Ehanita 21
21
Aleten Paulo Yerusalem
1Ninya ebusak hohoi isi, efwo nya hohoi ta ababur many Kos bwo fe nya motye Rode, bwo teyya many Patara. 2Dia enyurak hohoi ababur obo an allaŋ’to aari many Fenisia attati hohoi jiŋana itwa honyi ette fwatan. 3Hegonyu hohoi afau Ciporo ette busana inyi ahani ihorroŋ attati hohoi fanyan ifau Sirya ette hohoi isuruna to babur imiji Turo nyo owotya ababur ibusaniere asaŋ dia. 4Enyurak hohoi eyiyanak dia ette itoŋo ikosi oŋitek hattarik. Ta adwaran ono Oloyiri iramani isi Paulo ojo, Helo Yerusalem. 5Ninya ottubai oŋitek hohoi dia, ebusak hohoi isi ette fwatan. Bwo iniamarai isi hohoi daŋ iko aŋorwo ojo aduri many iler miji. Erigoŋ hohoi ilotifor hari ette mojo dia ette imalayo isi. 6Ejiŋak hohoi ibabur ette isi caharu imiji.
7Ninya ebusak hohoi Turo ette hohoi fanyan imiji Tolomo. Efonya hohoi iko illarak hohoi bwo fe etoŋo ikosi oloŋ abotye. 8Nya motye ebusak hohoi isi ette fanyan imiji Cesarea. Ejiŋak hohoi dia ihaji Filipo ettittoni sayyo hun oyiji. Ara nya inyi olo hulya hattarik. Etoŋo hohoi ikonyi. 9Owon inyi iko ŋarryok aŋwan hun ikilai erre hun hofwonni’to. 10Etoŋo hohoi dia omuk oŋitek ette obo eyani sayyo ’tuna to Yudea, afure honyi Agabo. 11Ette inyi inefuna agas ono Paulo ette fitaru ahas honyi iko ejek. Ojo inyi, Ikyana Oloyiri ol Olibo jo, Ihwa ana ifitani adi Yudea hutto Yerusalem monye agas ana ette isyarana inyi jyo paganohyen. 12Etaniŋu hohoi ania elolya hohoi iko laati jo oŋida Paulo obeŋ olo Yerusalem. 13Ati itarraŋ Paulo ojo, ?Nyo iyyoti tai bwo itamijata ataji hoŋ bebe? Nyo ehuhuma ni ta ababus dwadi bu iyeri imiji Yerusalem ta afure Hobu Yesu. 14Egonyu hohoi jo obeŋ adi inyi iruk ekyanita hohoi tania edehi hohoi inyi ette jaran, Ijara awahan ono Hobu hetehaniehe.
15Ihalu oŋitek huna ehuhumyo hohoi ahwattek hohoi ifwarri Yerusalem. 16Efwo hohoi iko omuk leyiyanak hulo Cesarea hul edaha nya ikohoi bwo isi ette iyaru hohoi ihaji Masona olo Ciporo obo leyiyanani many beryen. Etoŋo hohoi dia.
