Ehanita 22
22
1Ojo Paulo, Illarak hoŋ iko monyye hoŋ daŋ, itaniŋyete iko itayirata obo ekyana hoŋ ana. 2Ninya itaniŋuni isi inyi ikyana te ekyana Ebrei ette isi dwa liŋ liŋ. Attati inyi jaran:
3Ani olo Yudea, amiji hohoi an isiunierek ani inyi Tarasa otto fau Silisia. Ettiyenu nya ni jo namiji ana, jyo ettiyanani Gamalio, efahita daŋ hun ogoli huno hohonyok hohoi. Bwo fe efiriwa nya ni te efahita huno Hollum ihwa itai. 4Ettigemyo nya ni ejifak hulo Hobu dwadi many ottohyerek isi. Etifitak nya ni alyawa iko aŋorwo ibabus, 5ihwa omijak ehumani ol obolo’to iko amarwak miji daŋ. Isyori nya isi awaraga jihoŋ liyari limiji Damasko lifitaniere hul owoni’to dia iko iyaŋuniere isi Yerusalem ibahyere.
Ekyana Paulo te Erwe Honyi
Ehan 9:1-19; 26:12-18
6Ati ninya lattu ni many liger Damasko, idwoŋ nya nafaŋan on obolo t’edou jihoŋ ta afanni. 7Ette ni kwaharu lifau ette itaniŋuna ekyana on ojo, Saulo, Saulo, ?nyo ittigemyo iye ani? 8Ettaraŋ nya ni ojo, ?Ŋai iye Hobu? Ojo inyi jihoŋ, Ani Yesu olo Nasaret al ittigemyo iye. 9Igonyuni hunya ewon’to ikoŋ afaŋan ati obeŋi itaniŋuni ekyana an ikyanai jihoŋ. 10Bwo ni ette inyyahina jihonyi ojo, ?Ehanio adi ni anyo, Hobu? Ojo inyi jihoŋ, Otte, ilo imiji Damasko bwo dia iramani adi jihoi nerre hun awak ni ihanio iye. 11Ati abeŋ nya ni aremik mijo nyo ta anico faŋan bebe tania orihoroi nya ani ta aani many limiji Damasko. 12Ottu obo atulo, afure honyi Anania, inyi atulo al ijifatyo’to efahita bwo fe ikikyanatye nya Yudea daŋ hutto miji jo oyyu inyi. 13Owotya inyi liger hoŋ ette jaran, Saulo, illaŋ, omije. Bwo ta asaa ania amijo ni ette igonyuna inyi. 14Ojo inyi jihoŋ, Onyimu Hollum olo hohonyok hohoi iye limijaniere nawahan honyi bwo fe ligonyuniere anyarani honyi iko litaniŋuniere netuk honyi. 15Ati ira adi iye ahetamijanani honyi jyo aati daŋ te erre hun igonyu iye bwo fe iko hun itaniŋu iye. 16?Ihwania itila iye anyo? Otte, ifwotu batisimo bwo fe illillaunie eyyata hoi addi te eloŋo hoi afure honyi.
Anyimuna Paulo Ittiyeniere Paganohyen
17Ninya acaharu ni Yerusalem, amojo nya ni to obo oloŋ lihaji imojit eneittok, 18ette ni igonyuna Hobu ta arigya al ikyana jihoŋ ojo, Obusak Yerusalem kokwak nyo obeŋi adi isi ifwotuni ekyanita hoi toni. 19Ajo ati ni jihonyi, Hobu omijani isi ta ahwattek hosi jo eniafatyo nya ni aati daŋ hul iruhi’to jihoi ihasik imojiti daŋ ette bahyo isi ette itifitana isi libabus. 20Hara dwo bu ihwa ninya owouno nooto ono etamijanani hoi Setefano awotya nya ni dia bwo fe ette ni iruk jo ijara inyi hotottohorohi. 21Ati ojo Hobu jihoŋ, Ilo ati, nyo efak adi ni iye alamarai bebe jyo paganohyen.
Aŋuŋusya Wati Paulo
22Itaniŋuni nya isi ekyanita honyi many ekyana ana attati isi iwuwoŋitai jojo, Ottohoro atulo alya, obeŋ inyi osiru iswori. 23Ati iwuwoŋitai isi bebe ette igwas aboŋojin hosi ette kur iko aboro ahide. 24Ifak eleittok olo oseŋer heteyaŋuniehe Paulo itwa korokon ikemyere inyi ta abahyo inyuraniere awoyo hiram an iwuwoŋitarik laati jihonyi. 25Ati al ifiti isi inyi to ofito, ojo Paulo jyo oseŋeritanani, ?Obeŋi itihi jihatai ibahyere atulo olo Roma hobeŋi oŋoti eram honyi? 26Al itaniŋu oseŋeritanani alya ana olo inyi jyo eleittok hosi ifiyere inyi ojo, ?Ihanio adi iye anyo jyo atulo olo? Ara dwadi olo Roma. 27Tania ottu eleittok jihonyi ette jaran, ?Iye olo Roma? Ojo Paulo, Afe. 28Ojo oseŋeritanani, Aduma nya ni agurusi arryai irari olo Roma, bwo Paulo ette jaran, Ati isiuni nya ani to Roma. 29Tania hinya daŋ ojori’to ekem inyi ette busana inyi kwak. Abaŋ bwo fe eleittok jo etifitak inyi atulo olo Roma.
Awotya Paulo Ihosyere Leittaha
30Ati nya motye awahi isi mijana errosit ono Yudea inyi attati eleittok houna inyi bwo ette iramana ehumak eleittaha iko lewwak hiram ittubaniere ahwattek hosi. Ette inyi iyaŋuno Paulo ette itawojihina lihosyere hosi.
Currently Selected:
Ehanita 22: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
