साल्तेङ दिङगिल्का 4
4
पत्रुस रो युहन्ना बारकासभाता
1पत्रुस रो युहन्ना द्याङगेलाइदोफा काथा पाकाताङ पालाउ धामिगेलाइ, थानको काप्तानगेलाइ रो सदुकिगेलाइ एम्बालाइकोता लोहि। 2ओबालाइ चेरताम्पाका हिघाखे, हाइपानु इसुता सिकासो सिन्हुलि दोखे दोअ्का काथा एम्बालाइ द्याङगेलाइहेङ धिरपादोङघाखे रो हुकुम पादोङघाखे। 3कालाउ एम्बालाइ पत्रुस रो युहन्नाहेङ रिम्हि रो बेल्हानाङ जुम्नि र्हिमाथिकापाको भाअ्सिङ थुनाता ताअ्हि। 4कालाउबुङ बचन हिङकालाइता हेन्जाङ खान्धुर पाहि। खान्धुर पाका द्याङगेलाइ नाहाजार झोको जेङहि।
5जुम्निदिना एबालाइको हाकिमगेलाइ, धरम मास्टरगेलाइ रो आगुवागेलाइ यरुसलेमता जोम्का हिघाखे। 6मुल धामि हन्नास, काइयाफा, युहन्ना, आलेक्जेन्डर रो मुल धामिको जाहानगेलाइ झाराङ इन्ता हिघाखे। 7एम्बालाइ पत्रुस रो युहन्नाहेङ माझाता जाअ्पातेङ हिअ्हि, “हिदोइ सरबङसो, हासुको मिङता नेलाइ इदोइ पाका?”
8कालाउ पुनित हाङसाहोइ पोङघातेङ पत्रुस एम्बालाइहेङ दोअ्हि, “द्याङको सासक रो आगुवागेलाइ, 9नानि केलाइ एअ्मि नेङगारा द्याङहेङ एलोङ रेम्का काम पाका बारेता इङको हिदोइ जुक्तिहोइ एल्पासुन्हा दोअ्तेङ हिअ्सुन्हा पानु, 10नेलाइ झाराङहेङ रो इस्राएलको द्याङगेलाइ ग्याको, नेलाइ कुरुसता टाङगाइका रो परमेस्वर सिकासो सिन्हुपाका वाआङ नासरतको इसु ख्रिस्टको मिङता इदोइ द्याङ नेलाइको आगाता एल्तेङ जाअ्का हि। 11धरमकिताबको इदोइ काथा वाकोङ बारेता इस्का लेखिका हि:
‘जेदोङ उन्ठुइहेङ साअ् धामकालाइ खारिज पाहि,
इङकोचाहिँ कोन्हाको मुल उन्ठुइ जेङहि।’#ले ११८:२२
12“बो हासुङता छुटकारा मान्थु, हाइपानु केलाइ छुटकारा निङलि स्वरगलेता द्याङगेलाइता भेनेङ हिदिङ मिङ पिका मान्थु।”
13जेलाउ एम्बालाइ पत्रुस रो युहन्नाको आट तिङहि, एबालाइ मापर्हेका मामुलि द्याङ हिघाखे दोअ्तेङ गिहि। कालाउ एम्बालाइ भारभुसाइहि रो एबालाइ इसुदोफाङ हिघाखे दोअ्का एम्बालाइ गिहि। 14कालाउबुङ एल्का द्याङहेङ पत्रुस रो युहन्नादोफा जाअ्तेङ हिका तिङतेङ एम्बालाइ हाइदोङ दोअ्लि मादोहि। 15एसाङ एबालाइहेङ कचहरिसो बाहार हानिलि हुकुम पितेङ एम्बालाइ एसा दोअ्तेङ ताताइमिता साल्हा पाहि, 16“इदोइ द्याङगेलाइहेङ एला केलाइ हाइ पाङ? हाइदोनु यरुसलेमको झाराङ द्याङगेलाइ एबालाइको पाका इदोइ भारभुसाइका काम गिलि दोहोइ। एला केलाइ इदोइ काथाहेङ माको दोअ्लि माद्वाङ। 17कालाउबुङ इदोइ काथा राइतिता माचारचारायाको दोअ्तेङ ‘आरोङ इदोइ मिङता हिदिङ द्याङदोफा नेलाइ हाइदोङ माधुइसु’ दोअ्तेङ केलाइ एबालाइहेङ चेतानि पिलिगोयाङ।”
18कालाउ एबालाइहेङ काइतेङ एलासो ओसो इसुको मिङता माधुइलि रो हाइदोङ माधिरपालि दोअ्तेङ एम्बालाइ हुकुम पिहि। 19कालाउबुङ पत्रुस रो युहन्ना एम्बालाइहेङ दोअ्हि, “परमेस्वरको काथा हिङकाखान्तेङ नेलाइको काथा हिङलि परमेस्वरको आगाता ठिक ना माको नेलाइ ताइमिङ बिचार पासु। 20हाइपानु केलाइ तिङका रो हिङका काथागेलाइ माधुइसिङ केलाइ हिलि मामाद्वाङ।”
