१ कोरीन्थी 1
1
1-2इ चेती ङा पावुल् त तोओइमा ङीकोः हौ सोस्थेनेस्इमा नीङ् कोरीन्थ सहर्हाङः मुओ ङ्हाम्ओलम्कायः लेखती ल्होक्नेःनाङ्स। ङाकायःपाय् परमेस्वर्इ लयः झाक्तीलेः येसु ख्रीस्कोः कुरा छ्यानःसाकायः छ्युङ्ह्ती गोत्ती ल्होक्आताङः। नीङ्कायःमा सबै अरु ङीकोः प्रभु येसु ख्रीस्कःताङ् तेती तोओलम्कायःमा सबैकायः परमेस्वर्इलेः येसु ख्रीस्कुस् छय्ङ्तो स्याव्सा थेङा गोत्तेःआकाय्। एतलेः ख्रीस्पाय् ङीकोः प्रभुलेः मुनाः फेरी ओउःमयःकोः प्रभुमा मुनाः। 3लौ ङीकोः परमेस्वर् आपामा ङीकोः प्रभु येसु ख्रीस्इमा नीङ्कायः योनःती झ्यान्ते ल्हुङ् धोमाय्तो स्याव्ताक्तेःपै।
4-5येसु ख्रीस्इलेः नीङ्कायः आन बयःतेःआकाय् त झ्यान्ते नीङ्इ सबै कुरा व्हाय्ती चीःती नोःसा खाय्तेःनानी ओउःत झ्यान्ते ङाइ गलकायःमा परमेस्वर्कायः “च्युता” त तोलेःनाङः। 6ख्रीस्कोः स्यान्राय् सायःआक्तीको नीङ्इ पेतो ग्रमःत ङ्हाम्तेःआकानी 7ओउःत झ्यान्ते ङीकोः प्रभु ख्रीस् वाङ्सा दीन्कायः ल्युङ्ह्ती मुओहाङः नीङ् परमेस्वर्कःसै सबै दोःती दोह् खेःयाकायःमा राह्तेःइली। 8येसु ख्रीस्इलेः नीङ्कायः ग्रमःत स्याव्ताक्ती झ्यान्ते ओउःकोः वाङ्सा खेःओ दीन्कायःपाय् नीङ् पेतो छय्ङ्तो मुतेःनै। 9दोह् हायःती दाय्ह्सा नीङ्कायः येसु ख्रीस्कुस् ब्राङ्ती मुसाकायः गोत्ओ परमेस्वर्लेः ओउःपाय् जुगाङ् ङ्हाम्सीःओ लेःआः। दोह्तमा ओउःइ तोलेःनौ ओउःतलेः ओउःइ जाङ्ह्नौ बा।
10-11लौ ङाकोः पुःचोङ् हौचोङ्य नीङ्कायः “यातैज्याङ् ल्हुङ्तुक् मुइली” त दाय्ह्ती क्लोएकोः कीम्कोः मान्तालम्इ ल्हाक्ती तोआताङः। ओउःत झ्यान्ते ङाइ येसु ख्रीस्इ बयःओ हुकुम्पाय् द्याह् तोनेःनाङ्स “लयःमयःकुस् काय्काय्माःत ल्हुङ् ब्राङ्तो स्याव्ती यातैज्याङ् ल्हुङ्तुक्हाङः नोःती वाह्न दा” 12नीङ्कःहाङः यात्नीस्चाक्खे “ङापाय् पावुल्कोः मान्ता लेःआः ङ” त नोःताङःतेःनै अरुखे “ङापाय् आपोलस्कोः मान्तालेः” अरुखे “ङापाय् पत्रुस्कोःलेः” अरुखे “ङापाय् ख्रीस्कोः लेःआः ङ” त दाय्ह्ती नोःताङःकाय्तेःनै। 