२ कोरीन्थी 11
11
1ङाइ बल ख्याल् नोःआलाङः त खेःया नीङ्इ घीःती सायःओ फेलाम् 2दोह् हायःती दाय्ह्सा परमेस्वर्लो लेखा नीङ्कोः कुरा पेतो स्याव्ताक्साकायः आन ल्हुङ् रुःनाःताङः। नीङ्पाय् ख्रीस्कायः झुङ्आले धयःती गम्ओ रौ मोमःचोःलो लेखा ङाइ वानःसा झाक्नाङः। 3नीङ्पाय् ख्रीस्कायः ह ङाइ धयःती गम्ङोतो उय्ह्लेकोः हवा त तोओलो लेखालेः सैतान्इ नीङ्कायःमा थ्योन्ह्ती माःती तोतेःनै ओहाङःसै नीङ्इ ख्रीस्कायः पेतो छय्ङ्तो ङ्हाम्ओपाय् फेनानी यादो त रैती म्हर्नाङः। 4दोह् हायःती दाय्ह्सा ङीइ गलमा स्यान्मालो येसुकोः कुरालेः अरु मान्तालम्इ थोल्ह्ती तोनानी त खेःया ओउःमयः तोओ कुरापाय् नीङ्इ ग्याती रोम्तेःनानी। फेरी थे ग्वालामः नीङ्इ त्याक्सामा ग्यातेःनै थेथे कुरापाय् “पेओ समचार् लेःआः” त दाय्ह्ती नीङ्इ सायःसामा ग्यातेःनै। ओउः थे ग्वालामःमा थे पेओ समचार् त तोओमा ङीसै दोःओ दोङ् कुरालेः खेःल बा। 5एत थेथे कुरा तोओलम्पाय् “ङी ख्रीस्कोः ताङ्ह्ओ ल्होक्ओमयः लेःआः” त लयःकायः ताःनाःइसी दोह् खेःयाकायःमा ओउःमयःपाय् ङासै ताङ्ह्ओ खेःइली त ङाइलेः ताःनाङः। 6नोःओ बेलाहाङः ङाइ क्लोनःती नोःसा खाय्ङल यादो ङाइ नोःओ कुरा व्हाय्तो लेःआः बा। ओउःत ङीइ नाःतो पेन्ह्कायः पेतोलेः छ्यानःनेःआलाङ्स।
7ख्रीस्कोः पेओ समचार् नीङ्कःहाङः थोल्ह्ती तोओहाङः नीङ्कःसै ङाइ दोह्मा त्याक्ङल। एतलेः नीङ्कायः ताङ्ह्ताक्साकायः ङाइ लयःकायः मीताक्आलाङःस ओउःत हायःओपाय् पेमालो खेःल र। 8नीङ्कःहाङः काम् जाङ्ह्साकायःपाय् ङाइ जेःगा तुङ्गा लेःसाकायः अरु देस्कोः ङ्हाम्ओलम्सै पैसा त्याक्आलाङः। 9फेरी नीङ्कःहाङः मुओ बेलाहाङः ङा राह्ओ चीस्लम् नीङ्कःसै दोह्मा त्याक्ङल मासीदोनीया देस्सै वाङ्आ ङ्हाम्ओलम्कःसै ह त्याक्आलाङः। ओउःत हायःतीलेः ङ्हासैमा ङाइ सुकायःमा सावःताक्नेःनाङ्सल लोनेमा सावःताक्नेःनाङ्सल। 10ख्रीस्इलेः ङाकायः द्याह् दोङ् कुरा तोताक्नाःताङः आखयाहाङः ङाइ एत ङाःती नोःओकायःपाय् सुइमा त्याःसा खाय्नीली। 11दोह् हायःती दाय्ह्सा इ कुरा ङाइ राप्माःत तोनेःनाङ्सल दोङ्सीलेः ङाइ राप्नेःनाङ्स बा ओउःत परमेस्वर्इलेः चीःनौ।