21कालाउ एम्बालाइको दार पिका हाइदोङ जुक्ति मान्थुतेङ एबालाइहेङ हाकाराइतेङ लाअ्पिहि। हाइदोनु हाइ घाटाना जेङका हिघाहि इङकोको भाअ्सिङ झाराङ द्याङगेलाइ परमेस्वरहेङ बाखिन्दोङघाखे। 22हाइपानु जेदोङ द्याङ भारभुसाइका कामसो एल्पाका हिघाहि, इङकोको बोइसा न्हेकुरि बाअ्सारखान्तेङ हेन्जा हिघाहि।
आट निङलि पारथाना पासु
23इन्तासो ओल्हितेङ पत्रुस रो युहन्ना सानाइतिगेलाइकोता लोहि। मुल धामिगेलाइ रो आगुवागेलाइ दोअ्का काथागेलाइ ताइको सानाइतिगेलाइहेङ हिम्पाहि। 24जेलाउ एम्बालाइ इदोइ हिङहि, कालाउ एम्बालाइ झाराङ परमेस्वरहेङ पारथाना पालि तेङहि, “ओइ प्रभु जाइ स्वरग, सुमिङ, जाहादि रो इङकोता हिका गोताङ चिज बान्हाइन्हा।#दामालाअ्का २०:११; नहेम्याह ९:६; ले १४६:६ 25जाइ पुनित हाङसासो नाङको कामत्या केलाइको खाल दाउदको नुइसो धुइन्हा:
‘बोजात्यागेलाइ हाइपालि चेरताम्पाखे?
द्याङगेलाइ हाइपालि बेकारको आस्ति थोखे?
26परमप्रभुको खिलापता रो ख्रिस्टको खिलापता सुमिङको राजागेलाइ जाअ्हि,
हाकिमगेलाइ एअ्दोसाङ जोम्हि।’#ले २:१-२
27“हाइदोनु ना आभिसेक पाका, नाङको पुनित कामत्या इसुको खिलापता हेरोद रो पन्तियस पिलातस न्हेमिङ, बोजात्या रो इस्राएलिगेलाइदोफा इदोङ पुरता जोम्का हिघाखे।#लुका २३:१; ७-११; मत्ति २७:१-२; मरकुस १५:१; युहन्ना १८:२८-२९ 28इङकोङ पालि नाङको इछा रो उपाइआन्सार लाम्फासोङ निधो पाका हिघान्हा। 29एला प्रभु, एम्बालाइको धम्किता होस पा। नाङको कामत्यागेलाइहेङ आट पितेङ नाङको बचन धुइलि पि। 30कालाउ ताइको पुनित कामत्यागेलाइहेङ, इसुको मिङता रोगाइका, मासाअ्धेकालाइ एल्पाका रो भारभुसाइका कामगेलाइ तिङपाका सरबङसो प्याको।”
31एम्बालाइ पारथाना पालि दोकान्हुअ्सो एम्बालाइ जोम्का थामे हेङगालाइन्हाहि। एम्बालाइ झाराङ पुनित हाङसासो पोङघाहि रो एम्बालाइ आटसो परमेस्वरको बचन धुइहि।
गोताङ टाका काउरि साझ्या
32खान्धुर पाकालाइ झाराङ एलोङ कोन्धाङको रो एलोङ हाङसाको जेङका हिघाखे। एम्बालाइता हासु बुङ ताइ टाका काउरिको हाइदोङ थोक इदोइ काङको ताइको दोअ्तेङ मादोअ्घाहि। एम्बालाइको गोताङ चिज माझाको हिघाखे।#साल्तेङ दिङगिल्का २:४४-४५ 33प्रभु इसु सिकासो सिन्हुका हि दोअ्तेङ साल्तेङ दिङगिल्कालाइ बारका सरबङ निङतेङ दासि निङघाखे रो परमेस्वर एम्बालाइ झाराङहेङ दायातेङ हेन्जाङ सहसाम्पा पिहि। 34एम्बालाइता हासुहेङ बुङ हाइदोङ काथाको हारजा माजेङघाहि। मिलिङ साअ् हिकालाइ पिअ्तेङ 35इन्तासो लोका टाका साल्तेङ दिङगिल्कालाइकोता चुमाघाखे कालाउ जाइजाइहेङ जेदोङ जेदोङ काथाको हारजा जेङघाहि, इङको टाका बाखाराइ पिघाखे।
36एअ्खे साइप्रस पुरको लेबि खालको योसेफ मिङ हिका द्याङ हिघाखे। जाइको साल्तेङ दिङगिल्कालाइ बारनाबास दोअ्तेङ मिङ ताअ्का हिघाखे (जाइको माने हाउसालाको चान जेङखे)। 37वा ताइको मिलिङ पिअ्तेङ इङको टाका चुमातेङ साल्तेङ दिङगिल्कालाइहेङ पिहि।
Currently Selected:
साल्तेङ दिङगिल्का 4: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