17Ninya lefany hohoi Yerusalem arraŋuni hohoi illarak ta namuno. 18Nya motye efwo hohoi iko Paulo jyo Yakobo bwo amarwak hulo eklesya. 19Ette Paulo ifony isi bwo ittittohi isi erre daŋ ababo hun ihanio nya Hollum ihiji paganohyen te ettiyenita honyi. 20Itaniŋuni isi ania ette itahabuyo Hollum. Bwo fe ojori isi, Imijye illa, owoni Yudea hul olwaji bebe esiha arryai hul iruhi bwo fe ifiriwaji bebe jo efahita hunya beryen. 21Iramani isi jo ittiyenio iye aati Yudea hul amanyai iko paganohyen jo oŋida isi obusani efahita huno Mose iko aŋoto bwo emohiti hohoi. 22?Anyo ’tadi ehanio hohoi? Itaniŋuni adi isi jo ifany iye dini. 23Ihwania oŋida iye ihanio ihwa eramak hohoi iye. Owoni dini laati aŋwan hul owoni iko ellama. 24Ifwatta ikosi bwo fe italiboro ahwan hoi ikosi bwo fe odumai edumiti hosi oŋida isi ogiti osi hosi. Tania omijani adi laati daŋ jo obeŋi ekyanita hunia arai ahode, ati iye ta ahwan hoi ihanio erre huno efahita daŋ. 25Ati jyo paganohyen hul iruhi, efak nya hohoi awaraga jihosi iramaniere isi aŋoco hohoi jo oŋida isi ihari erre hun isyori te ehuma jyo ajohin, iko nooto, bwo erre hun obuni bun, iko erre somon. 26Teyya iyaro Paulo aati bwo nya motye italibo inyi ahwan honyi ikosi. Ette inyi leten ihaji imojit eneittok itahutaniere jyo laati jo itadwari isi oŋitek huno alibori bwo latuhuno isyori isi ehuma tesi daŋ ababo.
Enefuna ono Paulo
27Ninya ilyahai oŋitek hattarik hwa attuba, igonyuni omuk Yudea hulo Asia Paulo ihaji imojit eneittok ette isi itamoryo eluluŋ wati bwo ette inef inyi ette iloŋo jo, 28Aati Israele, olwahata hohoi, nyo atulo olo ittiyenio aati imasik daŋ jo orrohoji efahita iko aati bwo amaji ana. Bwo fe iyaŋuno inyi omuk Grik itwa haji ana ette inyi itarroho amaji on odwa. 29Nyo igonyuni nya isi Paulo imiji iko Trofimo olo Efisa bwo fe isi ette igigilo jo ara dwadi heyaro Paulo inyi ihaji imojit eneittok bwo fe. 30Tania iwuwoŋitai aati hutto miji daŋ. Oŋeri isi arabotye ette inef Paulo bwo fe ipihoroi inyi addi to haji imojit eneittok ette ihyanana ekatin. 31Ojori isi ettoho inyi ati itaniŋu eleittok olo oseŋer jo iwuwoŋitai aati daŋ hutto Yerusalem. 32Ette inyi ŋyoron kwak iko oseŋer honyi jihosi. Igonyuni isi eleittok iko oseŋer ette isi busana abahyo hosi Paulo. 33Inef eleittok Paulo ette ifahina oseŋer ifitaniere inyi ta aririk arrihai. Attati eleittok ifiyo aati ojo, ?Ŋai ati atulo olo?, bwo, ?Ihanio inyi anyo? 34Iwuwoŋitai isi daŋ gele gele many obyaŋari eleittok oremehiniere nyuraniere awoyo hiram an iwuwoŋitarik laati daŋ bebe. Ihwania ifak inyi oseŋer heteyaŋuniehe Paulo ikorokon. 35Ilyahinie isi ikat bwo oseŋer ette kaf Paulo nyo iloŋojitai aati bebe jihonyi. 36Bwo fe iwuwoŋitai aati arryai jojo, Ijatta so hotoye.
37Ninya afanyi isi likat ette Paulo jaran jyo eleittok ojo, Awak ni ikyana jihoi omuk erre. Itarraŋ inyi ojo, ?Imijak iye ekyana Grik? 38?Ibeŋ iye ira olo Masir el hetek’to itamoryo laati ette iyaro isi daŋ imur, awati esiha atomwana aŋwan hatarahahi ahattok wati? 39Ojo Paulo, Ani olo Yudea olo amiji Tarasa lifau Silisia, inyi amiji on obolo, bwo fe amojo ni jihoi awak ni ikyana jyo laati hulo. 40Aŋatak inyi Paulo likyanari ette inyi wotya iger ikat ette itadwa aati ta aani honyi. Attati isi daŋ dwa ette Paulo itteryo ikyana jihosi te ekyana Ebrei.
Currently Selected:
Ehanita 21: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