13इत नोःसापाय् जुगाङ् स्याव्ल। येसु ख्रीस्पाय् तेत्ती वेःओ खेःल बा। ङा पावुल् त तोओपाय् नीङ्कायः क्ल्याय्ओ सीङःहाङः सात्ओ खेःङल ङाकोः मय्ङ् पेह्ती सुइमा बाप्तीस्मा त्याक्नीली। 14ङाइपाय् सुकायःमा बाप्तीस्मा बयःङल क्रीस्पुस्कायःमा गायुस्कायःमा झुङ्आले बयःआलाङः अरु सुकायःमा बाप्तीस्मा बयःङल। ओउःत झ्यान्ते ङाइ परमेस्वर्कायः “च्युता” त तोलेःनाङः। 15ओहाङःसैको ङाकायःपाय् “पावुल्इ लयःकोः मय्ङ् पेह्ती बाप्तीस्मा बयःआताङः” त दाय्ह्ओ नीङ्कःहाङः सुइमा तोसा खाय्नीली। 16माः रैस ङाइ स्तेफानस्कोः कीम्कोः मान्तालम्कायःमा बाप्तीस्मा बयःआलाङः अरुकायःमा बयःआलाङःया बयःङलया त म्हेःआलाङः। 17बाप्तीस्मा बयःसाकायः येसु ख्रीस्इ ङाकायः ल्होक्ओ खेःल ओउःकोः पेओ समचार् थोल्ह्ती तोसाकायः ल्होक्आताङः। थोल्ह्ती तोतोक्हाङः मान्ताकोः लयःकोः ल्हुङ्हाङः चीःओ कुराखे तोङल परमेस्वर्कःसै वाङ्ओ दोङ् कुरालेः तोआलाङः। ङाइ मान्ताकोः कुरा ह तोआलाङः त खेःया “ख्रीस्पाय् ङीकायः क्ल्याय्ओ सीङःहाङः सीओआः” त तोसा खेःजेःआक्ल ओहाङःसै मान्तालम् दल्इली।
18दोह् हायःती दाय्ह्सा सीती वाय्सा खेःओ मान्तालम्खे ख्रीस्पाय् ङीकायः क्ल्याय्ओ सीङःहाङः सीओ कुरापाय् सायःसा ग्याइली “भ्यामःती नोःओ कुरा लेःआः” त दाय्ह्ती नोःनानी। ङी ख्रीस्इ दल्ताक्ओ मान्तालम्खेइ ओउः कुरा सायःती “लौ इपाय् परमेस्वर्कोः दल्ताक्सा कुरा लेःआः” त दाय्ह्ती ग्याती तोनाःतय्ह्नी। 19इतलेः परमेस्वर्कोः आखरःहाङः लेखती मुनाः “लौ मान्तालम्कोः लयः चीःओ कुरालम् ङाइ म्हीत्ताक्मानाङः। व्हाय्ओ मान्तालम्इ तोओ कुरापाय् ‘भ्यामःती नोःओ’ त छ्यानःमानाङः” त दाय्ह्ती परमेस्वर् दाय्ह्ओ कुरा लेखती मुनाः। 20तेन्छ्याङ्कोः व्हाय्तो नोःसा चीःओ मान्ता दोह् त चीःनाःइसी गत स्याव्नै त दाय्ह्सा। ल्हाव्ह्दैबाङ्कोः मान्ताइ नोःओ व्हाय्ओ कुराकायः “ओउःपाय् भ्यामःतो नोःओ लेःआः” त परमेस्वर्इ छ्यानःआकान्। 21लयःकोः म्हुक्ओ ल्हुङ्इ ह मान्ताइ परमेस्वर्कायः तय्ह्सा खाय्नीली दोह् हायःती दाय्ह्सा परमेस्वर् पेतो चीःती लयः झाक्ती झ्यान्ते दोह् थोल्ह्ती कुरालो ङ्हाम्सा ग्यामालोलम्खेइ “भ्यामःती नोःओ” त तोनानी ओउः कुराकायःलेः ग्याती ङ्हाम्आक्तीको ओउः ङ्हाम्ओ मान्तालम्खे दल्तो स्याव्नै। 