A Cakacaka 13

Sa digitaki Paula kei Parinapa ko na Yalo Tabu me rau lako vei ira na veimatanitu kisau, 1-3. A rau sa lako ki Kipiro, a sa lotu kina ko Serikiu Paula, a sa vakatovolea ko Etima me tarova, a sa cudruvi kina, 4-13. Erau sa qai lako ki Anitioki, a sa vunau kina ko Paula; ia ni sa vosa ca ko ira na Jiu, erau sa biuti ira, ka vakavulici ira sa veimatanitu kisau, 14-52.

1A SA tiko vei ira nai vavakoso lewe ni soro mai Anitioki e so na parofita kei nai vakavuvuli; o iratou ko Parinapa, kei Simioni, na yacana talega ko Nikeri, kei Lusiu na kai Kirini, kei Manaini, o koya erau sa susugi vata kei Eroti na turaga, kei Saula. 2Ia ni ratou sa cakacaka vua na Turaga, ka lolo tiko, sa kaya na Yalo Tabu, Lesi rau mai vei au ko Parinapa kei Saula ki na cakacaka kaʼu sa kacivi rau kina. 3Ni ratou sa lolo ka masu oti, eratou sa qai tabaki rau e na ligadratou, a ratou sa vakatala yani.

4Ia koi rau o qo, ni sa vakatalai rau na Yalo Tabu, erau sa lako ki Selusia; a rau sa qai soko tani maikina ki Kipiro. 5Ia ni rau sa tiko mai Salamisa, erau sa vunautaka na vosa ni Kalou e na nodra veivale ni lotu na Jiu: a sa veivuke kei rau ko Joni. 6Ia ni ratou sa lako-basika na yanuyanu ka yaco ki Pafo, eratou sa qai kunea e dua na dauvakadranikau, a parofita vakailasu, a kai Jutia, a yacana ko Pari-Jisu: 7erau sa tiko vata kei na turaga ni vanua, ko Serikiu Paula, a tamata yalomatua; o koya sa kacivi Parinapa kei Saula, a sa via rogoca na vosa ni Kalou. 8A sa tarovi rau ko Elima na dauvakadranikau, (o qo nai balebale ni yacana,) a sa vakatovolea me saumaka tani na turaga me kakua ni vakabauta.

9Ia ko Saula, (o koya talega ko Paula,) ni sa sinai tu e na Yalo Tabu, sa vakaraici koya matua, 10a sa kaya, O iko ko sa sinai e na dauveivakaisini kece kei na ca kecega, a luve ni tevoro, a meca ni ka kecega e dodonu, ena sega beka ni oti na nomu vukica nai naki dodonu ni Turaga? 11ia o qo, raica, sa bikai iko na cudru ni Turaga, o na mataboko kina, mo sega ni raica rawa na mata-ni-siga me oti mada na siga e so. A sa tauri koya vakasauri na kabu kei na butobuto; a sa lako voli me qara e so me ra tubera. 12Ni sa qai raica ko na turaga na ka sa caka, sa vakabauta, ni sa kidacala e nai vakavuvuli ni Turaga.

13Ia ni sa laivi Pafo ko Paula kei iratou sa lako vata kaya, eratou sa lako ki Perika mai Pamifilia; a sa lako tani vei rau ko Joni, ka lesu tale ki Jerusalemi.

14Ia ni rau sa lako tani e Perika, erau sa lako ki Anitioki mai Pisitia, a rau sa curu ki na vale ni lotu e na siga ni vakacecegu, a rau sa tiko sobu. 15Ia ni sa wili oti na vunau kei ira na parofita, sa talaki vei rau ko ira na turaga ni vale ni lotu, ka kaya, Oi kemudrau na veiwekani, kevaka e tu vei kemudrau e dua na vosa ni vakavuvuli vei ira na tamata, tukuna ga. 16Sa qai tu cake ko Paula, a sa vakatabataba e na ligana, ka kaya,

Oi kemudou na tamata na Isireli, kei kemudou sa rerevaka na Kalou, dou vakarorogo mai. 17A nodra Kalou na tamata o qo, io na nodra na Isireli, sa digitaki ira oti na noda qase, a sa vakalevui ira na tamata, ni ra sa tiko vulagi mai na vanua ko Ijipita, a sa kauti ira maikina o na ligana cecere. 18Ia ni sa vosota oti ko koya na nodrai valavala e na veikau ka yabaki vasagavulu; 19ka sa vakawabokotaka na matanitu e vitu e na vanua ko Kenani; sa qai vota vei ira na nodra vanua. 20Ia ni sa oti o qo, sa qai lesia c so na dauveilewai ka yabaki va na drau ka limasagavulu, a sa yacovi Samueli na parofita. 21Ia ni sa oti o qo, era sa qai gadreva me dua na nodra tui; a sa soli Saula vei ira ko na Kalou, o koya sa luve i Kisi, a tamata e na yavusa i Penijamini, ka yabaki vasagavulu. 22Ia ni sa kauti koya tani, sa qai vakatuburi Tavita me nodra tui; a sa tukuni koya talega, ka kaya, Au sa kunei Tavita na luve i Isei, a tamata e vaka na lomaqu, o koya ena cakava kecega na noqu veitalia. 23Mai na kawa i koya, me vaka na vosa ni yalayala, sa vakatubura ko na Kalou vei ira na Isireli nai Vakabula, ko Jisu: 24sa liutaki koya ko Joni, ka vunautaka na papitaiso ni veivutuni kivei ira kecega na tamata na Isireli.