12ङाखेइ ङ्हा जाङ्ह्ओ काम्पाय् जाङ्ह्धैलेः मुनाङः नाङ्कःसै दोह्मा त्याक्ङल। ओउः लयःइलेः “ख्रीस्कोः छ्युङ्ह्ओ ल्होक्ओमयः” त लयःकायः तोओलम्खेइ ङीलो लेखालेः काम् जाङ्ह्नीली ओउःत झ्यान्ते ओउःमयः लयःकोः नेह्रो ओर्ताक्सा खाय्इसीली। 13ओउः मान्तालम्पाय् ख्रीस्कोः दोङ् छ्युङ्ह्ती ल्होक्ओमयः खेःइली ओउःमयः माःती “ङीकायःपाय् ख्रीस्इ छ्युङ्ह्ती ल्होक्आताङी ओउःकोः काम् जाङ्ह्नाङःसु” त तोती ख्रीस्कोः छ्युङ्ह्ओमयःलो लेखा थाङ्ताक्नाःइसी। 14ओउःत हायःओ कुरापाय् ग्याङ्ह्सीःओ कुरा खेःल। सैतान् त तोओइमा यात्चाक् दोङ् परमेस्वर्कोः लाङ्कासै ल्होक्ओमयःलो लेखा थाङ्ताक्सा खाय्नाःस। 15ओउःत झ्यान्ते सैतान्कोः काम् जाङ्ह्ओलम्इमा लयःकोः मालीक् तेःती पेओ काम् जाङ्ह्ओलम्लो लेखा थाङ्ती वाह्ओ त खेःया ओउःपाय् सुकायःमा ग्याङ्ह्ताक्थासल। ओउःमयः लोने काम् जाङ्ह्झ्याङ्पाय् न्युम्ह्तोलेः स्याव्नै। 16द्याह् ङाइ कोदीङःतीलेः तोनेःनाङ्स ङाकायःपाय् “लौ पावुल्पाय् आह्रे नोःनाः” त सुइमा ताःतेःचै। ओउःतलेः तोनेःनाङ्सतो ङाकायःपाय् “आह्रेलेः नोःनौ” ततेः ताःतेःनै त खेःया लौ ङाकोः आह्रे नोःओ कुरापाय् सायःपाःनाङ्स दा ङाइ द्याह् बल लयःकायः ताङ्ह्ताक्ओ कुरा तोचेःनाङ्स। 17एत तोती ङाइ प्रभुलेः झाक्ओ कुरापाय् तोनेःनाङ्सल लयः ङाःतीलेः तोनेःनाङ्स लयःकोः नेह्रो ओर्ताक्साकायः ह नोःनाङः। 18नाःतो अरुलम्इ ल्हाव्ह्दैबाङ्कोः मान्तालम्लो लेखालेः लयःकायः ताङ्ह्ताक्साकायः एतलेः ङाःती नोःनै ओउःत खेःओ ङामा ओउःमयःलो लेखालेः नोःनाङः। 19नीङ्पाय् आन व्हाय्तो चीःओ ल्हुङ् नाःओलम्तेः खेःतेःनै ओउःत झ्यान्ते दोह् हायःतीतेः लयः ङाःती व्हाय्तो चीःमालोलम्कायः आन ग्यातीलेः रोम्तेःनानी। 20माः रैस यात्चाक्इ नीङ्कायः नोकरी स्याव्ताक्तेःनै त खेःया नीङ्कोः चीस् जेःबत्तेःनै लाबत्तेःनै नीङ्कायः मीताक्ती घान्तेःनै त खेःया ओउः मान्ताकायःलेः नीङ्इ ग्यातीलेः रोम्तेःनानी बा। 21ङीखेपाय् काङ्तो मुती ओउःत हायःसा रैआलाङी। ओउःत झ्यान्ते ङी रास्सा खेःतो र।
द्याह् यात्नीस्चाक् लयःकोः नेह्रो ओर्ताक्ती तोसा म्हर्नाः त खेःया “लौ ङामा ओउःतलेः नोःपाङः” त दाय्ह्सा खाय्नाङः। खाय्सापाय् खाय्लेःनाङः एत दाय्ह्ती ङा चीःमालो मान्तालो लेखा दाय्ह्नाङः। 22ओउः मान्तालम्पाय् हेब्रैनी मान्तालम् त खेःयाकायः “लौ ङामा हेब्रैनी मान्तालेः खेःनाङः” त तोसालेः खाय्नाङः ओउःमयः इस्राएली मान्तालम्या ङामा इस्राएली मान्तालेः खेःनाङः ओउःमयः आब्राहाम्कोः प्लोमःदानेया ङामा ओउःतलेः। 