Jěnisis 37
37
1Ka Jekâb a diya o ehe ya iyěngidě ja hangwě, o ehe ya Kenean.
2Mbamba ja Jekâb nd‘ ekadi. Josěf a diyaki jomu na mepuma hěmbwědi utodu, a jakidě mwanga na bana ba hangwě; na mâ mwa‐nděmbě a diyaki na babamo ba bajo ba hangwě, Bilha na Zilpa: ka Josěf a vana hangwě ilango ibe o pěl‘ ’abu.
3Nandi Isreěl a ma tândâki Josěf wa na bana baju běhěpi, ikabojana a diyaki mwan‘ ’aju a jakidi a bě utodu; ka mâ‐a ha mâ ngâi ya mangâ maitě.
4Nd‘ o bana ba hangwě ba yěněki na hangw‘ ’abu a tândâki mâ wa na bana ba hangwě běhěpi; ka bâ‐ba numba mâ, na bâ‐bà diye pě na ngudi e kalakě na ju na jonga.
5Ka Josěf a yâtâ ndâtâ, ka mâ‐a languwa yâ bana ba hangwě; ka bâ‐ba numba pě mâ wa.
6Ka mâ‐a vâ na bâ, na, Mbi hâhâlâkiděnd‘ inyěni, na, Yokakani ndâtâ tě eamě e di yâtângo ekaně:
7Ho diyaki ho kataka mebâmbâ mea honji o mwanga, umbwakiyate, ndi ubâmbâ ’muamě mua ’muwa, ka muâ‐mua těmě de; umbwakiyate, ndi mebâmbâ meanyu mea těmě ulwaniděngo, me kâlâmâkâ o umwamě u jadi.
8Ka bana ba hangwě ba vâ na ju, na, O ka pangiyi hwě pâkwěpâkwě? ipě o ka diyandi upangiyi ’muahu? Ka bâ‐ba numba pě mâ wa o pělě ya ndâtâ jaju, na ndaga jaju.
9Ka mâ‐a yâtâ ndâtâ epâkwě, ka mâ‐a languwa yâ bana ba hangwě, ka mâ‐a vâ, na, Umbwakiya, mbi yâti pě ndâtâ epâkwě; umbwakiyate, joba, na ngândě, na jomu na nyětěti pâkâ, be kâlâmâkiyě ’mba.
10Ka mâ‐a languwa yâ hangwě, na bana ba hangwě; ka hangwě a kandidě mâ, ka mâ‐a vâ na mâ, na, E lě nja ndâtâ‐ě eâvě e yâtângo ekaně? Hwě na nyângwě na bana ba hângwě ho ka viyandi ka balama o âvě‐o jadi o he pâkwěpâkwě?
11Ka bana ba hangwě ba viniya mâ; ndi hangwě a tataki ndaga těně o ulema.
12Ka bana ba hangwě ba vala ka jedě mwanga mua hangw‘ ’abu o Shikěm.
13Ka Isreěl a vâ na Josěf, na, Bana ba hângwě bà jakidě mwanga o Shikěm? vaka, mbi lomi âvě o bâ‐ba jadi. Ka mâ‐a vâ na ju, na, Umba nd‘ ekaně.
14Ka mâ‐a vâ na ju, na, Kěkě, ka yěně ipě e ndi bwamu o bana ba hângwě ba jadi, na bwamu na myanga; na nâvě o ka timbanaka ’mba ndaga. Ka mâ‐a loma mâ oviya itaba ja Hibrân, ka mâ‐a vala o Shikěm.
15Ka momo n‘ uhuhu a duwa mâ, na, umbwakiyate, a lengaka a ’hiki; ka momo tě a uwa mâ, na, O vahaka lě nde?
16Ka mâ‐a vâ, na, Mbi vahaki bana ba paia; mbi hâhâlâkiděnd‘ âvě, na, langwakiya ’mba o bâ‐ba jakidě myanga.
17Ko momo tě a vâ, na, Ba věngěmindi‘ okava; ikabojana mbi yokaki bâ ba vâkâ, na, Ho kěkeni o Dothan. Ka Josěf a vitě bana ba hangwě, ka mâ‐a duwa bâ o Dothan.
18Nd‘ o bâ‐ba yěněki mâ yaviděngo, a t‘ o pâ pyělě, ka bâ‐ba lata ehoka e weyakě mâ.
