Ai Vola I Isaia, na Parofita 29
29
Sa tukuni ni na cudruvi Jerusalemi eliu na Kalou, ena qai cudruvi ira sara emuri na nodra meca, 1-7. Sa vu ni nodra cudruvi na kai Jutia ni ra lecava na vunau, ka lotu vakailasu, 8-16. Era na vinaka tale ni ra sa qai saumaki dina vua na Kalou, 17-24.
1ULE ko Erieli, io ko Erieli, na koro ka tiko kina ko Tevita! dou kuria tiko na yabaki e na yabaki; me iaia tiko na solevu. 2Ia kaʼu na vakararawataki Erieli, ena tiko kina na lomabibi kei na tagi; ia ena vakai Erieli dina vei au. 3Ia kaʼu na viribaiti iko e nai valu, ka buku na druadrua ni nomu koro, ka cakava na kemu suva. 4Ia ko na vakatikori sobu, ena ia mai na qele na nomu vosa; ia ko na vosa e ra mai na kuvu-ni-soso; a domomu ena vaka na domo ni yalo, mai na loma ni qele, ia mai na kuvu-ni-soso ena domo lailai na nomu tagi. 5Ia na lewe vuqa ni nomu meca ena vaka na kuvu-ni-qele matailalai, a ra na vaka na qa ni sila e cagina ko ira nai soqosoqo rerevaki, ia ena vakasauri ka vakidacala na kena yaco. 6Ena talevi iko ko Jiova ni lewe vuqa e na kurukuru, kei na tavuki ni vanua, kei na domo levu, e na covulaca kei na cava, kei na yameyame ni buka katakata. 7Ena qai vaka na tadra se na raivotu e na bogi na nodrai soqosoqo na lewe ni veivanua era sai valu mai ki Erieli; io ko ira kecega era sa vala kaya kei na nona koro kaukauwa, ka sa vakararawataki koya. 8Ia ena vaka sa tadra e dua sa viakana, ka, raica, sa kana; a sa yadra mai, ka sa lala na yalona: ka vaka sa tadra e dua sa viagunu, ka, raica, sa gunu; a sa yadra mai, ka, raica, sa malumalumu, ka sa gagaro na yalona: ena vakakina ko ira na kedra lewe vuqa ni veivanua, era sai valu mai ki na ulu-ni-vanua ko Saioni.
9Dou tu vakadua, ka kidacala tu! dou mamarau, ka bobo! era sa mateni, ka sega e na waini; era yatayata tu, ka sega e na yaqona. 10Ni sa sovaraka vei kemudou ko Jiova na yalo daumocelutu, ka sa vautabonaka na matamudou: o ira na parofita, io na ulumudou na rairai, sa puloutaka ko koya. 11Ia na raivotu kecega sa qai tautauvata vei kemudou kei na vosa ni vola sa dregati, a ya era sa solia vua e dua sa kila na wili vola, ka ra kaya, Mo wilika mada o qo; a sa kaya ko koya, Au sa sega ni rawata; ni sa dregati: 12a sa qai soli nai vola vua sa sega ni kila na wili vola, a ra kaya, Mo wilika mada o qo, a sa kaya ko koya, Au sa sega ni kila na wili vola.
13O koya o qo sa kaya kina ko Jiova, E na vuku ni sa toro voleka vei au ko ira na tamata o qo e na gusudra, a ra sa vakarokorokotaki au e na tebenigusudra; ia na yalodra era sa vakayawataka vei au, kei na nodra rerevaki au sa vunau ga ni tamata sa vakavuvulitaka 14o koya o qo, raica, kaʼu na ia tiko kina meʼu cakacaka vakurabui vei ira na tamata o qo, ia me vakurabui vakaidina sara: ia ena yali na nodra vuku na nodra tamata vuku, ka tabonaki na nodra yalomatua na yalomatua.
15Ule ko ira era lako vakatitobu tani vei Jiova me ra vunia na nodra bose, a ra ia na nodra cakacaka e na butobuto, a ra sa kaya, O cei sa raici keitou? ia ko cei sa kilai keitou? 16A kena levu na nomudou yalotakelo! Me vakatauvatani li na dautuli kuro kei na qele ni kuro, me kaya kina na ka sa tuli vua sa tulia, Sa sega ni tuli au ko koya? se me kaya na ka sa buli vua ka bulia, Sa tawa vuku ko koya?
17Sa vo e lailai, se segai, me qai vuki ko Lipanoni me were bulabula, kei na were bulabula me okati me veikau? 18Ia e na siga ko ya ena rogoca na vosa ni vola ko koya sa didivara, ka rai rawa mai na kabukabu kei na butobuto na mata i koya sa mataboko. 19O ira talega na yaloma-lumaluma, era na kuria na nodra marautaki Jiova; kei ira na tamata dravudravua, era na rekitaki Koya na Yalosavasava nei Isireli. 20Ni sa yali na dauveivakasaurarataki, ka oti na dauveivakalialiai, ka muduki tani ko ira kecega era dauyadra me ia na ka tawa dodonu: 21era sa vakacala na tamata ni sa vosa walega, ka tudaitaki koya sa ia na veivunauci e na matamata-ni-koro, ka vakasukai koya tani walega na yalododonu.
22O koya o qo sa vosa vakaoqo kina ko Jiova, o koya ka vakabulai Eparaama, ki na mataqali i Jekope, Ena sega mada ni madua ko ira na Jekope, ena sega mada ni matacea na matadra. 23Ni ra na qai raici ira na luvedra, na cakacaka ni ligaqu, e na kedra maliwa, era na qai vakarokorokotaka na yacaqu, ia era na vakarokorokotaki Koya na nodra Yalosavasava na Jekope, ka rerevaki koya na nodra Kalou na Isireli. 24O ira talega ka daucala na yalodra, era na qai kila na vuku; kei ira na daudidi, era na qai vulica nai vakavuvuli.
Currently Selected:
Ai Vola I Isaia, na Parofita 29: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
