Dodadi 4
4
O Kaini de o Habele manga ade-ade
1O Adama de ngoi fekata yomakitigi ho ka de ipahaino gea o ngo Hawa de ami badangoka. De ahao momagerewoto de ami ngofaka o nauru. De muna motemo ami rokatika mato, “Ma Jou wohihiakunu ho hiadono o ngofaka o nauru tamakeoka.” De manga ngofaka gea iwihiromanga unangika o Kaini.#4:1 Nako o Yahudioka manga demo, “o Kaini” gea ma titi, “ngone hamakeoka.” 2Ami ngofaka o domoro gea mamakeoka de ipahaino de ahao muna mamakeoli ami ngofaka ka o nauroli de una gea iwihiromanga o Habele.
De o ria-dodoto yahinooto gea yobaluhiye de o Habele woigo wotobapaliara o aewani o dofo ma duduono, de ai riaka o Kaini una woigo wotobaredi. 3-4De ipahaino o Kaini de o Habele yoiki yomahuba Ma Jouiye, de o Kaini womahihuba ai redi ma hasilino. Masara o Habele womahihuba ai domba ma ngofaka ma domorino. Ho ai domba o domoro muruono naga watoma ibooto de ahao watetoro de ma haki-haki wairikino de ena gea womahihuba. De Ma Jou duru wosanangi o Habelika de ai huhubaika gea. 5Masara Ma Jou o Kaini ko widafongua de ai huhubaoo waoluku. Ho o Kaini duru wongamo de duru ai himanga wafufutuoka.
6Ho Ma Jou wibole ma goa-goa unangika wato, “Kaini, adodoa ho ngona nongamo? Adodoa ho ani himanga itafukuoka? 7Ngona nohioriki nako nodiai itiai de Ngohi tosanangi tonidafongo, masara naa nomahidodiai angamoi nako nodiai ko itiaiua gea de naga ani howono. O howono imaketero hoka o fuhuku ma aewani de ma buturungoka abe duru ani datekoka inigogataheke la ka idadi inihikangela. Ho ngona kiani duru nalawana o howonika hiadono to ena ma buturungu nohikala.” Hokogea Ma Jou wihitiari o Kainika.
O Kaini ai dodoto witoma
8De o Kaini ahao o Habelika wihigaro wato, “Dodoto, abeika hoiki doka ma honongaika.” Ho o Habele wiaoika ma hoanoka de genangoka de ka itodokanino wibaatika de ai dodoto witomaka.
9De ahao Ma Jou wibole ma goa-goahi wileha o Kainika wato, “Kaini, ani dodoto una o kiaikaka?”
De wipaluhu Ma Jouika wato, “Aiyaho, de ngohi naa ko tihiorikua, mode ngohi ahi dodoto ai gogoana?”
10Ka de o Kaini ai demo hokogea de Ma Jou wihiree-reeika wato, “Gea ngona nodiai nato bote ko tonimakeua? Gea ani dodoto ai awunu tamake iuihoka o tonakuku de imaketero hoka ai awunu igahoko la tihohowono una gea abe witoma. 11De angamoi gea ngona nitomaka hiadono ani dodoto ai awunu ahiihoka o tonakuku ho o tonakino tapake la tonihohowono. 12Abe ngaro ngona nomarediohi masara o hasili ma tonakino gea ko namakeokaua. Ho ngona ko idadiokaua noriidi o ngi moioka, nodadioka o paradidu ma nyawa.”
13De o Kaini womademo wato, “Ahi Baluhu, ahi hohowono itubuhoholi, ngohi ko tapoaua todafongo hokogea. 14Abeika, o wange naa de parahaja dika tomaredi de Ngona ko nohidafongokaua ho Ngonaka tomatingakoka. Ngohi kiani ka ihikaika totagi-tagi dika de ahi dodogumu ko iwa o duniaka. Ho ngohi naa ahao ka ihikaika o nyawa ihimake hoka o homoa ma nyawa ho done ka de ihimake de ihihidee la ato ihitoma.” Hokogea o Kaini ai hawana ma demo.
