Ai Vola I Isaia, na Parofita 19
19
Ena ca ko Ijipita, 1-10, ka sese na nodra turaga kei ira na kai Ijipita, 11-17. Era na lotu na kai Ijipita, 18-22, ka to vata ko Ijipita, kei Asiria, kei Isireli, 23-25.
1AI colacola kei Ijipita.
Raica! sa vodo tu ko Jiova e na o totolo, a sa lako mai ki Ijipita, a sa yavala na ka lasu ni Ijipita e matana, a sa waicala e lomana na yalo i Ijipita. 2Ia kaʼu na vakaveimecakitaki ira na kai Ijipita kei ira na kai Ijipita: a ra na dui veivala na veitacini, kei na veitokani; na veikoro, kei na veimatanitu. 3Ia ena oca sara na yalo i Ijipita e lomana; na kena vuku kaʼu na vakaotia: a ra na laʼki taroga na ka lasu, kei ira na daulawaki, kei na daucurumi, kei na rairai. 4Ia kaʼu na soli Ijipita ki na ligana e dua na turaga yaloca; ena lewai ira e dua na tui yalokaukauwa, sa kaya na Turaga, ko Jiova ni lewe vuqa. 5Ia ena di na wai mai na wasawasa, ka yali na wai mai na uciwai ka di sara. 6Ia ena boi ca mai na veiuciwai; ena maca ka di sara na soniwai ni Ijipita; ena malai yani na gasau kei na kuta. 7A veico mai na uciwai, mai na bati ni uciwai, kei na were ni sila kecega mai na uciwai, ena malai, ka cagina tani, ka yali sara. 8A ra na tagi na gonedau, ka osima kecega era dausiwa e na uciwai, ka oca sara era dau-tevuka na lawa ki dela ni wai. 9A ra na taqaya era daucakacaka e na laino matailalai, kei ira era dautali sulu vulavula. 10A kena duru era sa ramusu, o ira kece talega sa dau voli na nodra cakacaka era sa rarawa e lomadra. 11Era sa yalolialia sara na turaga ni Soani, o ira sa vuku vei ira na daubose nei Fero sa qai druma sara mai na nodra lewa: dou sa kaya vakacava vei Fero, Au sa luvedra na vuku, na luvedra na tui eliu? 12Sa evei ko ira? sa evei na nomu tamata vuku? me ra tukuna mada vei iko, ia me ra kila mai na ka sa lewa ko Jiova ni lewe vuqa e na vuku i Ijipita. 13Era sa lialia mai na turaga ni Soani, era sa vakasesei na turaga ni Memifi; a ra sa vakacalai Ijipita ko ira na duru ni kena veimataqali. 14Sa sovaraka ko Jiova ki lomadra na yalovakatani, a ra sa vakacalai Ijipita e na kena cakacaka kecega, me vaka ni sa yatayata na daumateni e na nona lua. 15Ia ena sega na cakacaka mai Ijipita, me sa cakava rawa na uluna, se na buina, se na tabana, se na kena taria. 16E na siga ko ya ena vaka na alewa ko Ijipita: ia ena rere ka sautaninini e na mata i Jiova ni lewe vuqa, ni sa laveta na ligana, a ya sa laveta kina ko koya. 17Ia na vanua ko Juta ena ka rerevaki ki Ijipita, o ira kece era sa vakananuma ena rere, e na vuku ni lewa i Jiova ni lewe vuqa, o qori sa lewa me yacova. 18E na siga ko ya ena lima na koro mai na vanua ko Ijipita ena vosataka na vosa vaka-Kenani, ka vavakini vei Jiova ni lewe vuqa; ena vakatokai e dua, Na koro ni veivakarusai. 19E na siga ko ya ena vakaduri e dua nai cabocabo-ni-soro vei Jiova e na loma ni vanua ko Ijipita, ka dua na duru vei Jiova mai na kenai yalayala. 20Ia ena yaco o qori mei vakatakilakila kai vakadinadina vei Jiova ni lewe vuqa e na vanua ko Ijipita: ni ra na tagi vei Jiova e na vukudra na dauveivakasaurarataki, ia ena tala ko koya e dua nai Vakabula vei ira, io e dua sa kaukauwa, ka vakabulai ira. 21Ia ena kilai mai Ijipita ko Jiova, a ra na kilai Jiova ko ira na kai Ijipita e na siga ko ya, ka cakai soro kai madrali, ka ia na vosavavakini vei Jiova, ka vakayacora. 22Ia ena yaviti Ijipita ko Jiova, ena yavita ka vakabula: a ra na lesu mai vei Jiova, ia ena vakamasuti e na vukudra ka vakabulai ira. 23E na siga ko ya ena dua na salatu mai Ijipita ki Asiria, a ra na veilakovi na kai Asiria kei na kai Ijipita, a ra na qarava vata ko ira na kai Ijipita kei na kai Asiria. 24E na siga ko ya ena kedraui katolu kei Ijipita kei Asiria ko Isireli, io na ka e veivakalougatataki e loma ni vanua: 25a ya sa vakalougatataka ko Jiova ni lewe vuqa, ka kaya, Sa kalougata ko Ijipita na noqu tamata, kei Asiria na cakacaka ni ligaqu, kei Isireli na noqui votavota.
Currently Selected:
Ai Vola I Isaia, na Parofita 19: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
