Ai Vola I Sifaniya Na Parofita 1
1
A WASE I. —Ena cudruvi sara ko ira na Juta e na vuku ni nodrai valavala ca e vuqa, 1-18.
1A VOSA i Jiova ka yaco vei Sifaniya na luve i Kusi, na luve i Kitaliya, na luve i Emariya, na luve i Isikeya, e na gauna i Josaia na luve i Amoni, na tui Juta.
2Au na kauta laivi sara na ka kecega mai na dela ni vanua, sa kaya ko Jiova. 3Au na kauta tani na tamata kei na manumanu; au na kauta tani na manumanu ni lomalagi, kei na ika ni waitui, kei na veika era tarabe kina, ko ya vata kei na tamata ca; ia kaʼu na muduka tani na tamata mai na vanua, sa kaya ko Jiova. 4Au na dodoka talega na ligaqu me tauci Juta, kei ira kecega na kai Jerusalemi; ia kaʼu na kauta tani mai na yasana o qo na vo i Peali, kei na yacadra na bete dina era ca, o ira vata kei na bete lasu; 5kei ira sa soro ki na kalokalo ni lomalagi e na dela ni veivale; kei ira sa soro ka vosavavakini vei Jiova, ka vosavavakini vei Malikami; 6kei ira sa vuki tani vei Jiova, a ra tawa vakasaqarai Jiova, se tarogi koya.
7Mo tiko lo e na mata ni Turaga ko Jiova: ni sa voleka mai na siga i Jiova: ni sa vakarautaka ko Jiova e dua nai madrali, a sa lesi ira sa sureta ko koya.
8Ia ena yaco e na siga ni madrali i Jiova, au na cudruvi ira na turaga kei ira na gone vakaturaga, kei ira kecega era vakaisulu e nai sulu vakatani. 9E na siga talega ko ya au na cudruvi ira kece era ladeva nai lago ni katuba, ka vakasinaita na veivale ni nodra turaga e nai yau ni veivakayanaki kei na veivakaisini.
10Ia ena yaco e na siga ko ya, sa kaya ko Jiova, ena ia na domo ni tagi mai na matamata-ni-koro ni ika, kei na qoqolou mai na kenai karua, kei na veivakacacataki levu mai na veiulu-ni-koro. 11Dou qoqolou, na lewe i Makitesa, ni ra sa vakarusai kece na mataqali dauveivoli; sa ra muduki kece tani na daucola siliva.
12Ia ena yaco e na gauna ko ya, au na vakasaqaqara voli e Jerusalemi e na cina, ka cudruvi ira era vaka na waini sa cevata tu e na kena soko, era kaya e lomadra, Ena sega ni caka ka vinaka ko Jiova, ena sega talega ni caka ka ca. 13Ia na nodrai yau ena yaco mei toki ni valu, kei na nodra veivale me rusa: a ra na tara vale, ka tawa tiko kina; a ra na tea na veivaini, ka tawa gunuva na kena waini.
14Sa voleka mai na siga i Jiova e levu, sa voleka mai, ia sa kusakusa sara mai; a domona na siga i Jiova, sa ka rarawa na nona tagi kina na qaqa. 15A siga ni cudru na siga ko ya, na siga ni ca kei na rarawa, na siga ni veivakacacani kei na veivakarusai, na siga butobuto ka loaloa, na siga ni o kei na butobuto levu, 16na siga ni davui kei na kaila ni valu, na kedra na Veikoro kaukauwa, kei na kedra na veivale ni valu e cecere. 17Ia kaʼu na vakararawataki ira na tamata, a ra na lako voli me vakai ira na mataboko, e na vuku ni sai Jiova erai valavala ca kina: ia na kedra dra ena sovaraki me vaka na kuvu-ni-soso, kei na lewedra me vaka na de-ni-manumanu. 18Io, na nodra siliva kei na nodra koula ena tawa vakabulai ira rawa e na siga ni cudru i Jiova; ia e na buka ni nona vuvu ena kani kina na vanua taucoko: ni na vakidacala sara na nona vakaoti ira laivi na lewe ni vanua.
Currently Selected:
Ai Vola I Sifaniya Na Parofita 1: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