15De Ma Jou wipaluhu unangika wato, “Koua, ani hohowono ko adonuahi hokogea, abe nako naga o nyawa initoma gea tonihibalaha onangika ma tumidi.” Hokogea wihingahuoka de ahao Ma Jou o dodunguu moi wodiai o Kainika la ngaro naga moiani yomakamake de una de ma titi ai dodunguu gea hiadono ko iwihikangelaua. 16Ho gea o Kaini Ma Jou ai himangoka wosobo, woiki o tonaka moiikali ma romanga o Noodo, gea o Edene ma tonaka ma honongaka. O Noodo ma romanga ma titi gea yopoparadidu manga gogere.
17De ipahaino de o Kaini unangoo naga ngoi fekata de yomakitigi ho muna de ami badangoka. De ahao ngoi fekata momagerewoto de manga ngofaka o nauru yamake de o Kaini wihiromanga ai ngofaka o Henoko. De ipaha o Kaini wohititi la wato wodiai o kota moi de ma kota gea enangoo wohiromanga o Henoko la gea wohitunguu abe ai horomati ai ngofaka o domoro o Henokika. 18Ka de o Henoko gea wobaluhiyeoka de woilaka de wamake o ngofaka ai romanga o Irada. De o Iradoli ahao naga de ai ngofaka o Mehuyaele, de ahao o Mehuyaeloli naga de ai ngofaka o Metusala, de ahao o Metusalali naga de ai ngofaka o Lameke.
19De o Lameke womale ngoi fekata yahinooto, momatengo ami romanga o ngo Ada de momatengoli o ngo Sila. 20O ngo Ada ahao momamake ami ngofaka o Yabala. De o Yabala una gea ahao wodadi to ona manga tofora abe yotobapaliara o aewani o dofo hoka o domba de o hapi. Ho to una ai totoforauku yaniiki manga duduono ka ihikaika de ko yoriidua o ngi moioka ho yogogere o tau-tauoka abe yodiai o ngoerino.
21De o Yabala ai dodoto o Yubala. De una gea ahao wodadi to ona manga tofora abe yososawaro yokuti o hitar eko yoluiti o fiola de o sulingi yowuwu.
22De o Lameke nagali ai ngofaka abe wamake ngoi fekatino o ngo Silaino de ai ngofaka gea ai romanga o Tuba-Kaini. De o Tuba-Kaini gea una abe wososawaro wodiai o kiahonanga o behino eko o tabaagaino ho wodadi to ona manga tofora abe yotobatutuku o behi de o tabaaga. De o Tuba-Kaini ngoi firanga o ngo Naama.
23De ma moiuku o Lameke wahingahu ai sade ngoi feka-fekatika wato,
“Niaino o ngo Ada de o ngo Sila la ahi demo niihene,
Ngohi naa o Lameke totemo ho ngini ngohi feka-fekata kiani nitotoihene,
Naa tagou-goungu, nako naga womatengo wohihinabo una gea ka titomaka,
Ngaro una ka o goohi ma ka de wohipoha dika de titomaka.
24 Nako o Kaini iwitomaka de kiani o nyawa yohonenge,
To una ai balaha kiani o nauru yatumidi yohonenge,
Ma nako ngohi, ka de o nyawa ihihikangela dika,
De tomahibalaha hiadono yamoritumidi de yatumidi yohonenge.”
Hokogea o Lameke ai sade ma demo abe una to Kaini ai totoforauku.
O Habele ai duruuru o Seete de naa to una de ai ngofaka manga ade-ade
25De o Adama de ngoi fekata yomakitigi ho muna de ami badangokali, de ahao momagerewoto o ngofaka o nauroli. De o ngo Hawa mihiromanga o Seete#4:25 Nako o Yahudioka manga demo, “o Seete” ma titi, “naga ma duruuru.” angamoi motemo mato, “Abeika, naa Ma Jou wodiai. Angamoi o Kaini ai dodoto witomaka ho Ma Jou wohihidailako o Habele ai duruuru ho hiadono tamake ahi ngofaka naa.” 26Ho gea o Seete wobaluhiyeoka de woilaka ho to unangoo ai ngofaka ahao wamake de wihiromanga o Enoso. De ma oraha gea ahao o nyawa yomulaengoli Ma Jou o Yawe ai romanga yagorakiye de manga horomati Unangika.
Currently Selected:
Dodadi 4: MJDD
Highlight
Copy
Compare
Share
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
