Ehanita 18
18
Ettiyenio Paulo Limiji Korinto
1Ojo lihalu, ninya labusak Paulo Atena, ette inyi leten imiji Korinto. 2Orumak inyi dia lobo olo Yudea, afure honyi Akwila olo Ponto ol ottu’to to fau Italya, iko ŋorwoi honyi Prisila nyo ojo nya Klaudio jihosi oŋida Yudea daŋ obusani Roma. Attati Paulo leten ifonyere isi, 3ette itoŋo ikosi bwo fe ette igyama ikosi nyo orrijo nya egyama hosi. Arai nya isi daŋ ahehuhumak musyamahyen. 4Ati iwwaha nya inyi iko laati lihaji imojit esabiti daŋ bwo ittittoyo nya inyi Yudea iko Grik ette isi iruk.
5Ninya lafanyi Sila iko Timoteo to fau Masedonia onyurani isi Paulo igyama bebe te ettittoyo itamijaniere Yudea jo ara Yesu olonyimoto olo Hollum. 6Ninya lihari isi inyi bwo fe ette moryo inyi illillik inyi aboŋojin honyi ette jaran, Kuyya ottu aŋoco ono Hollum jihatai ara eram hatai, obyaŋara onoŋ. Ihwania alo ni jyo paganohyen. 7Obusak inyi amaji ania ette leten lihaji ono obo atulo afure honyi Tito Justo al iruk’to nya jyo Hollum. Owon nya aji honyi iger haji imojit. 8Bwo iruk nya Krispo, eleittok olo aji imojit jyo Hobu iko aati hutta haŋ hosi daŋ. Bwo fe al itaniŋye aati hutto Korinto arryai, iruhi isi bwo ifwotuni batisimo. 9Ati ninya liharwe ikyana Hobu jyo Paulo ta arigya ojo, Hebaŋ, bwo fe hedwa, ikyanai, 10nyo errirriyo ni iye bwo obeŋ adi iye tulo ebak nyo aati hoŋ huttono amiji ana olwaji bebe. 11Tania itoŋo inyi dia eŋa abotye iko omuk ayafajin ille ittiyeniere ekyana ono Hollum jihosi.
12Ati ara nya Galio eleittok olo Akaya tania iŋereji Yudea jyo Paulo ette iyaŋuno inyi lilokikoi ette jaran, 13Isusuyo atulo alya aati itahabuyere ajok obo ol obeŋ’to oleyo te efahita. 14Ati ninya lajo Paulo alyau hunonyi ojo Galio jyo aati Yudea, Al ara ana eram ono ehanio honyi on orroho’to kuyya to obo eyyau, etaniŋyo adi ni jihatai aati Yudea. 15Ati al ara ihwania te eram ono ekyanita bwo fe afureta, ojo efahita hatai, oŋocete eram ania ta ahwattek hatai. Abeŋ ni aŋototyo erre hun arai’to ihwo hunia. 16Ette inyi ifuhara isi addi to lokiko. 17Teyya inefuni isi Sostono eleittok olo aji imojit ette bahyo inyi ihosyere lokiko, ati obeŋ Galio igigilo te erre hunia.
Acaharo ono Paulo Antioka
18Ihalu ana itoŋo Paulo fur oŋitek arryai. Attati teyya, imalayo nya inyi eruhok, ette leten ifau Sirya ta ababur iko Prisila bwo Akwila. Ati ninya howon Paulo imiji Cencere oŋer inyi nofir honyi te eram ono ellama. 19Ninya lafanyi isi Efisa obusak Paulo isi dia, ette leten ihaji imojit iwwahari iko Yudea. 20Ninya lifiye isi inyi itoŋori ikosi do, ette inyi ihara, ati ninya lalo inyi ojo inyi jihosi, 21Acohuno adi ni al aŋatak Hollum ani. Ette inyi busana Efisa ette leten ta ababur.
22Ninya lafany inyi Cesarea olo inyi ahosyere lifonyere eklesya bwo ihalu ette leten Antioka. 23Itoŋo inyi dia to omuk oŋitek kai ette dyoto teyya ette leten limasik omuk daŋ huno Galatia iko Frigia itagolyere atajya heyiyanak.
Ettiyenio ono Apolo
24Ihwania, owon nya obo olo Yudea afure honyi Apolo, bwo ara inyi olo Alesandria. Ottu inyi Efisa. Inyi nya atulo ol omijak ekyana bebe bwo fe omijak inyi ekyanita huno Hollum hutto buk honyi bebe. 25Nyo iyiyana nya inyi eram ono Hollum bebe bwo fe ifiriwa inyi te ekyana hiram Hollum. Ittiyenio inyi eram ono Yesu on oyyu, ati omijak inyi batisimo ono Yoane hama. 26Itteryo nya inyi ettiyenio ihaji imojit te eŋere. Ati ninya itaniŋuni Prisila iko Akwila inyi, iyarai isi inyi ette ittiyenio inyi ekoi ono Hollum on obis. 27Ihalu al awak inyi leten Akaya itagoli nya eruhok ataji honyi ette igyoronia jyo leyiyanak hulo amaji nya ifwotuniere inyi. Ninya lafany inyi dia, olwak inyi eruhok bebe. 28Nyo itadwahi inyi Yudea te ewwaha ihosyere wati itahutaniere isi jo ara Yesu olonyimoto olo Hollum.
Currently Selected:
Ehanita 18: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