19Ka bâ‐ba vâ upâkwě na upâkwě, na, Umbwakiyate, uyâti‐ndâtâ těkamu u vakandi.
20Nandi, vakani, ho weyake mâ, na hwě‐hwa uhwa mâ o mbela pâkâ, na hwě‐hwa vâ, na, Tito ebe pâkâ nd‘ e pukuli mâ; na hwě‐hwa yěně nyanga ya ndâtâ jaju e ka hayě.
21Ka Ruběn a yoka yâ, ka mâ‐a věngidě mâ o benâ beabu; ka mâ‐a vâ, na, Ho nângâke eměnâ ’aju.
22Ka Ruběn a vâ na bâ, na, O pumaki makiya; uhwaki mâ ni o mbela tě e jadi o nginga ekaně, o nangakiděni enâ o mâ‐a jadi; ovaně nd‘ o mâ‐a ka věngidě mâ o benâ beabu, na mâ‐a timbě pě mâ o hangwě a jadi.
23E diyakindi, o Josěf a vakid‘ o bana ba hangwě ba jadi, ka bâ‐ba duwana Josěf ngâi ’aju, ngâi tě ya behini beitě eaju e diyaki bâtângo;
24Ka bâ‐ba nângâ mâ, ka bâ‐ba uhwa mâ o mbela; mbela tě e diyakite nane, miba m‐u diyaka omě.
25Ka bâ‐ba diya diya ija ja pěmbě; ka bâ‐ba betě mihâ mabu, ka bâ‐ba yěně, umbwakiyate, njamba ya ba Ishmeěl e vaka oviya Giliad, na kaměl jabu bapěngo spais, na bam na mur, ba valana beâ o Ijipt.
26Ka Juda a vâ na bana ba hangwě, na, I lě nja ikoně i did‘ omě oningě hwa weya mwana hangw‘ ’ahu, na hwě‐hwa kuta makiya maju?
27O ’kani, ho hambaki mâ ni na bato ba Ishmeěl, ndi enâ ’ahu e diyake o mâ‐a jadi; ikabojana a mwana wa hangw‘ ’ahu, mehoni meahu. Ka bana ba hangwě ba yokiya mâ.
28Jâ ndi ja omě ja tomba bamo ba Midian, bamo ba ihamba; ka bâ‐ba dula Josěf, ka bâ‐ba věngidě mâ o mbela, ka bâ‐ba hamba Josěf na bato ba Ishmeěl na mabo ma bepěhi bea hika etano mabale. Ka bâ‐ba pâdě Josěf o Ijipt.
29Ka Ruběn a timba o mbela; na, umbwakiyate, Josěf à diye pě o mbela: ka mâ‐a nyaya ibâtâ jaju.
30Ka mâ‐a timba o bana ba hangwě ba jadi, ka mâ‐a vâ, na, Mwana a ibě; n‘ umba, mbi ka ’la l‘ ove?
31Ka bâ‐ba nângâ ngâi ya Josěf, ka bâ‐ba weya mbodi ya momi, ka bâ‐ba duba ngâi o makiya;
32Ka bâ‐ba lomidě ngâi tě ya behini beitě, ka bâ‐ba vana yâ o hangw‘ ’abu a jadi; ka bâ‐ba vâ, na, Ekae nd‘ eahu e ma duwa; nandi yembaka ipě ndi ngâi ya mwan‘ ’âvě, ipě e ’bě.
33Ka mâ‐a yemba yâ, ka mâ‐a vâ, na, E ndi ngâi ya mwan‘ ’amě; tito ebe e pukuli mâ; e ’bě na penda Josěf a nyawudwěndi bepěhi.
34Ka Jekâb a nyayi ibâtâ jaju, ka mâ‐a bâtâ bangisi o hena, ka mâ‐a diya o jěbâ ja mwan‘ ’aju hwi ütě.
35Ka bana baju ba bamo na ba bajo běhěpi ba ’muwa ka kehě mâ; nd‘ a lěvěkindi ikehwě; ka mâ‐a vâ, na, Mbi ka ’late o malonga, o mwan‘ ’amě a jadi umba t‘ o jěbâ. Ka hangwě a ya mâ.
36Ka ba Midian ba hamba mâ o Ijipt o Potifěr a jadi, uhayi mua Fereo, ngâwě ya sâjě i vengakidě.
Currently Selected:
Jěnisis 37: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
