१ कोरीन्थी 2
2
1ओउःत खेःओ परमेस्वर्कोः कुरा नीङ्कायः तोलाङ् वाङ्तोक्हाङः ङाइ मान्ताकोः व्हाय्तो चीःती नोःओलेः तोङल। 2येसु ख्रीस्पाय् क्ल्याय्ओ सीङःहाङः सात्ओ खेःतो ओउः कुरा ह नीङ्कायः तोलाङ् वाङ्आलाङः। 3वाङ्तोक्हाङः “ङाच्युक् मीओ मान्ता इत ताङ्ह्ओ कुरा तोसालेः खेःनाङः” त म्हर्ती ङा आन ल्हुङ् रुःती रैआताङः 4ओउः बेलाहाङः ङाइ मान्ताखेकोः ग्वम्इलेः व्हाय्तो कुरा तोङल स्यान्ङल परमेस्वर्कोः ग्वालामःखेकोः ग्वम्इ छ्यानःती तोनेःआलाङ्स। 5ओउःत खेःओ नीङ्इ मान्ताकोः व्हाय्ओ कुराखे ङ्हाम्तेःनीली परमेस्वर्कोः ग्वम्कोः कुराखे ङ्हाम्ती झ्यान्ते नीङ्इ ग्रमःत मुसा खाय्तेःनानी।
6व्हक्तो चीःओलम्कायः ङीइ व्हाय्तो कुरा तोसापाय् तोनाङःसु ओउः कुरापाय् ल्हाव्ह्दैबाङ्कोः मान्तालम्कोः व्हाय्ओ कुरालेः खेःल तेन्छ्याङ्कोः वाय्तो स्याव्खेःओ ताङ्ह्ओ हुकुम् बयःओलम्इ चीःओ कुरामा खेःल 7परमेस्वर्कोः ङ्हा छ्यानःआक्मालो व्हाय्ओ कुरालेः ओउःपाय् ङीइ द्याह् तोनाङःसु। इ कुरापाय् ङीकायः ओउःकुस् ताङ्ह्तो स्याव्साकायः ल्हाव्ह्दैबाङ् जाङ्ह्धाङ्माःखाहाङःसै परमेस्वर्इ रय्ह्ती गम्ओआः। 8फेरी इ कुरा ल्हाव्ह्दैबाङ्कोः ताङ्ह्ओ हुकुम् बयःओलम्इ चीःआक्नीली। ओउःमयःइ चीःयाकायः ङीकोः पेओमा ताङ्ह्ओ प्रभु येसुकायः क्ल्याय्ओ सीङःहाङः सात्आक्नीली खेःतो। 9ओउःतलेः उय्ह्लेहाङःसै लेखती मुनाः “परमेस्वर्कायः राप्ओ मान्तालम्पाय् ओउःइ चन्तायःती जाङ्ह्ओ थोक्लम्पाय् सुइमा च्यवःआक्माआक्नीली सायःआक्माआक्नीली सुमा ल्हुङ्हाङः म्हर्आक्माआक्इली” त लेखती मुतो 10द्याह् इ कुरापाय् परमेस्वर्इ लयःकोः ग्वालामः ल्होक्ती ङीकायः छ्यान्ह्आतय्ही। ओउःकोः ग्वालामःइपाय् सबै जोय्तीलेः चीःमानौ। माः रैस ओउःइ परमेस्वर्कोः ल्हुङ्तुक्पाय् जुगाङ् चीःमानौ ओउःत खेःओ परमेस्वर्कोः ल्हुङ्कोः कुरा ङीकायः छ्यानःसा खाय्लेःनौ। 11मान्ताकोः ल्हुङ्तुक्पाय् ओउः मान्ताकोः लयःकोः ग्वालामःइ ह चीःनाः अरुइ ओउःकोः ल्हुङ्तुक् जुगाङ् चीःसा खाय्नीली ओउःलो लेखालेः परमेस्वर्कोः ल्हुङ्तुक्पाय् ओउःकोः ग्वालामःइ ह चीःनौ मान्ताइ चीःसा खाय्नीली। 12ङीपाय् ल्हाव्ह्दैबाङ्खेकोः ग्वालामः दोःतय्हीली परमेस्वर्इ लयःकोः ग्वालामःखे दोःताक्आतय्ही ओहाङःसैको ओउःइ बयःओ कुरापाय् ङीइ चीःसा खाय्नाःतय्ही। 13परमेस्वर्कोः ग्वालामःइ ङीकायः स्यान्आक्तीको ह ओउःखेइ बयःओ कुरा ङीइ अरुकायः तोनाङःसु मान्ताखेइ व्हाय्ती चीःओ कुरा तोङुसुलु। परमेस्वर्कोः कुरापाय् ओउःइ लयःइलेः बयःओ कुराहाङः नोःसा खेःतो। 14फेरी इ परमेस्वर्इ बयःओ कुरापाय् परमेस्वर्कोः ग्वालामः दोःओलम्खेकायः ह चीःसा खाय्लेःनानी। ओउःकोः ग्वालामः दोःमालोलम्खेइ इ कुरा सायःसा ग्याइली “इपाय् भ्यामःती नोःओ” त म्हर्ती सायःनीली ओउः कुरा चीःसा खाय्नीली। 15ओउः ग्वालामः दोःओ मान्तालम्पाय् पेओ कुरामा पेमालो कुरामा सबै कुरा तय्छनःती योसा खाय्नानी ओउःमयःकायः अरुलम्इ तय्छनःती योसा खाय्नीली। 16“परमेस्वर्कोः ल्हुङ्तुक्पाय् सुइमा चीःसा खाय्नीली ओउःकायः सुइमा स्यान्सा खाय्नीली” त परमेस्वर्कोः आखरःहाङः लेखती मुनाः। ङीखेइ ख्रीस्कोः ल्हुङ्तुक् चीःनाःतय्ह्नी बा।
Currently Selected:
१ कोरीन्थी 2: CDM93
Highlight
Copy
Compare
Share
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
