Meke 28
28
A masu ni tamata lotu dina.
A Meke i Tevita.
1AU na tagi vei iko, Jiova; na noqu Uluvatu, kakua ni galuvi au; de ko galu vei au, kaʼu na vakataki ira era sa lako sobu ki nai bulubulu. 2Rogoca na domo ni noqu masu niʼu sa tagi vei iko; niʼu sa laveta cake na ligaqu kivakaki na nomu loqi tabu. 3Meʼu kakua ni vecei vata kei ira na tamata ca, kei ira sa caka ca; ko ira era sa vosaveivakacegui vei ira na kai nodra, ia ka sa tu e na yalodra na ca. 4Solia vei ira me vaka na nodra cakacaka, me vaka na ca era kitaka; solia vei ira me vaka na cakacaka ni ligadra; vakasuka tale vei ira na nodrai valavala. 5Ni ra sa sega ni vakananuma na cakacaka i Jiova, se na ka sa kitaka tiko na ligana; ena talaraki ira sobu ko koya, ka sega sara ni tarai ira cake.
6Vakavinavinaka vei Jiova, ni sa rogoca na domo ni noqu masu. 7A noqu kaukauwa kei na noqui vakaruru ko Jiova; sa vakararavi vua na yaloqu, a sa vukei au mai; a sa reki vakalevu kina na yaloqu; kaʼu na vakavinavinaka talega vua e na noqu meke. 8A nodra kaukauwa ko Jiova, kei nai Vakabula kaukauwa vua sa lumuta ko koya. 9Vakabulai ira na nomu tamata, ka vakalougatataka na nomui votavota; lewai ira talega, ka laveti ira ka tawa mudu.
Currently Selected:
Meke 28: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
