Maciu 20
20
A vosa vakatautauvata ni tamata sa lavaka vei ira na tamata daucakacaka na nona were-ni-vaini, 1-16. Sa vakatakila ko Jisu na nona mate, 17-19. Sa vakavulici iratou na tisaipeli me ratou yalomalumalumu, 20-28. Sa vakabula na mataboko e rua, 29-34.
1NI sa tautauvata na matanitu vakalomalagi kei na tamata sa taukena e dua na vale, a sa lako ko koya e na mataka caca me lavaka vei ira e so na tamata daucakacaka na nona were-ni-vaini. 2Ia ni sa veivosaki kei ira na tamata daucakacaka me ra tauyadua na pene-e-vitu e na dua na siga me kedrai voli, sa qai talai ira ki na nona were-ni-vaini. 3A sa lako ko koya e nai katolu ni tiki-ni-siga, a sa raici ira e so tale era sa tu walega e na rara ni veivoli, 4a sa kaya vei ira, Dou lako talega ki na were-ni-vaini, ia na ka e dodonu, kaʼu na solia vei kemudou. A ra sa lako. 5Sa lako tale ko koya e nai kaono kei nai kaciwa ni tiki-ni-siga, a sa kitaka vakakina. 6Sa qai lako ko koya e nai katinikadua ni tiki-ni-siga, a sa raici ira e so tale era sa tu walega, a sa kaya vei ira, Dou sa tu walega vakacava eke e na siga ka bogicaka? 7Era sa kaya vua, Ni sa sega e dua sa lavaka vei keitou. Sa kaya ko koya vei ira, Dou lako talega ki na were-ni-vaini; ia na ka e dodonu, dou na rawata. 8Ia ni sa yakavi mai, sa kaya na turaga ni were-ni-vaini vua na nonai talatala, Kacivi ira na tamata daucakacaka, ka solia vei ira nai voli, mo vakatekivu vei ira sa muri, mo tinia vei ira sa liu. 9Ia ni sa lako mai ko ira na tamata ni kenai katinikadua ni tiki-ni-siga, era sa tauyadua na pene-e-vitu. 10Ia ni sa lako mai ko ira era sa liu, era sa nanuma era na rawata vakalevu cake; ia ka ra sa tauyadua ga na pene-e-vitu. 11Ia ni ra sa taura, era sa qai didi vua nai taukei ni vale, 12ka kaya, O ira o qo era sa muri, sa dua bau na tiki-ni-siga era sa cakacaka kina, ia ko sa vakatautauvatataki keimami kei ira, a keimami sa colata na kena bibi kei na todra ni siga. 13A sa vosa ko koya vua e dua vei ira, ka kaya. Noqui tau, au sa sega ni vakacacani iko: edaru sa sega li ni veivosaki kei iko me vitu wale na nomu pene? 14mo kauta o qori sa nomu, ka lako; au na solia ga vua o qo ka muri, me vaka vei iko; 15sa sega beka ni tara meʼu veitaliataka na noqu ka? se sa ca beka na matamu niʼu sa yalovinaka? 16Ena sa vakakina, ena liu ko ira ka muri, ka na muri ko ira ka liu; ni ra sa lewe vuqa era sa kacivi, a ra sa lewe lailai era sa digitaki.
17A sa lako cake ki Jerusalemi ko Jisu, ka sa kauti iratou vakatikitiki tani na tisaipeli e tinikarua mai Da salatu, ka kaya vei iratou, 18Raica, edatou sa lako cake ki Jerusalemi; ka na soli yani na Luve ni tamata vei ira na bete levu, kei ira na vu-ni-vola; ia era na lewai koya me mate, 19era na qai solia vei ira na matanitu tani me ra vakalialia, ka vakanakuitataka, ka vakota ki na kauveilatai; ena qai tu cake tale mai ko koya e nai katolu ni siga.
20Sa qai lako mai vua na tinadrau na luve i Sepeteo, kei rau na luvena-tagane, ka cuva, ka kerea vua e dua na ka. 21A sa kaya vua ko koya, A cava ko sa vinakata? Sa kaya vua ko koya, Mo lewa me rau tiko na luvequ o qo, e dua e na ligamu i matau, ka dua e na nomui mawi, e na nomu matanitu. 22A sa vosa ko Jisu, ka kaya, Dou sa sega ni kila na ka dou kerea: drau sa rawata beka me gunuva na bilo kaʼu na gunuva, kei na papitaisotaki e na papitaiso kaʼu na papitaisotaki kina? Erau sa kaya vua, Keirau sa rawata. 23A sa kaya ko koya vei rau, Drau na gunuva dina na mequ bilo, ka papitaisotaki e na papitaiso kaʼu na papitaisotaki kina: ia me tiko e na ligaqu i matau, kei na noqui mawi, sa sega ni noqu meʼu solia vakailoa, vei ira ga sa vakarautaka ko Tamaqu me nodra.
24Ia ni sa rogoca ko iratou na lewe tini, eratou sa cudru sara vei rau na veitacini. 25A sa kacivi iratou mai ko Jisu, ka kaya, Dou sa kila, ni ra sa lewai ira na veimatanitu na nodra turaga, a sa veitalia vei ira ko ira sa qaqa. 26Ia ena sega ni vakakina vei kemudou; ia me nomudoui talatala ga ko koya yadua vei kemudou sa viavialevu: 27ka me nomudou tamata ko koya yadua vei kemudou sa viaviaturaga: 28me vaka ni sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.
29A ratou sa lako tani mai Jeriko, a sa lewe vuqa sara sa muri koya. 30Ka raica, e lewe rua na tamata mataboko sa tiko e na tutu ni sala, ia ni rau sa rogoca sa lako voli yani ko Jisu, erau sa kacikaci, ka kaya, Lomani keirau mai, na Turaga, na Luve i Tavita. 31A sa vunauci rau ko ira na lewe vuqa me rau tiko lo: a rau sa qai kaci vakalevu kina, ka kaya, Lomani keirau mai, na Turaga, na Luve i Tavita. 32Sa qai tu vakadua ko Jisu, ka kacivi rau, ka kaya, A cava drau sa vinakata meʼu cakava vei kemudrau? 33Erau sa kaya vua, Turaga, me rai rawa na mata i keirau. 34Sa qai yalololoma ko Jisu, a sa tara na matadrau: a sa rai vinaka vakasauri na matadrau, a rau sa muri koya.
Currently Selected:
Maciu 20: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
