A Cakacaka 15
15
Sa tubu e dua na veileti e na vuku ni veicili kei na ka tani e so, 1-5. Era sa soqoni vata ko iratou nai apositolo kei ira na qase, me ra bosea na ka o qo; a ra sa vola vei ira na lewe ni soro e na Veikoro e so, 6-35. Erau sa kauta nai vola ko Paula kei Parinapa; a rau sa veileti e na vuku i Marika, 36-41.
1IA e so era sa lako sobu mai Jutia, sa vakavulici ira na veiwekani, Kevaka dou sa sega ni cili me vaka nai valavala i Mosese, dou sa sega ni vakabulai rawa. 2Ia ni ra sa veileti vakalevu ka veiba kei rau ko Paula kei Parinapa, era sa lesi Paula kei Parinapa, kei iratou tale e so maivei ira, me ratou lako cake ki Jerusalemi vei iratou nai apositolo, kei ira na qase, e na vuku ni ka o qo. 3A ra sa talatala vei iratou ko nai vavakoso lewe ni soro, a ratou sa lako-basiki Feneisi kei Samaria, ka tukuna tiko ni sa saumaki mai ko ira sa matanitu kisau: a ra sa vakamarautaki ira vakalevu na veiwekani kecega. 4Ia ni ratou sa yaco ki Jerusalemi, sa mai vakacegui iratou ko ira nai vavakoso lewe ni soro, kei iratou nai apositolo, kei ira na qase, a ratou sa tukuna na ka kecega sa cakava ko na Kalou ni sa veivuke kei iratou. 5A sa tu cake e so na nodrai tokani na Farisi era sa vakabauta, ka kaya, Sa dodonu me cilivi ira o qori, me vakaroti talega vei ira me ra talairawarawa ki na vunau i Mosese.
6A ra sa qai soqoni vata mai ko iratou nai apositolo, kei ira na qase, me ra bosea na ka o qo. 7Ia ni sa oti na veileti e levu, sa tu cake ko Petero, ka kaya vei ira, Oi kemudou na veiwekani, dou sa kila ni sa gusuqu sa digitaka maivei keda ko na Kalou, e na siga sa oti makawa yani, me ra rogoca kina na vosa ni tukutuku-vinaka ko ira na veimatanitu kisau, me ra vakabauta. 8Ia na Kalou, o koya sa kila na yaloda, sa vakadinadina vei ira, ni sa solia vei ira na Yalo Tabu, me vaka ga vei keda; 9a sa sega ni vinakati keda cake vei ira, a sa vakasavasavataka na yalodra e na vakabauta. 10O koya dou sa qai vakatovolea vakaca na Kalou e na vuku ni cava, me vakataqara nai vua ki na domodra era sa lotu, a ya eda sa sega ni colata rawa se ko ira na noda qase? 11Ia sa loloma ni noda Turaga ko Jisu Karisito eda sa vakadinata ni da na bula kina, a sa vaka talega kina ko ira o qori.
12Sa qai tiko lo ko ira vakaaduaga na lewe vuqa, me ra rogoci Parinapa kei Paula, ni rau sa tukuna na veivakatakilakila, kei na veika e veivakidacalataki, sa cakava na Kalou e na ligadrau, e na kedra maliwa na veimatanitu kisau.
13Ia ni rau sa galu, sa vosa tale ko Jemesi, ka kaya, Oi kemudou na veiwekani, dou rogoci au mai: 14Sa tukuna oti ko Saimoni se sa laʼki kauta vakaevei eliu ko na Kalou e so na tamata maivei ira na veimatanitu kisau, me tiko vei ira na yacana. 15Ia na ka o qo sa bale vata sara kei na nodra vosa na parofita; me vaka na ka sa volai, 16Ni sa oti na veika o qo kaʼu na lesu mai, ka vakatura tale na vale i Tavita, o koya sa bale sobu; ia kaʼu na vakatura tale na kena ka sa rusa, au na vakaduria talega mai: 17me vakasaqarai koya na Turaga ko ira na tamata sa vo, kei ira kecega na veimatanitu, era sa vakatokai e na yacaqu, sa kaya na Turaga, o koya sa cakava na ka kecega o qo. 18Sa kila kecega ko na Kalou na nona cakacaka e na gauna makawa. 19O koya kaʼu sa lewa kina, me da kakua ni vakaceguocataki ira, era sa saumaki mai ki na Kalou, maivei ira na veimatanitu kisau: 20me da volavola ga vei ira, me tabu vei ira na duka ni matakau, na daudara talega, kei na ka sa kuna, kei na dra. 21Ni ra sa tiko makawa eliu e na veikoro kecega ko ira sa vunautaki Mosese, ni ra sa wilika e na veivale ni lotu e na veisiga ni vakacecegu.
