङ लिअ्ता लोहि। वासेहेङ ताइको केअ् सिका काथा गिका मान्थुघाहि। 8पत्रुस सफिराहेङ हिअ्हि, “कासेहेङ दोअ्, नेलाइ मिलिङ इङकोङझोको टाकाता पिअ्का हिघासुन्हा?” कालाइ इङको दोअ्हि, “एइ, इङकोङझोको टाकाता पिअ्का हिघान्हाहि।” 9कालाउबुङ पत्रुस वासेहेङ दोअ्हि, “नेलाइ प्रभुको हाङसाहेङ जाच पालि हेसापा मिलितेङ साल्हा पासुन्हा? खाङ, नाङको केअ्हेङ लिअ्कालाइ फिनुताङ हि। एम्बालाइ नासेहेङ बुङ फातेङ बाहार चुमप्वावा।” 10कालाउ उदोङघरि वा बुङ लोङहि रो पारान लाअ्हि। जेलाउ वाजालाइ लिअ्ता लोहि, कालाउ वासेहेङ बुङ सिका तिङतेङ बाहार फातेङ चुमपुहि रो वाकोङ केअ् भेरपा चुमपुतेङ लिअ्पिहि। 11इस्का घाटाना जेङकान्हुसो गोताङ मन्डलिर्हुता#५:११ मन्डलि याको माने ग्रिक राउता “एकलेसियार्हुता” जेङखे। रो इदोइ काथा हिङका झाराङ द्याङगेलाइ हेन्जाङ थिहि।
भारभुसाइका काम रो चिनोगेलाइ
12एला साल्तेङ दिङगिल्कालाइको खुरसो हेन्जाङ चिनोगेलाइ रो भारभुसाइका कामगेलाइ द्याङगेलाइ माझाता जेङलि तेङहि रो एम्बालाइ झाराङ सोलोमनको धाअ्ता एदोफाङ जोम्का हिघाखे। 13कालाउबुङ बोगेलाइता हासुको बुङ एम्बालाइदोफा मिलिलि आट मापाहि। कालाउबुङ बुङ द्याङगेलाइ एम्बालाइहेङ मान पाघाखे। 14प्रभुता खान्धुर पाका वाबालाइ रो बेबालाइ झन हेन्जा थपिन्हादोङघाखे। 15द्याङगेलाइ मासाअ्धेकालाइहेङ दामागेलाइता चुमाहि रो पत्रुस लोलाउ वाको स्याइर्हे खिनिङलाउ बुङ एम्बालाइता देकाको दोअ्तेङ सिदाउ रो खाटगेलाइता एम्बालाइहेङ जिम्पातेङ ताअ्घाखे। 16यरुसलेम कोरबितिङको पुरगेलाइसो बुङ हेन्जा द्याङगेलाइ मासाअ्धेकालाइ रो मासान खोअ्कालाइहेङ चुमातेङ लोघाखे रो इङको झाराङ एल्घाखे।
साल्तेङ दिङगिल्कालाइहेङ सान्ताइका
17मुल धामि रो इङकोदोफा हिका सदुकि सानाइतिगेलाइ साल्तेङ दिङगिल्कालाइहेङ मिँतुपालि तेङहि 18रो एम्बालाइहेङ रिम्तेङ थुनाता ह्वाअ्पिहि। 19कालाउबुङ प्रभुको एलोङ स्वरगदुत न्हिसिङता थुनाको फिनुगेलाइ हेपिहि रो एम्बालाइहेङ बाहार चुमातेङ दोअ्हि, 20“हानिसु रो थानता जाअ्तेङ मानासाका जिबनको गोताङ बानाल द्याङगेलाइहेङ हिङपासु।”
21इदोइ हिङकान्हुअ्सो एम्बालाइ एअ् र्हिमाङ थानलिअ्ता दुल्हि रो बिद्या पिलि तेङहि। मुल धामि रो वाकोदोफा हिकालाइ लोतेङ इस्राएलिगेलाइको झाराङ आगुवागेलाइहेङ बाराकचहरिता काइहि। इङकोन्हुअ्सो एम्बालाइ परमेस्वर पाहासो धुइकालाइहेङ चुमालि द्याङगेलाइ दिङगिल्हि। 22कालाउबुङ पलटनगेलाइ एम्बालाइहेङ थुनाता मादुसुलाउ घुरितेङ लोतेङ इदोइ बानाल हिङपाहि, 23“केलाइ थुनाता रेम्फा ताल्चा लागाइका रो र्हुम्कालाइ फिनुगेलाइता जाअ्काङ तिङन्हाहि। कालाउबुङ फिनु हेलाउ केलाइलिअ्ता हासुहेङ मादुसुन्हाहि।” 24जेलाउ थानको काप्तान रो मुल धामिगेलाइ इदोइ बानाल हिङहि कालाउ याको जाबाफ हाइ ज्याङ दोअ्तेङ एम्बालाइ साल्तेङ दिङगिल्कालाइको बारेता आवाइहि।
