Ai Vola I Sikariya Na Parofita 14
14
Sa ia tiko ko Sikariya e so na parofisai, e bale ki na nodra cudruvi na meca i koya na Mesaia kei na nona tamata, kei na nodra veivakalougatataki era qaravi koya, 1-21.
1RAICA, na siga sa lako mai e nei Jiova, ena qai votai na kemui toki ni valu e tikimu. 2Niʼu na vakasoqona kece na veimatanitu ki Jerusalemi, me kabata; ena rawa talega na koro, ka vakayanaki na veivale, ia na alewa era na yarataki; ena lako tani talega e dua na wase ni koro ni ra vakabobulataki, ia na kena vo ni tamata era na tawa muduki tani mai na koro.
3Ena qai lako yani ko Jiova, me veivaluti kei na veimatanitu ko ya, me vaka e na siga ka vala kina ko koya e na siga ni valu. 4Ia ena tu na yavana e na siga ko ya e dela ni ulu-ni-vanua ni veiolive, a ya sa donui Jerusalemi mai cake, ia ena kavida rua eloma na ulu-ni-vanua ni veiolive kivakaki cake, kivakaki ra talega, me dua kina na buca levu sara; ni na sudra yani e dua na tiki ni ulu-ni-vanua kivakaki na tokalau, ka dua na tikina kivakaki na ceva. 5Ia dou na dro ki na buca e na noqu ulu-ni-vanua ko ya, ni na yaco sara na buca ni ulu-ni-vanua ki Aseli, io, dou na dro, me vaka ni dou a dro tani ni sa tavuki na vanua e na gauna i Usiya na tui Juta: ena qai lako mai ko Jiova na noqu Kalou, io, ko iko kei ira kece na nomu yalosavasava.
6Ia ena yaco e na siga ko ya, ena sega kina na rarama o talei, na butobuto loaloa ga. 7Ena qai yaco e dua na siga, (sa kilai ga vei Jiova,) ena sega ni veitaravi na siga kei na bogi; ia ena yaco, ni sa yakavi, ena tu mai na rarama. 8Ia ena yaco e na siga ko ya, ena dave tani tu na wai bula mai Jerusalemi, e dua na soniwai ki na waitui ki cake, ka dua na soniwai ki na waitui ki ra; e na vula i katakata kei na vula i liliwa ena vaka tu kina. 9Ia ena yaco ko Jiova me tui ni vuravura kecega: e na siga ko ya ena sai Jiova duaduaga, kei na yacana duaduaga. 10Ena vuki na vuravura kecega me tautauvata kei na buca mai Kepa ka yacovi Rimoni e na yasayasa vaka-ceva mai Jerusalemi: ia ena cecere, ka tawa e na kenai tikotiko, mai na matamata-ni-koro i Penijamini ka yaco ki na matamata-ni-koro makawa, ka yacova sara na matamata-ni-koro e na tutu ni koro; mai na vale-cecere talega i Enaeli ka yaco ki na nonai keli-waini na tui. 11A ra na tiko ga kina, ia na veivakarusai ena sega ni ia tale, ena tiko vakacegu ga ko Jerusalemi.
12Ia ena vakaoqo na mate levu ena yavita kina ko Jiova na veimataqali kece sa rai valu mai ki Jerusalemi; ena uru ga yani na lewedra ni ra wavu tu e na yavadra, a matadra talega ena uru yani e na dreke-ni-matadra, a yamedra talega ena uru yani e gusudra. 13Ia ena yaco e na siga ko ya, ena vakidroataki ira vakalevu ko Jiova; a ra na dui taura yadua na liga ni kai nona, ena dui laveti talega na liga ni tamata ki na liga ni kai nona. 14Ia ko ira talega na Juta era na vala mai Jerusalemi; ena kumuni vata talega na nodrai yau na veimatanitu kecega e tiko volita, na koula, kei na siliva, kei nai sulu, na ka levu sara. 15Ia na kedra mate levu na ose, na mule, na kameli, kei na asa, kei na manumanu kece ena tiko e nai valu ko ya, ena vaka na mate levu ga ko ya.
16Ia ena yaco, na kena vo kece ni veimatanitu kecega sa mai kabai Jerusalemi, era na lako cake talega e na veiyabaki me ra mai soro vua na Tui, ko Jiova ni lewe vuqa, me ra mai cakava talega na solevu ni vale vakacevaceva. 17Ia ena yaco, o ira na lewe ni veiyavusa e vuravura sa na tawa lako cake ki Jerusalemi me soro vua na Tui, ko Jiova ni lewe vuqa, ena sega ni vakatauci vei ira na uca. 18Ia na yavusa mai Ijipita, ke sa tawa lako cake mai, se yaco kina, ke na tawa vakatauci vei ira; ena tauvi ira na mate levu, a ya ena yavita kina ko Jiova na lewe ni veimatanitu era na tawa lako cake me mai cakava na solevu ni vale vakacevaceva. 19Ena vakaoqo na kena cudruvi ko Ijipita, kei na kedra cudruvi na lewe ni veimatanitu kecega era na tawa lako cake me mai cakava na solevu ni vale vakacevaceva.
20E na siga ko ya ena ceuti ki na kedrai qiriqiri na ose, Sa tabu me nei Jiova; ia na kuro e na vale i Jiova ena vaka na bilo e na mata ni cabocabo-ni-soro. 21Io, na kuro kece e Jerusalemi kei Juta ena tabu me nei Jiova ni lewe vuqa: ia ko ira kece era vakamate manumanu era na lako mai, ka mai kauta e so me ia kina na vakasasaqa, ia ena sega tale e dua na kai Kenani e na vale i Jiova ni lewe vuqa e na siga ko ya.
Currently Selected:
Ai Vola I Sikariya Na Parofita 14: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