22Sa qai vinakata ko iratou nai apositolo kei ira na qase, kei ira kecega nai vavakoso lewe ni soro, me digitaka na tamata e so maivei ira, ka vakatala me ratou lako vata kei Paula kei Parinapa ki Anitioki; oi rau ko Juta na yacana talega ko Parisapa, kei Seilasi, a tamata erau sa liu vei ira na veiwekani: 23a ra sa volavola vakaoqo me ratou kauta: Oi keimami nai apositolo kei na qase kei na veiwekani, keimami sa lomani kemudou na veiwekani sa matanitu kisau mai Anitioki kei Siria kei Silisia: 24E na vuku ni keimami sa rogoca, ni sa so sa lako tani vei keimami era sa vakidroataki kemudou e na nodra vosa, a ra sa saumaka tani na lomamudou, ni ra sa vakarota mo dou cilivi, ka muria na vunau; ia keimami sa sega ni talai ira: 25sa qai vinaka vei keimami, ni keimami sa soqoni vata ka lomavata, me digitaka e so na tamata, ka vakatala vei kemudou me ratou lako vata kei rau na daulomani ko Parinapa kei Paula, 26a tamata erau sa solia yani na nodrau bula e na vuku ni yacana na noda Turaga ko Jisu Karisito: 27o koya keimami sa talai Juta kina kei Seilasi, erau na tukuna talega na veika o qo e na gusudrau. 28Ni sa vinaka vua na Yalo Tabu, vei keimami talega, me keimami kakua ni virikotora vei kemudou nai colacola levu, o qori ga ni sa ka dodonu: 29Me tabu vei kemudou na veika sa cabo ki na veimatakau, na dra talega, kei na ka sa kuna, kei na daudara: ia kevaka dou na maroroi kemudou mai na veika o qo, dou na caka vinaka. Sa loloma.
30Ia ni ratou sa vakatalai, eratou sa lako ki Anitioki; ia ni ratou sa vakasoqoni ira vata na lewe vuqa, eratou sa solia nai vola: 31ia ni ra sa wilika oti, era sa reki e na vuku ni veivakacegui. 32Ia ko Juta kei Seilasi, koi rau sai vakavuvuli talega, erau sa vakavulici ira na veiwekani e na vosa e vuqa, ka vakataudeitaka. 33Ia ni ratou sa tiko ka siga e so, era sa qai vakatalai iratou ko ira na veiwekani e na vakacegu kivei iratou nai apositolo. 34A sa vinakata ga ko Seilasi me tiko ga maikea, 35A rau sa tiko mai Anitioki ko Paula talega kei Parinapa, a rau sa vakavuvuli ka vunautaka na vosa ni Turaga, kei ira e lewe vuqa tani.
36A sa oti e so na veisiga, sa qai kaya ko Paula vei Parinapa, Me daru lako tale me raica se ra sa vakaevei ko ira na wekadatou e na veikoro kecega edaru a vunau taka kina na vosa ni Turaga. 37A sa nanuma ko Parinapa me rau kauti Joni, a yacana talega ko Marika. 38A sa sega ni vinakata ko Paula me rau kauta vata kei rau, ni ka lako tani vei rau eliu mai Pamifilia ko koya, ka sega ni lako vata kei rau ki na cakacaka. 39A sa katakata kina na veileti, a rau sa dui lakolako kina: a sa kauti Marika ko Parinapa, a rau sa soko ki Kipiro: 40a sa digitaki Seilasi ko Paula, a sa lako yani, ni ra sa vatonaka ki na loloma ni Kalou ko ira na veiwekani.
41A sa lako voli ko koya e Siria kei Silisia, a sa vakataudeitaki ira kina na veivavakoso lewe ni soro.
Currently Selected:
A Cakacaka 15: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