25कालाउ एअ्मि लोतेङ एम्बालाइहेङ दोअ्हि, “खाङसु, नेलाइ जेदोङ द्याङगेलाइहेङ थुनाता ताअ्का हिघासुन्हा एम्बालाइ थानता जाअ्तेङ द्याङगेलाइहेङ बिद्या पिदोङखे।” 26कालाउ हाकिमगेलाइ दोसा काप्तान हानितेङ एम्बालाइहेङ बोलधाकाङ मापासिङ चुमाहि। हाइदोनु द्याङगेलाइ एम्बालाइहेङ उन्ठुइहोइ तोकाङ दोअ्तेङ एम्बालाइ थिहि।
27एम्बालाइ साल्तेङ दिङगिल्कालाइहेङ चुमातेङ बाराकचहरिको आगाता जाअ्पाहि रो मुल धामि एम्बालाइहेङ हिअ्हि, 28“केलाइ नेलाइहेङ इदोइ मिङता हाइदोङ बिद्याहोइ गोताङ यरुसलेम पोङघापासुहोइना रो इङको द्याङको हितिको दुस केलाइर्हुता लागाइलि खाङसुखेना।”#मत्ति २७:२५
29कालाउबुङ पत्रुस रो साल्तेङ दिङगिल्कालाइ दोअ्हि, “केलाइ द्याङगेलाइको माको, परमेस्वरको हुकुम मानिलिङगोयाङ। 30केलाइको आजुखालको परमेस्वर इसुहेङ सिकासो सिन्हुपाहि, जाइहेङ नेलाइ कुरुसता टाङगाइतेङ सेअ्का हिघासुन्हा। 31परमेस्वर इस्राएलगेलाइ पास्ताइकोभाअ्सिङ पापसो माफ निनाको दोअ्तेङ वासेहेङ राजा रो छुटकारा पिका बान्हाइतेङ ताइको दाम्पाहा खुरहोइ झाउपाहि। 32इदोइ गोताङ काथाको केलाइ दासि हिङन्हाहि रो पुनित हाङसा बुङ, जाइहेङ परमेस्वर ताइको हुकुम मानिकालाइहेङ पिका हि।”
33जेलाउ इदोइ काथा हिङहि कालाउ एम्बालाइ हेन्जाङ चेरताम्पाहि रो साल्तेङ दिङगिल्कालाइहेङ सेअ्लि खाङहि। 34कालाउबुङ माननिय गमलिएल मिङ हिका फरिसि बाराकचहरिता ल्होतेङ एम्बालाइहेङ आधे पहर बाहार हानिलि हुकुम पिहि 35रो वा बाराकचहरिको द्याङगेलाइहेङ दोअ्हि, “ओइ इस्राएलिगेलाइ, इदोइ द्याङगेलाइहेङ नेलाइ हाइपालि भोकाहिसुन्हा, इङकोता होस पासु। 36हाइपानु नानिखान्तेङ लाम्फा बुङ थुदास दोअ्का एअ्मि द्याङ कादोङ दोअ्तेङ जाअ्हि रो द्यासाइ द्याङगेलाइ वासेहेङ पिताइहि। इङको सेअ्न्हाहि, इङकोहेङ पिताइकालाइ झाराङ राइन्हाहि रो गोताङ बित्थाको जेङहि। 37इदोइ द्याङन्हुअ्सो गान्दिकाको पहरता गालिलको यहुदा दोअ्का जाअ्हि रो हेथे द्याङगेलाइहेङ ताइमिभारि तान्हेहि। इङको बुङ सेअ्न्हाहि रो वासेहेङ पिताइकालाइ बुङ इसोओसो राइन्हातेङ हानिहि। 38एलाको इदोइ काथाता का नेलाइहेङ दोअ्खा, इदोइ द्याङगेलाइसो खेङन्हातेङ हिसु रो एबालाइहेङ लाअ्पिसु। हाइपानु एबालाइको इदोइ काम द्याङगेलाइसोनु इङको ताइमिङ माअ्न्हावा। 39कालाउबुङ इदोइ परमेस्वरसोनु नेलाइ यासेहेङ रोकिलि मादोस्वाना। माकुनुते नेलाइ परमेस्वरको खिलापता ल्होका जेङस्वाना।”
40एम्बालाइ वाको साल्हा साअ्हि। कालाउ एम्बालाइ साल्तेङ दिङगिल्कालाइहेङ लिअ्ता काइतेङ दान्हाइहि रो “इसुको मिङता माधिरपासु” दोअ्का हुकुम पितेङ एम्बालाइहेङ लाअ्पिगिल्हि। 41कालाउ इसुको मिङता आपामान सहिका जेङन्हाहि दोअ्का काथाता लेङचातेङ एम्बालाइ बाराकचहरिसो ओल्हितेङ हानिहि। 42कालाउ दिनाङ एम्बालाइ थानता रो साअ्साअ्ता हानितेङ इसु दोङ ख्रिस्ट दोअ्तेङ रेम्काबानाल हिङपागिल्लि मालाअ्हि।
Currently Selected:
साल्तेङ दिङगिल्का 5: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
