Ai Vola I Sikariya Na Parofita 12
12
Ena yaco na gauna era na veivutuni kina na kai Jutia e na vuku ni nodra vakamatei koya na Mesaia, 1-14.
1AI colacola ni vosa i Jiova na kedra na Isireli, sa kaya ko Jiova, o koya sa tevuka yani na mata-ni-lagi, a sa tauyavutaki vuravura, a sa cakava na yalo ni tamata e lomana. 2Raica, au na cakavi Jerusalemi me bilo dauveivakamatei vei ira kecega na veimataqali era tiko volita, ena vaka talega kina ko Juta, ni sa buku na druadrua e Jerusalemi. 3Ia e na gauna ko ya kaʼu na cakavi Jerusalemi me vatu dauveibitaki vei ira kecega na veimataqali: o ira kece era laveta era na lautava, ia era na soqoni vata ga na lewe i vuravura kecega me ra mai kaba. 4E na siga ko ya, sa kaya ko Jiova, kaʼu na dui yavita na ose kecega, me kidroa; kei ira sa vodoka, me lialia: a mataqali i Juta kaʼu na yadrava, ia na nodra ose kece na veimataqali kaʼu na dui yavita, me mataboko.
5A ra na dui kaya e lomadra na turaga ni Juta, Sa ra noqu kaukauwa na kai Jerusalemi e na vuku i Jiova ni lewe vuqa na nodra Kalou. 6E na siga ko ya kaʼu na cakavi ira na turaga ni Juta me tautauvata kei na miqa ni buka waqa e na loma ni buka droka, ka tautauvata kei na cina e waqa tu e nai vau sila, a ra na kati ira voli ki matau kei mawi na veimataqali era tiko volita: ena qai tiko tale ko Jerusalemi e na kenai tikotiko dina mai Jerusalemi. 7Ja ko Jiova ena vakabula taumada na nodra vale malo na Juta, me kakua ni viavialevu nai ukuuku ni mataqali i Tevita kei nai ukuuku ni kai Jerusalemi vei ira na Juta. 8E na siga ko ya ena vakarurugi ira na kai Jerusalemi ko Jiova; ia ko koya sa malumalumu vei ira e na siga ko ya ena tauvata kei Tevita; ia na mataqali i Tevita ena vaka na Kalou, io, ena vakataki koya na agilose i Jiova ka liutaki ira. 9Ia ena yaco e na siga ko ya, kaʼu na qara meʼu vakarusa na veimatanitu kecega erai valu mai ki Jerusalemi. 10Au na sovaraka talega ki na mataqali i Tevita, kei na kai Jerusalemi, na yalo e vu ni loloma kei na vakamamasu: a ra na vakaraici au era sa coka, a ra na tagicaki koya, me vaka e dua sa tagicaka na luvena e dua bauga, ka rarawa sara e na vukuna, me vaka e dua sa rarawa sara e na vuku ni nona ulumatua.
11E na siga ko ya ena dua na tagi levu; e Jerusalemi, me vaka na tagi mai Etatiri-moni e na buca ko Mikitoni. 12Ia ena dui tagi na lewe ni vanua, na yavusa yadua vakai ira; na yavusa ni mataqali i Tevita vakai ira, kei na watidra vakai ira; na yavusa ni mataqali i Nacani vakai ira, kei na watidra vakai ira; 13na yavusa ni mataqali i Levi vakai ira, kei na watidra vakai ira; na yavusa ni mataqali i Simi vakai ira, kei na watidra vakai ira; 14io, na yavusa kecega sa vo, na yavusa yadua vakai ira, kei na watidra vakai ira.
Currently Selected:
Ai Vola I Sikariya Na Parofita 12: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
