Ehanita 17
17
Afwatan Hosi Tesalonika
1Allaŋi isi Ampipolisa iko Apolonia ette fanyan Tesalonika bwo owon nya aji imojit ono Yudea dia. 2Attati Paulo jiŋana dia nyo lamohitari inyi toloŋi, ette iwwaha ikosi te ekyana ono Hollum esabiti hunihoi. 3Bwo itahutak Paulo jihosi jo oŋida nya Kristo odihu ettigemita bwo fe oŋida ibuhu to ye. Bwo ojo inyi, Yesu alya ihwa eramak ni itai, inyi alya Kristo. 4Ati iruhi omuk hulosi ette inosonio jyo Paulo iko Sila ihwa ihanie Grik arryai iko nomuk naŋorwo hun eittaha. 5Ati ta nahaini Yudea omuk, iloŋuni isi aati hul orrohoji’to ette ’tubana eluluŋ wati on obolo. Itiwuwoŋye isi aati arryai hutto miji bwo ette itarroho aji ono Jasono iyaŋuniere Paulo iko Sila jyo aati. 6Ati obeŋi isi orumani isi tania ette inefuna Jasono iko omuk eruhok bwo ipihunie isi ihosyere gala ette jaran, Arai aati hulya ahetarrohojak fau daŋ, ati ihwania afwonni bwo fe ini. 7Bwo hulo ette ifwotuna isi, bwo omesye isi daŋ efahita huno hobu Cesare ojori owon obo Hobu, inyi Yesu. 8Ninya itaniŋuni aati iko gala neram ana ette isi ihawwa. 9Attati isi mojuna edumiti jyo laati hulya iko jyo Jasono ette hohina isi.
Nadaha Lefahat Berea
10Attati eruhok ifahina Paulo iko Sila addi kwak ta arwe ania imiji Berea. Ninya lafanyi isi dia ette isi jiŋana lihaji imojit. 11Ati Yudea hulya oyiji isi agalihini hulo Tesalonika. Ifwotuni nya isi ekyanita ta namuno attati isi ’tifya egyerita huno Hollum oŋitek daŋ imijyere kuyya arai erre hunia ahode. 12Tania olwaji nya hulosi hul iruhi iko hulo Grik bwo aŋorwo hun eittaha. 13Ati ninya litaniŋuni Yudea hulo Tesalonika jo ittittoyo Paulo ekyana Hollum imiji Berea, ofwoi isi dia ette ititaŋusiyo laati hya itarrohojyere atajya hosi. 14Attati illarak ifahina Paulo addi kwak many ihari. Ati arasai Sila iko Timoteo dia. 15Iniamani isi Paulo many Atena. Ette Paulo ifahina isi hatacaharahi jyo Sila iko Timoteo ojo, Hetefwonniehe jihonyi kwak.
Ettiyenio Paulo Imiji Atena
16Ihwania itila Paulo isi imiji Atena ette inyi ijiriŋa bwo fe iloŋojita nyo igonyu inyi arrijorihyen arryai hun omojorik laati. 17Attati inyi iwwaha iko Yudea bwo omuk laati hinya awahi’to itaniŋyo ekyana Hollum oŋitek daŋ to suk. 18Dia owoni nya bwo fe omuk aloferejok hulo Epikurina iko Stoika. Bwo ojori isi, ?Ikyana olohutuk alya anyo? Bwo itarraŋi omuk ojori, Ittiyenio inyi erre huno ajohin omuk. Nyo ittiyenio Paulo eram Yesu iko nebuhuna honyi. 19Attati isi inefuna inyi ette iyaru inyi jyo amaji ono lokiko an ifurani Arepoga. Ojori isi, Iramak hohoi ettiyenio aŋejuk ana an ittiyeniere iye. 20Nyo iyaŋuno iye omuk nasayyo hun olufaji jihohoi bwo fe ewak hohoi itaniŋuna awoi hirre hosi. 21Nyo aati hutto Atena iko atamonok hul amanyai’to dia ikikyanai isi bwo fe itayirye ta asahyen daŋ erre aŋejuho.
22Tania owotya Paulo imaji lokiko an ifurani Arepoga ette jaran, Hulo, aati hulo Atena, egonyu ni jo igigiloti tai ta ajohin bebe. 23Nyo ta naddiddaha hoŋ imiji ana egonyuta ni arrijorihyen arryai hun omojorik aati bwo fe anyurak ni nobo naji ono nehuma an igyoroni dia ojo, Jyo ajok obo al etimo hohoi. Inyi alya el ibyaŋata tai imijana el eeramyo ni jihatai. 24Inyi Hollum ol oyyeu’to afau iko nerre daŋ hun owoni’to ifau. Inyi Hobu olo nedou iko nafau ati obeŋ inyi amanya lihasik hun oduhoni aati. 25Bwo fe obeŋi aati oremehini ilwak inyi to omuk erre. Obeŋ inyi awak omuk erre nyo inyi ta ahwan honyi isyo nesu iko oloyiri iko erre daŋ jyo aati. 26Oyyeu nya inyi to tulo abotye awoi wati daŋ hul amanyai’to lifau bwo oŋotok nya inyi aŋasi hun isworik aati bwo fe afauhyen emanyiti hosi. 27Oŋida isi ottifyai Hollum bwo heteyihiniehe jo erumak adi isi inyi, nyo obeŋ inyi alama jihohoi daŋ ababo. 28Nyo,
Esu hohoi tenyi, eddiddaha bwo fe emanya tenyi.
Ihwa ikyanai omuk aloferejok hatai jojo,
Ahode era hohoi aduri honyi.
29Tania ta arahan hohoi aduri honyi helaha hohoi bwo fe egigilo jo ara Hollum ihwa arrijori ono ayyel kuyya abilata, kuyya bu amorwo an ihuhum atulo te egigilo honyi. 30Inya obyaŋarik aati omijanierek omuk erre omehino Hollum jihosi ati ihwania ifak inyi aati hutto fauhyen daŋ jo oŋida isi iloiti atajya hosi t’eyyata hosi. 31Nyo onyimu Hollum oloŋ on oŋocere adi inyi aati daŋ ta alibori bwo aŋotoni inyi alya ol onyimu nya Hollum, bwo fe itamijanak Hollum inyi jyo laati te etubuhuna honyi inyi to ye.
32Ninya litaniŋuni aati Atena eram ono ebuhuna to ye osuhotye omuk bwo omuk ojori, Etaniŋu adi hohoi iye inyyak ikyana eram ana obo oloŋ. 33Tania ette Paulo leten addi t’ehiji hosi. 34Ati omuk laati adahai ikonyi bwo fe iruhi, afure obo Dionisyo olo Arepoga iko nobo aŋotte, afure honyi Damaria iko omuk bwo fe.
Currently Selected:
Ehanita 17: LOT1969
Highlight
Share
Compare
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
