Vei Ira Na Kai Roma 3

Sa tukuna ka veiletitaka ko koya na nodra nanuma na Jiu, 1-20. Sa qai vakatakila ni da sa vakadonui e na vuku i Jisu ga, ni da sa vakabauti koya, 21-31.

1A CAVA na ka e yaga cake, sa qai nona na Jiu? se cava na betena na veicili? 2E levu e na ka kece; e levu sara, ni sa lesi ko ira me ra maroroya na vosa ni Kalou. 3Ia ka vakaevei, kevaka sa tawa dina mai e so? me vakatawayagataka li na nona dina na Kalou na nodra tawa dina? 4E segai sara: ia me dina ga na Kalou, ka me lasu na tamata kecega; me vaka na ka sa volai, Mo vakadonui ni ko sa vosa, ka gumatua ni ko sa veileti.

5Ia kevaka sa vakadinadinataki nai valavala dodonu ni Kalou e na vuku ni nodatoui valavala tawa-dodonu, a cava me datou kaya? sa tawa dodonu beka na Kalou, ni sa sauma? (Au sa vosa me vaka ga na tamata.) 6E segai sara: kevaka sa vakaoqo, ena qai lewai vuravura vakaevei na Kalou? 7Io, kevaka sai koya na noqu lasu sa uasivi cake kina na nona dina na Kalou, me vakarokorokotaki ko koya, sa qai cava kaʼu sa cudruvi tiko kina me vaka na tamata ca? 8ia ena sega li ni vaka ni keitou sa lasutaki, ka sa kainaki ni keitou sa vosa vakane, Me da kitaka nai valavala ca, me yaco kina na ka vinaka? ia ko ira o qo era na cudruvi vakadodonu.

9Ia ka vakaevei? edatou sa uasivi cake li? E segai sara e na ka e dua: ni keitou sa vakadinadinataka eliu ni ra sa beitaki rawa mei valavala ca kecega, ko ira na Jiu, kei ira sa matanitu kisau;

( 10me vaka na ka sa volai, Sa sega e dua sai valavala dodonu, sa sega sara e dua: 11sa sega e dua sa kila, sa sega e dua sa vakasaqara na Kalou. 12Era sa lesu tani kecega, era sa yaco vata me tawa yaga; sa sega e dua sa valavala vinaka, sa sega sara e dua. 13Ai bulubulu sa dola tu na nodrai tilotilo; era sa dauveivakaisini e na gusudra; sa tu e ruku ni bele-ni-gusudra na weli-gaga ni gata: 14sa sinai na gusudra e na ruru kei na vosa e daugaga: 15sa kusarawa na yavadra me vakadavea na dra: 16sa tu na rusa kei na rarawa e na nodra sala: 17ia era sa tawa kila na sala ni veivakacegui: 18sa sega e na matadra na rerevaka na Kalou.

19Ia eda sa kila ni sai ira sa tu kina na vunau, sa kaya kina ko na vunau na ka kecega sa kaya; me vagalui kina na gusu kecega, ka me beitaki e na mata ni Kalou na kai vuravura kecega:)

20Ni sa sega ni valavala ni vunau ena vakadonui kina e dua na tamata e na matana: ni sai koya na vunau sa kilai kina nai valavala ca.

21IA ka sa qai vakatakilai mai e na gauna o qo na ka sa veivakadonui kina ko na Kalou, a ya sa tawa yaco mai na vunau, a sa vakadinadina kina na vunau kei ira na parofita; 22io, na ka sa veivakadonui kina ko na Kalou, a ya sa yaco e na vuku ni vakabauti Jisu Karisito, vei ira kecega, ka me nodra kecega, era sa vakabauta; ni da sa tautauvata kecega: 23ni sa valavala ca ko ira kecega na tamata, ka cala mai na ka e vakarokorokotaki kina na Kalou: 24a ra sa vakadonui walega e na nona loloma e na vuku ni sa volia na bula ko Karisito Jisu: 25o koya sa lesia ko na Kalou mei bulubulu vei ira sa vakabauta, e na nona dra, me vakatakila na nonai valavala dodonu ni sa tawa cudruva nai valavala ca sa caka oti, e na vuku ni sa vosota ko na Kalou; 26io, me vakatakila e na gauna o qo na nona yalododonu: me sa dodonu ko koya, ka vakadonui koya sa vakabauti Jisu.

27Sa qai evei beka na vosa vakaviavialevu? Sa takali sara. E na vuku ni vunau cava li? ni daucakacaka li? E segai: e na vuku ga ni vunau ni vakabauta. 28O koya keitou sa vakakina ni sa vakadonui na tamata e na vakabauta, ia ka sega ga e na vuku ni valavala ni vunau. 29Sa nodra duaduaga beka na Jiu ko na Kalou? sa sega beka ni nodra talega na veimatanitu kisau? Io, sa nodra talega na veimatanitu kisau: 30ni sai koya duadua na Kalou, ena vakadonui ira sa cili, e na vuku ni vakabauta, kei ira talega sa tawa cili, e na nodra vakabauta. 31Keitou sa qai vakatawayagataka na vunau e na vakabauta, se segai? E segai sara: keitou sa vakataudeitaka ga na vunau.

Currently Selected:

Vei Ira Na Kai Roma 3: FIJ1864

Highlight

Copy