Roma 12
12
Arahan Hwan Ehumi an Isu’to
1Ihwania illarak hoŋ, elolya ni jihatai ta amehino ono Hollum isyoryere ahwattek hatai jihonyi ihwa ehumita hun isui’to bwo fe olibori. Oŋida isi bwo fe arai ehumita hun itamunoi Hollum, nyo ara ana etahabuyo on osiru’to jihonyi. 2Hemohina jyo afau ana ati omohina jyo amanya hatai aŋejuk te eloico ono egigilita hatai jo oŋida itai inyurana bwo fe ijifatyete awahan ono Hollum nyo oyyu inyi bwo fe obis.
3Nyo ta amehino ninya isyori jihoŋ eramak ni itai daŋ jo hegigiloti ta ahwattek hatai jojo igalihina tai aati omuk. Ati ihumata igigilo on oyyu nyo ta neruk ninya isyo Hollum jihatai. 4Owoni aŋaco hwattek arryai jihohoi ta ahwan abotye bwo egyama hosi obeŋ orryama. 5Ihwa ania dwadi bu elwaja hohoi era hohoi ahwan abotye itwa Kristo, tania egyama hohoi arabotye ilwahyere illarak hohoi. 6Ati ewon hohoi iko esyorita ababo hun isyo Hollum jihohoi ta amehino honyi. Lya al isyori jihonyi nesyoryo ono nekila ijara hetekilai on oremik ta neruk honyi. 7Kuyya ara esyoryo honyi alwahyo, ijara inyi hotolwaha aati omuk. Oŋida ettiyanani ihanak ahwan honyi littiyenio. 8Bwo lya al ittittoyo’to, ijara inyi isyo ahwan honyi jyo nettittoyo. Ijara al isyoryo’to erre hesyara ta amuno. Ijara lya al itamanyayo’to hetetamanyaye on oyyu, bwo fe lya al itahutak’to amehino ijara hotomehinie ta namuno.
Esiŋyo jyo Aati Hollum
9Oŋida amuno obeŋ owon iko nenyobyo. Oliwati ehanita hun orrohoji’to. Ogolihina jyo ehanita hun oyiji’to. 10Omunoti illarak hatai ta amuno on obolo, bwo fe to omuk erre hun oyiji aharana illarak hatai ahosyere hatai. 11Al igyamati tai heboyojoto. Ifiriwajata to Oloyiri igyamari jyo Hobu. 12Oduloro muno te eyihina. Odihuna ettigemita te elik tajya. Oduloro mojo oŋitek daŋ. 13Olwahyete aati Hollum te erre hun owahi isi, arraŋuna atamonok bwo fe itamunoto isi.
14Omojoti te ettigemak hatai bwo fe hemoryete isi. 15Omunoti iko hya hul omunoi’to, bwo fe oyyoti iko hya hul oyyoi’to. 16Amanyati dee iko illarak hatai. Hetadarati ta ahwattek hatai ati orryahati iko aati asai. Hegigiloti jo ilofyorojoto tai igalihina aati omuk. 17Henienuna hya hul ihanie’to on orroho jihatai. Ihaniete erre hun oyiji’to ihomomite wati. 18Okemata itoŋori te elik tajya jyo aati daŋ ihwa iremehina tai. 19Illarak hul amuno ni, henienuna ta ahwattek hatai ati idehina, ottu adi Hollum inienuna; nyo igyoroni nya jo, “Ojo Hobu enienu adi ni bwo fe aduma adi ni lya.” 20“Ati al oniama amyotononi hoi isyarak jihonyi aŋiyo. Kuyya ibwoto inyi isyarak jihonyi aari. Kuyya ihanio iye ihwania isyo iye jihonyi ariri.” 21Helaha arrohoji agalik itai ati agalihina arrohoji ta ayiji.
Currently Selected:
Roma 12: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
