Ai Vola I Isaia, na Parofita 13
13
Sa vakasoqona vata nonai valu na Kalou, me ia na veicudruvi, 1-5; sa yalataki Papiloni vei ira na kai Metia, 6-16. Ena rusa sara ko Papiloni, 17-22.
1AI colacola kei Papiloni, o qori ka raica ko Isaia na luve i Amosi.
2Dou vakaduria na drotini e na ulu-ni-vanua cecere; tabalaka na domo vei ira; yalovaka na liga; me ra curuma na nodra matamata-ni-koro na turaga. 3Au sa vakaroti ira kaʼu sa vakatabuya, io kaʼu a kacivi ira na noqu qaqa, na liga ni noqu cudru, o ira era marautaka na ka kaʼu na rogo kina. 4A domo ni valu levu e na veiulu-ni-vanua, sa vaka sa lewe vuqa; a domo ni nodra ue na veimatanitu na lewe ni veivanua era sa soqoni vata: o Jiova ni lewe vuqa sa vakasoqoni ira vata na nona mataivalu. 5Era sa lako mai na vanua vakayawa, mai na vu ni lagi, io ko Jiova, kei nai yaragi ni nona cudru, me vakacacana na vanua taucoko.
6Dou qoqolou; ni sa voleka na siga i Jiova; ena yaco me vaka na veivakarusai maivei Koya na Kaukauwa. 7Ena ce kina na liga kecega, ka waicala na yalo ni tamata kecega: 8a ra na sautaninini; na taratara kei na rarawa ena tauvi ira; era na yaluma me vaka na alewa sa taratara; era na dui kidacala vakai ira; ena mata yameyame ni buka na matadra. 9Raica, sa lako mai na siga i Jiova, sa dauveituri-sautaki e na cudru levu kei na cudru waqawaqa, me vakawabokotaka na vanua: ia na kena tamatai valavala ca ena vaqeavutaka. 10Ni na sega ni cila mai na kalokalo ni lomalagi kei na kedra veimataqali; ena butobuto na mata-ni-siga ni sa lako cake, kei na vula ena sega ni cila mai na kena rarama. 11Ia kaʼu na cudruvi vuravura e na vuku ni kena ca, kei na tamata caka cala e na vuku ni nodrai valavala ca; kaʼu na muduka talega na nodra viavialevu na yalolevu, ka vakasivoka na nodra viaviaturaga era daurerevaki. 12Kaʼu na cakavi ira na tamata me dredre ka rawarawa na koula dina; io me dredre e lewe dua na tamata ka rawarawa na koula ni Oferi. 13Ia kaʼu na vakayavalataki lomalagi, ko vuravura talega ena tavuki tani mai na kena yasana, e na cudru levu i Jiova ni lewe vuqa, kei na siga ni nona cudru waqawaqa. 14Ia ena vaka na teira sa vakasavi, kei na sipi sa sega e vakasoqona; era na dui lesu vei ira na kai nona, ka dui dro ki na dui nona vanua. 15O koya yadua sa kune ena lausua; kei koya yadua sa totaki ira ena bale e nai seleiwau. 16A nodra gone ena viritaki ki na vatu e na matadra; a nodra veivale ena yanaki, ka yarataki na watidra.
17Raica, kaʼu na vakauqeti ira na kai Metia me nodra meca, era na sega ni nanuma na siliva, a ra na tawa marautaka na koula. 18A nodra dakai ena viritaki ira na cauravou ki na vatu; na vua ni kete era na tawa lomana; ia vei ira na gone ena tawa loloma na matadra. 19Ia ko Papiloni, na nodrai ukuuku na veimatanitu, na nodra ka lagilagi era dokai ira kina na kai Kalitea, ena tautauvata kei Sotoma kei Komora ni sa vukica na Kalou. 20Ena sega ni tawa tale, ena sega ni tikori tale e na dua nai tabatamata: ena sega ni birika maikea na kai Arapea na nona vale malo; o ira talega nai vakatawa era na sega ni vakadavora maikea na nodra sipi. 21Ia ena koto ga maikea na manumanu ni lekutu; ena sinai na nodra veivale e na ka kudrukudru; ena tiko maikea na luve ni ositereji; ena qito maikea na koti kila: 22ena tagi na wolifa e na nodra veivale vakaturaga; kei na gata lelevu e na nodra bure vinaka: a sa voleka ni yaco na kena gauna, ia na kena siga ena sega ni vakaberaberataka.
Currently Selected:
Ai Vola I Isaia, na Parofita 13: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