22यहुदीलम्खेइ “लौ ङीकायः ग्याङ्ह्राय् छ्यानःताङी” त दाय्ह्ती तोनीतो ओउः एलेनी मान्तालम्खेइ “ङीकायः व्हाय्ओ कुरालेः तोताङी” त दाय्ह्ती तोनीतो 23ओउः कुराखे खेःल “येसु ख्रीस्पाय् ङीकायः क्ल्याय्ओ सीङःहाङः सीआ” त दाय्ह्ओ कुराखे ङीइ थोल्ह्ती तोनाङःसु। एत तोओ कुराकः यहुदीलम्खे सायःसा झाक्इली एलेनीलम्खे “इपाय् भ्यामःओ कुरालेः” त म्हर्नै। 24परमेस्वर्इ गोत्ओलम्खेकायः ओउःइ गोत्ओ यहुदीलम्कायःमा एलेनीलम्कायःमा ख्रीस्इपाय् परमेस्वर्कोः ग्वम्मा व्हाय्तो चीःओमा छ्यानःनौ 25दोह् हायःती दाय्ह्सा परमेस्वर्कोः भ्यामःती नोःओ कुरालम्पाय् मान्ताकोः व्हाय्ओ कुरासै व्हाय्तो लेःआः। फेरी परमेस्वर्कोः जुगाङ् मीओ काम्लम्पाय् मान्ताकोः ताङ्ह्ओ काम्सै ताङ्ह्तो लेःआः बा।
26लौ पुःचोङ् हौचोङ्य परमेस्वर्इ गोत्ओ बेलाहाङः नीङ्पाय् दोह् खाल्कोः मान्तातेः खेःतेःइतो त दाय्ह्सा नीङ्पाय् नाःतोलेः ल्हाव्ह्दैबाङ्कोः आन व्हाय्ओ मान्तामा खेःआक्तेःइली ताङ्ह्ओ मन्तरी मान्तालम्मा नाःतोलेः खेःतेःआक्तेःइली। 27व्हाय्ओ मान्तालम्कायः घ्युम्ताक्साकायः परमेस्वर्इ ल्हाव्ह्दैबाङ्कोः व्हाय्मालोलम्पाय् छ्युङ्ह्आकान्। फेरी ल्हाव्ह्दैबाङ्कोः मीओलम्पाय् ताङ्ह्ओ मान्तालम्कायः घ्युम्ताक्साकायः छ्युङ्ह्आकान्। 28माः रैस सुसु मान्तालो ओउः ल्हाव्ह्दैबाङ्कोः मान्तालम्इ “ओउःपाय् मीओमा अह्र्सीःओ” त म्हर्चै ओउः मान्तालम्कायःलेः छ्युङ्ह्ती परमेस्वर्इ ल्हाव्ह्दैबाङ्कोः ताङ्ह्ओलम्कायः मीताक्आथास 29ओउःत झ्यान्ते परमेस्वर्कोः मीक्हाङः सुइमा लयःकोः नेह्रो ओर्ताक्सा खाय्नीली। 30ओउःइलेः ङीकायः येसु ख्रीस्कुस् ब्राङ्ती यातैज्याङ् जाङ्ह्आतय्ही फेरी येसु ख्रीस्इलेः ङीकायः व्हाय्माताक्आतय्ही। ओउःइलेः छय्ङ्ताक्तीमा पेतो जाङ्ह्तीमा ङीकायः रेव्ओ काम्मा फेमाताक्आतय्ही 31ओउःत झ्यान्ते “सुखे ताङ्ह्ताक्ती नोःसा झाक्नै ओउःइलेः प्रभु परमेस्वर्कायः ह ताङ्ह्ताक्पानी” इतलेः परमेस्वर्कोः आखरःहाङः लेखती मुलेःनाः।
Currently Selected:
१ कोरीन्थी 1: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