25Ia ni sa vakaotia tiko na nona cakacaka ko Joni, sa kaya, Dou sa nanuma se ko cei koi au? au sa sega ni koya: ka raica, e dua sa muri au mai, ia nai vava ni yavana, kaʼu sa sega ni yaga meʼu sereka. 26Oi kemudou na veiwekani, na kawa i Eparaama, kei ira kecega vei kemudou sa rerevaka na Kalou, sa talai vei kemudou na vosa ni bula o qo. 27O ira era sa tiko mai Jerusalemi, kei na nodra turaga, ni ra sa tawa kilai koya, se na nodra vosa na parofita sa wili e na veisiga ni vakacecegu, era sa vakavacora ni ra sa lewai koya me mate. 28Ia ni ra sa sega ni kunea e dua na ka sa dodonu me mate kina, era sa masuti Pilato me vakamatei ko koya. 29Ia ni ra sa vakayacora oti na ka kecega sa volai e na vukuna, era sa kevutaka sobu mai na kau, ka vakotora e na dua nai bulubulu. 30A sa vakaturi koya cake tale mai na mate ko na Kalou; 31a sa qai vuqa na siga sa rairai kina ko koya vei ira era a lako vata kaya mai Kalili ki Jerusalemi, a sa dautukuni koya ko ira o qori vei ira na tamata. 32Ia keirau sa tukuna vei kemudou nai tukutuku vinaka ni yalayala ka caka vei ira na qase, 33ni sa vakayacora ko na Kalou vei keda na luvedra, ni sa vakatuburi Jisu cake tale ko koya; me vaka na ka sa volai e nai karua ni Sere, O iko na Luvequ, au sa vakasikavi iko e na siga o qo. 34Ia e na vuku ni sa vakaturi koya cake mai na mate, me kakua ni vuki tale me vuca, sa kaya vakaoqo ko koya, Au na solia vei kemudou na veika sa yalataki dina vei Tavita.

35O koya sa kaya talega kina ko koya e na dua tale na Sere, O na sega ni laiva na nomu Le Dua sa yalosavasava me vuca mai. 36Ia ko Tavita, ni sa qarava oti na nonai tabatamata mc vaka na veitalia ni Kalou, sa qai moce, a sa vakotori vata kei ira na nona? qase, a sa vuca mai: 37ia ko koya sa vakatura cake tale ko na Kalou, sa sega ni vuca mai.

38O koya o qo mo dou qai kila, na veiwekani, ni sa vunautaki vei kemudou na bokoci ni valavala ca e na vukuna o qo: 39e na vukuna talega sa vakadonui ko ira kecega era sa vakabauta, e na ka kecega, a ya dou sa sega ni vakadonui rawa kina e na vunau i Mosese. 40O koya o qo mo dou qai raici kemudou vinaka, de yaco vei kemudou na ka sa vosa kina ko ira na parofita: 41Raica, oi kemudou sa daubeca, ia mo dou kidacala, ka rusa: niʼu sa kitaka e dua na cakacaka e na nomudou gauna, a cakacaka dou na sega sara ni vakadinata, kevaka sa dua e tukuna vei kemudou.

42Ia ni ra sa lako tani tiko mai na vale ni lotu ko ira na Jiu, sa masu ko ira sa matanitu kisau me vunautaki vei ira na vosa o qo e na siga ni vakacecegu sa tarava mai. 43Ia ni ra sa suka tani ko ira sa soqoni vata, sa lewe vuqa na Jiu kei na tamata lotu vakai ira, era sa muri Paula kei Parinapa: a rau sa vosa vei ira, ka vakarota vei ira, me ra taura dei na loloma ni Kalou. 44Ia e na siga ni vakacecegu sa muri, sa kolai oti na lewe ni koro ni ra sa soqoni vata me rogoca na vosa ni Kalou. 45Ia ni sa raica ko ira na Jiu ni ra sa le vuqa, era sa sinai e na vuvu, a ra sa vosa vakatanitaka na veika sa tukuna ko Paula, a ra sa vakatitiqataka ka vosavakacacataka: 46A rau sa qai doudou ko Paula kei Parinapa, ka kaya, E dodonu ga me vunautaki eliu na vosa ni Kalou vei kemudou: ia ni dou sa biuta tani vei kemudou, ka lewai kemudou mo dou sega ni yaga mo dou bula tawa mudu, raica, keirau sa vuki vei ira sa matanitu kisau: 47ni sa vakarota vakakina ko na Turaga vei keitou, Au sa vakaturi iko mo nodra rarama na veimatanitu, mo yaco mo vu ni bula ki nai yalayala kei vuravura.

48Ia ni ra sa rogoca ko ira sa matanitu kisau, era sa reki, a ra sa vakarokorokotaka na vosa ni Turaga: ia sa vakabauta ko ira kece era sa vakarau tu me vinakata na bula tawa mudu. 49A sa kuruvaki na vosa ni Turaga e na veiyasana kecega o qori. 50A ra sa vakayavalati ira na yalewa lotu, kei ira na marama, kei ira na turaga ni koro, ko ira na Jiu, a ra sa vakatubura na dauveivakacacani vei rau ko Paula kei Parinapa, ka vakasavi rau tani e na nodra yasana. 51A rau sa kuretaka na soso vei ira mai na yavadrau, a rau sa lako ki Ikoniona. 52Ia ko ira sa lotu era sa sinai c na marau kei na Yalo Tabu.

Currently Selected:

A Cakacaka 13: FIJ1864

Highlight

Copy