23ओउःमयःपाय् ख्रीस्कोः नोकरीलम्या लौ ङा न्हाङ्तोलेः ओउःकोः नोकरी लेःआः ङ। माः है “ओउःमयःसै ङाइ न्हाङ्तोलेः काम् जाङ्ह्लेःनाङः” त दोङ् कुरा दाय्ह्ती नोःसा खाय्लेःनाङः। खाय्सापाय् खाय्लेःनाङः एत नोःधार्ना ङा ब्रःओ मान्तालो लेखा नोःनाङः। फेरी ओउःमयःसै अरुलम्इ ङाकायः नाःतोलेः घान्आताङः नाःतोलेः झ्याल्खानहाङः काआताङः नाःतोलेः सात्खेःआताङः। 24ङाकायः यहुदीलम्इ पोङाज्योः पेन्ह्कायः लाइ उनन्चलीस् फेर् घान्तीलेः बयःआताङः। 25सुम् पेन्ह्कायः सीङःइ थोःआताङः यातै पेन्ह्कायः बाङ् आप्ती थोःआताङः। सुम् पेन्ह्कायः ङा वाह्ओ तीःजहास्कायः तीःइ ह्र्योङःताक्आकान्। यात् दीन् यात् रात्कायः ङा ज्युम्ह्ओ तीःहाङः ज्युप्ती सीखेःङोतो। 26ङा नाःतोलेः ब्याह्ती वाह्आलाङः बा तीःलम्हाङःमा सीखेःझुङ्ङोतो दाकुलम्इमा आन सात्खेःझुङ्ताङःतो लयःकोः मान्तालम्इमा थे देस्कोः मान्तालम्इमा ङाकायः आन सात्सा बोङःझुङ्ताङःतो। सहर्हाङःमा बन्बन्हाङःमा द्युम्मालो समुन्द्र तीःहाङःमा पेमालो साथीलम्कुस्इ वाह्ओमा आन सीखेःझुङ्आलाङः बा। 27काम् जाङ्ह्ती आन द्योत्झुङ्ङोतो आन याह्दीङ्हाङः एनःसा दोःमालो मुझुङ्ङोतो आन योङ्क्राय्ती तीः अप्ती तोय्ङ्झुङ्ङोतो नाःतो पेन्ह्कायः जेःगा तुङ्गा नाःमाःत नाय् नाःमाःत न्याम् झ्युङ्तीलेः आन सीखेःझुङ्आलाङः। 28ओउः लीह्सीःओ झुङ्आले गोरःओ खेःङल। दीन्का दीन् ओउः ङ्हाम्ओलम्कोः कुराकायः आन ल्हुङ् र्याङःङोतो। 29यात्चाक् ध्यव्तोलेः मुनाः त खेःया ङामा ध्यव्गार्नाङः। यात्चाक्कायः रेव्ओ काम्इ गन्नाःथै ङाकायःमा ल्हुङ्हाङः आन लीह्नाङः।
30लौ ङा लयःकोः नेह्रो ओर्ताक्सा खेःनाङः त खेःया ङाकोः अरुसै मीओ काम्कोः कुरा तोपाङः। 31ङाइ तोओ कुरापाय् माःओ कुरा खेःल त प्रभु येसुकोः परमेस्वर् आपाइ चीःनौ ओउःकायः गलकायःमा ताङ्ह्ताक्तोलेः मुपै। 32ङा दामास्कस् सहर्हाङः मुतोक् बेलाहाङः ङाकायः चुम्ती पानःसाकायः आरेतस् राजाकोः जील्ला प्रमुख आधीकारीइलेः सहर्कोः धोकालम्हाङः सीपाही ल्युङ्ह्ती मुताक्ओ खेःतो। 33ङा धाकर्हाङः पोक्आक्तीको ओउः सहर्कोः तोङःती खोसा बार्हाङः मुओ घाङ्सै साथीलम्इ ङाकायः ओउः धाकर् क्लाःआताङः ओहाङःसैको बाहीर साःताङ् दाह्आक्तीको बेत्आलाङः।
Currently Selected:
२ कोरीन्थी 11: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
