Ai Vola I Isaia, na Parofita 26
26
A nodra meke ni vakavinavinaka na Isireli vua na Kalou e na vuku ni nona cudruvi ira na nodra meca, kei na nona vakabulai ira, 1-19. Sa vakaroti ira me vakararavi tikoga vei Jiova me vakayacora mada na ka o qori, 20, 21.
1E NA siga ko ya ena meketaki na meke o qo e na vanua ko Juta; Sa dua na noda koro kaukauwa; ena lesia ko Koya na veivakabulai me bai kai coba. 2Dou dolava na matamata-ni-koro, me curu kina na matanitu yalododonu e sa taura tiko na dina. 3O koya sa lomadei vei iko ko na maroroya me vakacegu sara: e na vuku ni sa vakararavi vei iko. 4Dou vakararavi vei Jiova ka tawa mudu, ni sa uluvatu e tawa oti rawa na Turaga ko JIOVA. 5Ni sa vakatikori ira sobu ko koya era a tiko ecake; sa biuta sobu na koro cecere; sa biuta sobu sara ki na qele; sa vakotora ki na kuvu-ni-soso. 6Ena butuki sobu e na yava; io na yava ni yalomalumalumu kei na yavadra na dravudravua. 7A nodra sala na yalododonu sa dodonu sara: o iko, na yalododonu sara, ko na vakadodonutaka na nodra sala na yalododonu. 8Io, e na sala ni nomu lewa dodonu, Jiova, keimami a waraki iko; sa gadreva na yacamu na yalo i keimami, kei na ka ko sa nanumi kina. 9E na vu ni lomaqu kaʼu sa domoni iko e na bogi; io, e na vu ni yaloqu kaʼu sa qarai iko e na mataka: ni ko sa qai cudruvi vuravura, era na vulica nai valavala dodonu na lewe i vuravura. 10Kevaka sa yalolomani na tamata ca, ena sega ni vulica nai valavala dodonu: e na vanua daucaka dodonu ena caka vakatawadodonu ga kina ko koya, ka sega ni via raica na ka vakaturaga i Jiova. 11I Jiova, sa laveti cake na ligamu, a ra sa bese ni raica; a ra na raica ga na nomu lomakatakata e na vukudra na nomu tamata, ka madua; io, na kedra buka na nomu meca ena kani ira. 12I Jiova, ko na lewa me neimami na vakacegu: ni ko sa cakava kecega vei keimami na cakacaka e na vuku i keimami. 13I Jiova, na neimami Kalou, era a lewai keimami ko ira na turaga tani ka sega ko iko duaduaga; ia ko iko, na yacamu duaduaga, keimami ua qai vakacaucautaka. 14Sa ciba, era na sega ni bula; sa yali, era na sega ni tu cake tale: ka ni ko sa talevi ira ka vakarusai ira, ka vakaotia na ka kece era sa nanumi kina. 15O sa vakalevutaka na matanitu, Jiova; o sa vakalevutaka na matanitu; o sa vakarokorokotaki: o sa vakarabailevutaka kecega nai yalayala ni vanua. 16I Jiova, ni ra rarawa,, era qai qarai iko; era sa sova na masu vuni ni ko sa cudruvi ira. 17Me vaka na alewa bukete e voleka ni vakasucu, sa yaluma, ka qoqolou ni sa taratara mai; keimami a vakakina e matamu, Jiova. 18Keimami a bukete, keimami a yaluma, sa vaka ni keimami a vakasucuma na cagi: keimami a sega ni vakabula rawa na vanua; a ra sa sega ni via bale na kai vuravura. 19Ena bula ko ira na nomu mate, ia ko ira na noqu mate era na tu cake tale. Dou yadra ka meke, oi kemudou sa tiko e na kuvu-ni-soso, ni sa vaka na tegu e na co na nomu tegu, ia na qele ena biuti ira tale mai na mate.
20Oi kemudou na noqu tamata, dou laʼki curuma na nomudou yasana vuni, ka mani sogota na nomudou katuba; dou vuni kemudou vakadede vakalailai ga, me takali mada na veicudruvi. 21Io, ni sa qai lako mai ko Jiova mai na nona yasana me cudruva na kai vuravura e na vuku ni nodrai valavala ca; ia ko vuravura ena vakaraitaka na kena dra, ka sega ni ubi ira tiko na nona moku.
Currently Selected:
Ai Vola I Isaia, na Parofita 26: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
